КIэлэцIыкIухэм япIункIэ амалышIухэр щыIэх

КIэлэцIыкIухэм якъэухъумэн и Дунэе мафэ тефэу Урысые Федерацием и Правительствэ и Тхьаматэ игуадзэу Татьяна Голиковамрэ Урысые Федерацием просвещениемкIэ иминистрэу Сергей Кравцовымрэ кIэлэцIыкIу IыгъыпIэхэм якъызэIухынкIэ Урысые онлайн-марафон зэхащэгъагъ.

Зы мафэм къыкIоцI хэгъэгум ишъолъыр 12-мэ кIэлэцIыкIу IыгъыпIэ 19 къащызэIуахыгъ, ахэм зыкIэ ащыщ АдыгеимкIэ Шэуджэн районым ит къутырэу Тихоновым къыщызэIуахыгъэ кIэлэцIыкIу IыгъыпIэу «Солнышко» зыфиIорэр.

Республикэм ыцIэкIэ мы Iофтхьабзэм хэлэжьагъ АР-м и ЛIышъхьэу КъумпIыл Мурат.

Iофтхьабзэр къызэIуихызэ УФ-м и Правительствэ и Тхьаматэ игуадзэу Татьяна Голиковам къызэрэхигъэщыгъэмкIэ, Хэгъэгум и Президентэу Владимир Путиным пшъэрылъ къыгъэуцугъ мы илъэсым ыкIэм нэс УрысыемкIэ кIэлэцIыкIу IыгъыпIэм чIэхьан фаеу щытхэм япроценти 100-м чIыпIэ арагъэгъотынэу.

«Мы аужырэ илъэсхэм къэралыгъом Iофышхоу зэшIуихыгъэм ишIуагъэкIэ кIэлэцIыкIу IыгъыпIэхэм зищыкIэгъэ пстэуми чIыпIэ ащагъотыным иIофыгъошхо зэшIохыгъэ мэхъу. Аужырэ илъэс заулэм республикэм кIэлэцIыкIу IыгъыпIэ 15 щыдгъэпсын тлъэкIыгъ ыкIи а Iофыр лъытэгъэкIуатэ. Урысыем и Президентэу Владимир Путиным, УФ-м и Правительствэ и Тхьаматэ игуадзэу Татьяна Голиковам, УФ-м просвещениемкIэ иминистрэу Сергей Кравцовым ренэу яшIуагъэ къызэрэтагъэкIырэм пае сызэрафэразэр къэсIонэу сыфай. Ахэм яшIуагъэкIэ мы проектхэр гъэхъагъэ хэлъэу щыIэныгъэм щыдгъэцэкIэнхэ тлъэкIыгъ», — къыхигъэщыгъ КъумпIыл Мурат.

Къутырэу Тихоновым нэбгыри 120-м телъытэгъэ кIэлэцIыкIу IыгъыпIэу непэ къыщызэIуахыгъэри лъэпкъ проектэу «Демографием» ишIуагъэкIэ агъэпсыгъ. Ащ сомэ миллион 200-м ехъу пэIухьагъ. Джырэ уахътэм диштэрэ унэм кIэлэцIыкIухэм япIункIэ ищыкIагъэр зэкIэ хэт: зыщыджэгущтхэ унэ Iэрыфэгъухэр, музыкэмрэ спортымрэ афытегъэпсыхьэгъэ залыр, методическэ кабинетыр, психологымрэ логопедымрэ якабинетхэр. Дукмасовскэ къоджэ коим хэхьэрэ псэупIи 6-мэ къарыкIырэ кIэлэцIыкIухэри ащ чIэфэщтых.

Мы илъэсым ыкIэхэм яхъулIэу лъэпкъ проектым тегъэпсыхьагъэу Шэуджэн районым джыри кIэлэцIыкIу IыгъыпIитIу къыщызэIуахынэу гухэлъ яI, ащ амал къытыщт муниципалитетым кIэлэцIыкIу IыгъыпIэхэмкIэ ищыкIэгъэ чIыпIэм фэдиз иIэ хъунэу.