Адыгеим и ЛIышъхьэ ыуплъэкIугъ

Адыгеим и ЛIышъхьэу КъумпIыл Мурат фэтэрыбэу зэхэт унэхэу Мыекъуапэ дэтхэм энергиер ащыкIэугъоегъэным тегъэпсыхьэгъэ программэр зэрагъэцакIэрэр ыуплъэкIугъ. Программэр зытегъэпсыхьагъэр фэтэрыбэу зэхэт унэхэм арысхэм ящыIэкIэ-псэукIэ зыкъегъэIэтыгъэныр, ахэм яIыгъын пкIэу лъатырэр къегъэIыхыгъэныр ары.

Адыгэ Республикэм и ЛIышъхьэу КъумпIыл Муратрэ псэупIэ-коммунальнэ хъызмэтым зэхъокIыныгъэхэр фэшIыгъэнхэм дэлэжьэрэ Фондым игенеральнэ пащэу Константин Цицинымрэ зэдашIыгъэ зэзэгъыныгъэм диштэу зигугъу къэтшIыгъэ Фондым имылъку IэпыIэгъу хэлъэу программэм къыдыхэлъытэгъэ Iофтхьабзэхэр агъэцакIэх.

МыекъуапэкIэ фэтэрыбэу зэхэт унитIу, Мыекъопэ, Тэхъутэмыкъое районхэмкIэ ащ фэдэ унэ зырыз зэрагъэцэкIэжьыщтхэм уасэу тефэрэм щыщ шъолъыр операторым къыфырагъэгъэзэжьынэу ащ къыделъытэ. Фэтэрыбэу зэхэт унэхэу зигугъу къэтшIыгъэхэм фабэу аIэкIагъахьэрэр зэрауплъэкIущт автоматизированнэ узелхэр, зэдагъэфедэрэ чIыпIэхэр зэрагъэнэфырэр автоматическэу зыуплъэкIущт пкъыгъохэр ахагъэуцощтых, унэ гупэхэр агъэкIэжьыщтых, шъхьаныгъупчъэхэр зэблахъущтых. Ащ ишIуагъэкIэ мыщ фэдэ унэхэм ащыпсэухэрэм коммунальнэ фэIо-фашIэхэм апае пкIэу атырэр процент 20 — 25-кIэ нахь къеIыхынэу мэгугъэх.

Адыгэ Республикэм и ЛIышъхьэ ащ фэдэ Iофтхьабзэхэр Мыекъуапэ зэрэщызэрахьэрэр ыуплъэкIугъ. Мыекъуапэ имэрэу Геннадий Митрофановыр, АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэ иапэрэ гуадзэу Лафышъэ Рэмэзан ащ игъусагъэх.

Фэтэрыбэу зэхэт унэу урамэу Пионерскэм, 415/2-м тетыр игъэкIотыгъэу агъэцэкIэжьыгъ, ыгупэрэ ышъхьэрэ агъэкIэ-жьыгъ, шъхьаныгъупчъэхэр зэблахъугъэх, фабэу агъэкIодырэр къэзылъытэрэ пкъыгъо хагъэуцуагъ.

Фэтэрыбэу зэхэт унэу Юннатхэм яурам, 2Ж-м тетым гъэцэкIэжьын IофшIэнхэр рашIылIэхэ зэхъум энергиер кIэзыугъоерэ технологиехэр щагъэфедагъэх. Лифтымрэ инженер системэхэмрэ зэрэзэблахъугъэм нэмыкIэу, унэ гупэри, унашъхьэри агъэцэкIэжьыгъэх, фабэу агъэфедэрэр къэзылъытэрэ автоматическэ узел хагъэуцуагъ.

Республикэм ипащэ Iофэу ашIагъэхэм защигъэгъозагъ, агъэкIэжьыгъэ унэхэм арысхэм адэгущыIагъ. УплъэкIунхэм ауж КъумпIыл Мурат къалэм иадминистрациерэ министерствэ гъэнэфагъэмрэ пшъэрылъ афишIыгъ фабэм пае цIыфхэм пкIэу атырэр зэхъокIыгъэмэ зэрагъэшIэнэу. Республикэм ипащэ джащ фэдэу урамэу Пионерскэм, 415/2-м тет унэу фэтэрыбэу зэхэтым ищагу зэтегъэпсыхьэгъэнымкIэ рахъухьэгъэ IофшIэнхэр нахь агъэпсынкIэнэу афигъэпытагъ.

«Фэтэрыбэу зэхэт унэхэм ягъэцэкIэжьын, ящагухэм язэтегъэпсыхьан икъоу дегупшысэнхэ, лъэныкъо пстэури къыдалъытэзэ ахэр дэгъоу зэшIуахын фае. Унэхэм ащыпсэухэрэм ямылъку къызфагъэфедэзэ, IофшIэнхэр агъэцакIэх. Джащ пае ахэм яшIошIхэр къыдалъытэнэу щыт. ЗэхъокIыныгъэшIухэр зэрэщыIэхэрэр цIыфхэм зэхашIэн фае», — къыIуагъ АР-м и ЛIышъхьэ.