IэпыIэгъу аратыным ренэу фэхьазырых

Социальнэ IофышIэм и Мафэ фэгъэхьыгъэ Iофтхьабзэ республикэм и Къэралыгъо филармоние непэ щыкIуагъ.

Социальнэ къулыкъухэмрэ ведомствэхэмрэ яIофышIэхэм афэгушIонэу къэкIогъагъ Адыгеим и ЛIышъхьэу КъумпIыл Мурат.

Адыгеим и ЛIышъхьэ зэIукIэгъум хэлажьэхэрэм шIуфэс къарихызэ къызэрэхигъэщыгъэмкIэ, социальнэ IофышIэхэр ренэу ягъусэх IэпыIэгъу, гуфэбэныгъэ зищыкIэгъэ цIыфхэм. Къиныгъохэр щагъэзыенхэмкIэ ахэр IэпыIэгъу афэхъух, янеущрэ мафэ яцыхьэ нахь телъэу хъунымкIэ яшIуагъэ арагъэкIы.

«Ащ фэдэ IофшIэным шIэныгъэрэ опытрэ зэрищыкIагъэм имызакъоу, гуфэбэныгъэ, гукIэгъу ищыкIагъ. Iофэу шъузфэгъэзагъэм шъузэрэфэшъыпкъэм, гуетыныгъэ зэрэшъухэлъым апае тышъуфэраз», — къыIуагъ КъумпIыл Мурат.

Урысыем и Президентэу Владимир Путиным социальнэ политикэмкIэ пшъэрылъэу къыгъэуцугъэхэм къатегущыIэзэ Адыгеим и ЛIышъхьэ къызэрэхигъэщыгъэмкIэ, федеральнэ хабзэм иIэпыIэгъу хэлъэу мы аужырэ илъэсхэм республикэм бэ щызэшIуахырэр социальнэ фэIо-фашIэхэр зищыкIагъэу щытхэм тэрэзэу ахэр ягъэгъотыгъэнхэмкIэ. Ащ нэмыкIэу республикэм социальнэ IэпыIэгъум нахь зыщиушъомбгъунымкIэ илъэс къэс ахъщэ гъэнэфагъэ къафыхагъэкIы.

«Анахьэу тынаIэ зытедгъэтырэр унэгъо ныбжьыкIэхэм, кIэлэцIыкIухэм, пенсионерхэм, сэкъатныгъэ зиIэхэм - социальнэ фэIо-фашIэхэр анахь зищыкIэгъэ шъыпкъэу щытхэм IэпыIэгъу ятыгъэныр ары. Хэгъэгум ишъолъырыкIэхэм зышъхьэ къарызыхыжьыгъэхэм Iоф адэшIэгъэным тисоциальнэ IофышIэхэр хэлажьэх. Мэхьанэшхо зиIэ лъэныкъом — дзэкъулыкъушIэхэм, хэушъхьафыкIыгъэ дзэ операцием иветеранхэм, хэкIодагъэхэм яунагъохэм IэпыIэгъу ятыгъэным тынаIэ нахь лъэшэу джыри тедгъэтыщт», — къыIуагъ КъумпIыл Мурат.

Къэралыгъо фондэу «Хэгъэгум иухъумакIохэр» зыфиIоу Урысыем и Президент кIэщакIо зыфэхъугъэм икъутамэ Адыгеим Iоф щишIэу зэрэригъэжьагъэм хэушъхьафыкIыгъэу ар къыщыуцугъ. Дзэ операцием хэлэжьэрэ унагъо пэпчъ, хэкIодагъэхэм яунагъохэри зэрахэтэу, социальнэ IофышIэ фэгъэзагъэу щыт.

Республикэм и ЛIышъхьэ къэгущыIэ зэхъум къащыуцугъ социальнэ IэпыIэгъум иинфраструктурэ игъэкIэжьын епхыгъэ Iофыгъохэм. ГущыIэм пае, илъэсэу къихьащтым республикэ унэ-интернатэу зыныбжь хэкIотагъэхэмрэ сэкъатныгъэ зиIэхэмрэ зыщаIыгъхэрэм «Активное долголетие» зыфиIорэ отделениеу нэбгырэ 250-рэм телъытагъэм ишIын аухыщт. Мыщ къыхэлажьэх мысатыушIэ секторымрэ гуфакIохэмрэ.

Социальнэ учреждениехэм яIофышIэхэм, общественнэ организациехэм ахэтхэм ыкIи Адыгеим ис цIыф гукIэгъухэу шIушIэ хьылъэхэм якъэугъоин хэлажьэхэрэм, сэкъатхэм ыкIи гъот макIэ зиIэхэм IэпыIэгъу язытыхэрэм зэрафэразэр КъумпIыл Мурат къыхигъэщыгъ.

«IэпыIэгъу язытырэ нэбгырэ пэпчъ сыфэраз. ТапэкIэ джыри дгъэцэкIэнэу бэ къэтыр. Сицыхьэ телъ зэкIэ къулыкъухэм ыкIи ведомствэхэм япшъэрылъхэр зэрифэшъуашэу тапэкIи зэрагъэцэкIэщтхэм», — къыIуагъ республикэм и ЛIышъхьэ.

Адыгеим исоциальнэ IофышIэхэм джащ фэдэу къафэгушIуагъэх АР-м и Къэралыгъо Совет — Хасэм и Тхьаматэ игуадзэу Цэй Эдуардрэ АР-м IофшIэнымрэ социальнэ хэхъоныгъэмрэкIэ иминистрэу Мырзэ Джанбэчрэ.

Мы Iофтхьабзэм джащ фэдэу щафэгушIуагъэх социальнэ лъэныкъомкIэ Iоф зышIэхэу анахь дэгъоу зипшъэрылъхэр зыгъэцакIэхэрэм. Адыгеим и ЛIышъхьэу КъумпIыл Мурат щытхъуцIэу «АР-м цIыфхэр социальнэу ухъумэгъэнхэмкIэ изаслуженнэ IофышI» зыфиIорэр къэзыушыхьатырэ тхылъыр аритыжьыгъ социальнэ фэIо-фашIэхэм ягъэцэкIэнкIэ Красногвардейскэ гупчэм ипащэ игуадзэу Даунэ Фатимэ, АР-м IофшIэнымрэ социальнэ хэхъоныгъэмрэкIэ и Министерствэ иотдел иконсультантэу Светлана Токаревам. Адыгэ Республикэм IофшIэнымрэ социальнэ хэхъоныгъэмрэкIэ и Министерствэ икъэбар-правовой отдел ипащэу Шъынэхъо Иринэ щытхъуцIэу «АР-м изаслуженнэ юрист» зыфиIорэр къыфагъэшъошагъ.

Социальнэ учреждениехэм яIофышIэ заулэхэм АР-м и ЛIышъхьэ ирэзэныгъэ тхылъхэр, АР-м и Къэралыгъо Совет —Хасэм ищытхъу ыкIи ирэзэныгъэ тхылъхэр, джащ фэдэу АР-м IофшIэнымрэ социальнэ хэхъоныгъэмрэкIэ и Министерствэ ищытхъу тхылъхэр аратыжьыгъэх.