Гъогухэр шапхъэхэм адиштэнхэм пае

Урысые Федерацием и Президент и Полномочнэ лIыкIоу Къыблэ федеральнэ шъолъырым щыIэм дэжь щызэхэщэгъэ Советым изэхэсыгъо Адыгеим и ЛIышъхьэу КъумпIыл Мурат хэлэжьагъ. Владимир Устиновым тхьамэтагъор ащ щызэрихьагъ.

Зэхэсыгъом зыщатегущыIэгъэхэ Iофыгъохэм ащыщых хэгъэгум и Къыблэ ишъолъырхэм 2023 — 2027-рэ илъэсхэм гъогухэм япхыгъэ IофшIэнэу агъэцэкIэщтымкIэ мурадэу яIэхэм ыкIи автомобиль гъогухэм япроцент 85-м нахь мымакIэу шапхъэхэм адиштэу щытынхэм яIофыгъохэр.

Владимир Устиновым къызэрэхигъэщыгъэмкIэ, Урысыем и Президентэу Владимир Путиным къыгъэуцугъэ пшъэрылъхэм адиштэу IофшIэныр агъэцакIэ. А лъэныкъомкIэ Iофэу ашIэрэм фэгъэхьыгъэу къэгущыIагъэх федеральнэ гъогу агентствэм (Росавтодорым) ипащэу Роман Новиковыр, Къыблэ федеральнэ шъолъырым къыхиубытэрэ субъектхэм япащэхэр.

2023-рэ илъэсым АдыгеимкIэ гъогу фондыр сомэ миллиарди 4,2-м ехъу. Ащ хэхьэ республикэ ыкIи чIыпIэ мэхьанэ зиIэ автомобиль гъогухэр шапхъэхэм адиштэхэу шIыгъэнхэм пае къыхагъэкIыгъэ сомэ миллиардым ехъурэр.

Транспортым тегъэпсыхьэгъэ документхэу зэхагъэуцуагъэхэм адиштэу республикэ е муниципальнэ мэхьанэ зиIэ автомобиль гъогуи 8, километрэ 208-м ехъу якIыхьагъэу агъэнэфагъэхэм ахагъэхьагъ.

Автомобиль гъогухэр шапхъэхэм адиштэхэу шIыгъэнхэм пае илъэсыр къызихьагъэм къыщыублагъэу автомобиль гъогоу Мыекъуапэ — ТIуапсэ щыщэу километри 2,7-мэ гъэцэкIэжьын IофшIэнхэр арашIылIагъэх, ахэм сомэ миллион 41,7-рэ апэIухьагъ.