«Ащэмэзыр» агъэшIуагъ

Адыгеим и ЛIышъхьэу КъумпIыл Мурат непэ республикэм и Лъэпкъ музей ихьакIэщ фольклор-этнографическэ купэу «Ащэмэзым» щыIукIагъ.

Апэрэ каналым имузыкальнэ проектэу «Поем на кухне всей страной» зыфиIорэм хэлэжьэгъэ купыр гъэрекIо финалым ихьэгъагъ.

Ансамблэу «Ащэмэзым» хэтхэм адыряIэгъэ зэIукIэм хэлэжьагъэх УФ-м IофшIэнымкIэ и ЛIыхъужъэу, тхакIоу, общественнэ IофышIэу МэщбэшIэ Исхьакъ, АР-м культурэмкIэ иминистрэу Аулъэ Юрэ, Мыекъуапэ имэрэу Геннадий Митрофановыр, общественнэ движениеу «Адыгэ Хасэм» итхьаматэу ЛIымыщэкъо Рэмэзан, гуманитар ушэтынхэм апылъ Адыгэ республикэ институтэу Т. КIэращэм ыцIэ зыхьырэм ипащэу ЛIыIужъу Адам, АР-м и Лъэпкъ музей идиректорэу Джыгунэ Фатимэ.

«Ащэмэзым» ихудожественнэ пащэу Бастэ Асиет яколлектив Апэрэ каналым имузыкальнэ проект зэрэхэлэжьагъэр, творческэ гухэлъэу яIэхэр къафиIотагъ.

Пчыхьэзэхахьэр зезыщэгъэ Тэу Замирэ зэрэхигъэунэфыкIыгъэмкIэ, 2005-рэ илъэсым АР-м лъэпкъ культурэмкIэ и Гупчэ ансамблэр щызэхащагъ. 2012-рэ илъэсым коллективыр творческэ объединениеу «Ошъадэм» хэхьагъ, илъэсищ тешIагъэу «Народнэ самодеятельнэ коллектив» зыфиIорэ цIэр къыфагъэшъошагъ. Ансамблэм хэтхэр Беданэкъо Алан, КIуращынэ Адам, Шъэокъуй Айдэмыр, ЛIыхъурэе Анзор, Сапый Аскэр, Биданэкъо Жьыут.

Ансамблэм хэтхэм ижъырэ адыгэ орэдхэр къаIо, адыгэхэм яIорыIуатэ, лъэпкъ шэн-хабзэхэр зэрагъашIэх. Хэгъэгум ичIыпIэ зэфэшъхьафхэм ахэм ятворчествэ къащагъэлъагъо. Адыгеим, Къэбэртэе-Бэлъкъарым, Къэрэщэе-Щэрджэсым, Германием ит къалэу Мюнстер ащыкIогъэ культурэ Iофтхьэбзабэмэ «Ащэмэзыр» ахэлэжьагъ, мызэу, мытIоу зэнэкъокъу, фестиваль зэфэшъхьафхэм ялауреат хъугъэ, дипломхэр къащихьыгъэх. 2023-рэ илъэсым ищылэ мазэ зигугъу къэтшIырэ купыр Апэрэ каналым ишооу «Поем всей страной» зыфиIорэм ифинал ихьагъ. ЩытхъуцIэу «АР-м лъэпкъ творчествэмкIэ изаслуженнэ коллектив» зыфиIорэр къыфагъэшъошагъ.

АР-м и ЛIышъхьэ ансамблэм ипащэрэ иколлективрэ творческэ гъэхъагъэхэр зэрашIыгъэхэмкIэ, телепроектышхом чанэу зэрэхэлэжьагъэхэмкIэ афэгушIуагъ, юбилей медалэу «Адыгэ Республикэр зызэхащагъэр илъэси 100 хъугъэ» зыфиIорэр аритыгъ, шIушIэ IэпыIэгъу купым рагъэгъотынэу пшъэрылъ афишIыгъ.

«Адыгеим имызакъоу, тихэгъэгу инэмыкI шъолъырхэм арысхэми лъэпкъ орэдхэр къызэрэшъуIорэр агу рехьы. Шъо Урысыем исхэр тикультурэрэ тишэн-хабзэхэмрэ нэIуасэ афэшъушIыгъэх. ШъуиIэпэIэсэныгъэ зэрэхэхъощтым, шъуизэчый зыкъызэрэIуихыщтым, творческэ гъэхъэгъакIэхэр зэрэшъушIыщтхэм сицыхьэ телъ. ЫпэкIэ шъулъыкIотэнэу, гухэлъышIоу шъуиIэхэр къыжъудэхъунхэу сышъуфэлъаIо», — къыIуагъ КъумпIыл Мурат.

Лъэпкъ орэдхэм якъэIонкIэ ижъырэ хабзэхэр къызэтегъэнэжьыгъэнхэм, народнэ творчествэм изегъэушъомбгъункIэ амалыкIэхэр гъэфедэгъэнхэм мэхьанэшхо зэряIэр зэIукIэм хэлэжьагъэхэм хагъэунэфыкIыгъ.

МэщбэшIэ Исхьакъи, ЛIымыщэкъо Рэмэзани, ЛIыIужъу Адами, нэмыкI хьакIэхэри «Ащэмэзым» хэтхэм афэгушIуагъэх, орэдкъэIонымкIэ гъэхъэгъакIэхэр ашIынэу афэлъэIуагъэх.

Ансамблэм иорэдыIохэм ижъырэ орэд заулэ, Апэрэ каналым ишоу къыщаIогъэ джырэ орэдхэм ащыщхэр къаIуагъэх. ХьакIэхэм апашъхьэ ансамблэм хэт кIэлэцIыкIухэми орэд къыщаIуагъ. Пчыхьэзэхахьэм къырагъэблэгъагъэхэр кIэлэцIыкIухэм афэлъэIуагъэх ансамблэм ихэбзэшIухэр лъагъэкIотэнэу, творческэ гъэхъагъэхэр ашIынхэу.