Хэгъэгу зэошхом щыфэхыгъэхэр агу къагъэкIыжьыгъэх

Шъыгъо-шIэжь Мафэм — Хэгъэгу зэошхор къызежьагъэм фэгъэхьыгъэ Урысые Iофтхьабзэхэм къадыхэлъытагъэу Адыгеим ирайонхэм дзэкIолIхэм ямыжъобгъухэу, ясаугъэтхэу арытхэм къэгъагъэхэр акIэралъхьагъэх.

Къалэу Мыекъуапэ и Гупчэ мемориал Адыгеим и ЛIышъхьэу КъумпIыл Муратрэ Урысыем и Президент и Полномочнэ лIыкIоу ЮФО-м щыIэм игуадзэу Владимир Гурбарэ ЕгъэшIэрэ машIом дэжь къэгъагъэхэр щыкIэлъыралъхьагъэх, Хэгъэгу зэошхом илъэхъан советскэ дзэкIолIхэу ыкIи мамыр цIыфхэу фэхыгъэхэр агу къагъэкIыжьыгъэх.

Джащ фэдэу Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м иминистрэхэм я Кабинет хэтхэр, республикэ парламентым идепутатхэр, Урысые политическэ партиеу «Единэ Россием», общественнэ организациехэм, ныбжьыкIэ объединениехэм, Юнармием ялIыкIохэр.

Хабзэ зэрэхъугъэу, мэкъуогъум и 22-м ичэщ Адыгеир Iофтхьабзэу «Свеча памяти» зыфиIорэм хэлэжьагъ. Партиеу «Единэ Россием» хэтхэм, волонтерхэм, общественнэ движениехэм ялIыкIохэм, молодогвардейцэхэм Мыекъуапэ и Гупчэ мемориал шэф остыгъэ мини 3-м ехъу щызэкIагъэнагъ.

Шъугу къэтэгъэкIыжьы Хэгъэгу зэошхом илъэхъан Адыгеим щыщ нэбгырэ мин 80 фэдиз фронтым зэращэгъагъэр, ахэм ащыщэу нэбгырэ мин 30-м ехъумэ яунэ къызэрамыгъэзэжьыгъэр. Ахэм яхьэдэкъупшъхьэхэр IэкIыб къэралыгъо 23-мэ ащычIалъхьажьыгъэх. Адыгеим щыщ нэбгырэ 59-мэ Советскэ Союзым и ЛIыхъужъыцIэрэ Щытхъум иорденищрэ къафагъэшъошагъ.