Iофтхьабзэр гъэшIэгъонэу кIуагъэ

Урысыем и Мафэ фэгъэхьыгъэ Iофтхьэбзэ зэфэшъхьафхэр Адыгеим щызэхащагъэх. Ахэм зыкIэ ащыщ республикэм икъэлэ шъхьаIэ кушъхьэфачъэмкIэ фестивалэу щы­кIуагъэр.

Республикэм ирайонхэм къа­рыкIыгъэ цIыфыбэ ащ щызэIу­кIагъ. Ощх къещхыщтыгъ нахь мышIэми, нэбгырэ мини 2 фэ­диз ащ хэлэжьагъ.

Урысыем и Мафэ епхыгъэ мы Iофтхьабзэм хэлэжьэнэу къэкIуагъ Адыгеим и ЛIышъхьэу КъумпIыл Мурат. Джащ фэдэу АР-м иминистрэхэм я Кабинет и Тхьаматэу КIэрэщэ Анзаур, АР-м физическэ культурэмкIэ ыкIи спортымкIэ и Комитет итхьаматэу Дэгужъые Мурат, партиеу «Единэ Россием» и Шъолъыр гъэцэкIэкIо комитет ипащэу АфэшIэгъо Рэмэзан, хабзэм икъулыкъухэм ялIыкIо­хэр, организациехэм ыкIи предприятиехэм, общественнэ объединениехэм, спортым пылъхэм ыкIи нэмыкI купхэм ялIыкIохэр мы Iофтхьабзэм хэлэжьагъэх.

Урысыем и Мафэ ихэгъэунэфыкIын хэлажьэ зышIоигъохэр зэкIэ Зэкъошныгъэм игупчэ пчэдыжьым къыщызэрэугъои­гъэх. ЗэкIэми мэфэкI гуетыныгъэ-чэфыныгъэ ахэлъыгъ. Мы чIыпIэм щагъэуцугъэх сатыушIыпIэ цIыкIухэу спортым епхыгъэ пкъыгъохэр, шхыныгъохэр зыщащэщтыгъэхэр, джащ фэдэу кIэлэцIыкIухэм яуахътэ чэфэу зыщагъэкIон алъэкIыщт шъо­лъырхэр ыкIи нэмыкIыбэр.

Зэнэкъокъухэм ахэлэжьэщтхэм республикэм и ЛIышъхьэ гущыIэгъу афэхъугъ, гъогоу къа­чъыщтым изэпычын псынкIэ къафэхъунэу ыкIи гъэхъагъэхэр ашIынхэу афэлъэIуагъ.

«МэфэкIышхом пае зэкIэми сышъуфэгушIо! Урысыем и Мафэ, хэбзэ шIагъо зэрэтфэхъу­гъэу, кушъхьэфачъэмкIэ фестиваль зэхэтэщэ. Къещхы нахь мышIэми, мыщ цIыф бэдэдэ къыщызэрэугъоигъ — анахь цIыкIухэм къащыублагъэу зыныбжь хэкIотагъэхэм анэсы­жьэу. ЗэкIэри чэфых, къапыщылъ Iофтхьабзэм агу къеIэты. Сицыхьэ телъ мыщ фэдэ Iоф­тхьабзэхэм мэфэкI гуетыныгъэм нэмыкIэу цIыфхэр зэрэзэрипхы­хэрэм, зэрэзэкъуигъэуцохэрэм, джащ фэдэу щыIэкIэ-псэукIэ тэрэзым нахь зэрэфищэхэрэм. ЗэкIэми сышъуфэлъаIо гъэхъагъэ шъушIынэу, псауныгъэ шъуи­Iэнэу, текIоныгъэр псынкIэу къы­дэтхынэу. Ар къызэрэдэтхыщтым техъырэхъышэрэп!», — къыIуагъ КъумпIыл Мурат.

Хабзэ зэрэхъугъэу, респуб­ликэм и ЛIышъхьэ къызэпэчъэщт­хэр къызщызэрэугъоигъэхэ чIыпIэм къыIухьагъ. Урамхэу Пионерскэмрэ Майкопскэмрэ зыщызэуалIэхэрэм дэжь чъэныр щырагъэжьагъ. ПстэумкIи гъогум километрэ 21-рэ икIыхьагъэр. Урамхэу Пионерскэм, Победэм, Пролетарскэм, М. Горькэм ыцIэкIэ щытым ахэр къащызэпэчъагъэх. КIэлэцIыкIухэм апае Зэкъошныгъэм игупчэ чIыпIэ щагъэнэфагъ.

Кушъхьэфэчъэ фестивалым икIэуххэм ялъытыгъэу лъэныкъуищкIэ тынхэр афагъэшъошагъэх. Анахь ныбжьышхо зиIэу мыщ хэлэжьагъэр Александр Цой (ащ илъэс 81-рэ ыныбжь), анахь ныбжьыкIэхэр илъэсищ зыныбжь Мэрэтыкъо Салимрэ Мирон Масловымрэ, анахь спор­тивнэ унагъокIэ алъытагъэр Шуркохэм яунагъу: а унагъом щыщ нэбгырих къызэпэчъэным хэлэжьагъ.

АР-м физическэ культурэмкIэ ыкIи спортымкIэ и Комитет, партиеу «Единэ Россием» и Адыгэ республикэ къутамэ, Адыгэ Республикэм кушъхьэ­фэчъэ спортымкIэ и Федерацие а Iофтхьабзэр зэхащагъ.