Адыгеим и ЛIышъхьэу Урысыем ПенсиехэмкIэ ифонд и Къутамэу Адыгэ Республикэм щыIэм ипащэу ригъэблэгъагъ

Адыгеим и ЛIышъхьэу КъумпIыл Мурат Урысыем ПенсиехэмкIэ ифонд и Къутамэу Адыгэ Республикэм щыIэм ипащэу МэщлIэкъо Хьамид ригъэблэгъагъ.

ЗэIукIэгъум илъэхъан зытегущыIагъэхэр республикэм ихэбзэ къулыкъухэм зэрадэлажьэхэрэм, джащ фэдэу цIыфхэм аIэкIагъэхьан фэе ахъщэ тынхэр зэралъагъэIэсыхэрэм яIофыгъохэр ары. Анахьэу анаIэ зытырагъэтыгъэр Урысые Федерацием и Президентэу Владимир Путиным къыгъэуцугъэ пшъэрылъхэу кIэлэцIыкIухэр зэрыс унагъохэм IэпыIэгъу ятыгъэным епхыгъэхэр ары.

Республикэм и ЛIышъхьэ къызэрэхигъэщыгъэмкIэ, Адыгеим, зэрэхэгъэгоу фэдэу, социальнэ лъэныкъомкIэ зиIофхэр анахь дэйхэм IэпыIэгъу ятыгъэнымкIэ Iофтхьэбзэ гъэнэфагъэхэр щызэрахьэх. Унагъохэм, ным, кIэлэцIыкIухэм адеIэгъэнымкIэ, демографием хэхъоныгъэ ышIынымкIэ хэгъэгум и Президент къыгъэуцугъэ пшъэрылъхэм адиштэу IофтхьэбзакIэхэр зэрахьэх.

«ЗэкIэ Iофтхьабзэхэр уахътэм къыпкъырэкIых ыкIи шIуагъэ къаты. Анахьэу мэхьанэ зиIэр игъом ыкIи икъоу ахэр гъэцэкIагъэ хъунхэр ары. Унагъо пэпчъ шъунаIэ тежъугъэт, зы лъэIу закъуи шъунаIэ тешъумыдзэу къэшъумыгъан», — пшъэрылъ къафигъэуцугъ Адыгеим и ЛIышъхьэ.

Урысыем ПенсиехэмкIэ ифонд и Къутамэу Адыгэ Республикэм щыIэм ипащэ къызэриIуагъэмкIэ, Урысые Федерацием и Президент и Указэу мазэ къэс илъэси 8-м къыщыублагъэу 17-м нэс зыныбжь кIэлэцIыкIухэм апае ахъщэ аIэкIэгъэхьэгъэным епхыгъэр дэгъоу зэшIохыгъэ зыщыхъурэ шъолъырхэм Адыгеир ащыщ.

Шъугу къэтэгъэкIыжьы: илъэситIукIэ узэкIэIэбэжьымэ хэгъэгум и Президент кIэщакIо зыфэхъугъэ Iофтхьабзэу илъэси 3-м къыщыублагъэу илъэси 7-м нэс зыныбжь кIэлэцIыкIухэм мазэ къэс ахъщэ IэпыIэгъу ятыгъэныр ублагъэ хъугъэ. НепэкIэ ащ фэдэ IэпыIэгъур унэгъо 17000-м аIукIагъ. Мы илъэсым джыри зы IофтхьэбзакIэ Урысыем и Президент кIэщакIо фэхъугъ. Ар зыфэгъэхьыгъэр зихахъо мыин унагъохэу илъэси 8-м къыщыублагъэу илъэс 17-м нэс зыныбжь кIэлэцIыкIухэр зэрысхэм ахъщэ IэпыIэгъу ятыгъэныр ары. 2022-рэ илъэсым жъоныгъуакIэм къыщыублагъэу ащ фэдэ тынхэр Адыгеим ис унагъохэм аIэкIагъахьэх, ащкIэ электрон шIыкIэм тетэу къэралыгъо фэIо-фашIэхэмкIэ Портал зыкIыр, МФЦ-р, ПФР-м икъулыкъухэр къызфагъэфедэхэзэ ахъщэр аIэкIагъахьэ. ЛъэIу тхылъ къэзытыгъэхэм янахьыбэ дэдэмэ къэралыгъо фэIо-фашIэхэмкIэ Порталыр къызфагъэфедагъ (процент 95,2-рэ). НепэкIэ лъэIу тхылъ мин 24-м ехъу къаIукIагъ, ахэмкIэ сомэ миллион 440-м ехъу аратынэу агъэнэфагъ. Сомэ миллион 200-м ехъу аIэкIагъэхьэгъах.

«ПIалъэхэр тымыукъоу ахъщэр аIэкIэтэгъахьэ, джащ фэдэу цIыфхэм зыкъызэрэтфагъэзэрэ Iофыгъохэм тынаIэ тетэу тахэплъэ. ЛъэIу тхылъ къэзытыгъэхэм ащыщ горэми IэубытыпIэ икъу имыIэу дгъэунэфыгъэп. Урысые Федерацием и Президент кIэщакIо зыфэхъугъэ социальнэ тынхэр икъоу ыкIи ипIалъэм аIэкIэтэгъахьэх», — къыIуагъ МэщлIэкъо Хьамид.

Урысыем ПенсиехэмкIэ ифонд и Къутамэу Адыгеим щыIэм къызэритыгъэмкIэ, лъэIу тхылъыр къызатыгъэ ыкIи организациехэм ищыкIэгъэ къэбарыр ПФР-м къызIэкIагъэхьэгъэ нэужым IофшIэгъу мэфи 10-м шIомыкIэу унашъо ашIы ащ фэдэ ахъщэр ятыгъэным фэгъэхьыгъэу. Апэрэ ахъщэ тыныр унашъор заштагъэм ыуж IофшIэгъу мэфи 5-м нахьыбэ темышIэу аIэкIагъахьэ, ащ нэужым ахъщэр къызфыратырэ мазэм къыкIэлъыкIорэ мазэм иа 1-рэ мафэ къыщыублагъэу ия 25-рэ мафэ нэс ахъщэр аIэкIагъэхьащт.