ЛIыхъужъыр ащыгъупшэщтэп

Адыгэ Республикэм иправительствэ зычIэт Унэм Адыгеим и ЛIышъхьэу КъумпIыл Мурат 2022-рэ илъэсым шышъхьэIум хэушъхьафы­кIыгъэ дзэ операциер зыщыкIорэ шъолъырым щыфэхыгъэ майорэу Вадим Лемеш янэу Татьяна Лемеш (Боярских) щыIукIагъ.

Урысыем и Президентэу Владимир Путиным пшъэрылъ къызэрэфишIыгъэм тетэу дзэ­къулыкъушIэу хэкIодагъэр Урысыем и ЛIыхъужъ зэрэхъугъэр къэзыушыхьатырэ жъуагъоу щымыIэжьым къыфагъэшъошагъэр янэ ратыжьыгъ.

Мы Iофтхьабзэм джащ фэдэу хэлэжьагъэх хэкIодэгъэ дзэкъу­лыкъушIэм ишъхьэгъусэу Елена Бронниковар, ыкъоу Владимир Лемеш, ышэу Александр Лемеш ыкIи игъусэгъэ къулыкъушIэхэр.

Адыгеим и ЛIышъхьэ Вадим Лемеш игупсэхэмрэ къыпэблагъэхэмрэ зафэтхьаусыхэ нэ­ужым къызэрэхигъэщыгъэмкIэ, лIыхъужъныгъэу ащ зэрихьа­гъэр Урысыем итарихъ егъэшIэрэу хэхьагъ, Хэгъэгум иухъумакIо­хэм ялIэуж ныбжьыкIэхэм щысэшIу ар афэхъущт.

ИIахьыл гупсэхэм къаIуагъ яунагъохэм анаIэ къызэратырагъэтырэм ыкIи Вадим Лемеш лIыхъужъныгъэу зэрихьагъэр ащымыгъупшэнымкIэ Iофтхьабзэу зэрахьэхэрэм апае респуб­ликэм ипащэ зэрэфэразэхэр.

Офицерыр Мариуполь, Камышевахэ, Попаснэм ыкIи нэмыкI псэупIэхэм яшъхьафитыныгъэ фэгъэхьыгъэ заохэу кIуагъэхэм чанэу ахэлэжьагъ. Марьинкэ дэжь щыкIогъэ заом шышъхьэIум и 6-м ар щыфэхыгъ. ХэушъхьафыкIыгъэ дзэ операцием илъэ­хъан ипшъэрылъхэр дэгъоу зэригъэцэкIагъэхэм пае я 102-рэ полкым ия 2-рэ батальон икомандирэу майорэу Вадим Лемеш Урысыем и ЛIыхъужъыцIэ фагъэ­шъошэнэу къагъэлъэгъуагъ. Къулыкъур зыщихьыгъэ лъэхъаным ащ къыфагъэшъошагъэх ЛIыхъужъныгъэм иорденрэ медалэу «За отвагу» зыфиIо­рэмрэ. Ахэр ишъхьэгъусэрэ ыкъорэ аратыжьыгъэх.

Вадим Лемеш 1987-рэ илъэсым Новосибирскэ къыщыхъугъ, Новосибирскэ апшъэрэ команднэ училищыр къыухыгъ, Темыр- Кавказ ыкIи Къыблэ дзэ койхэм IэнэтIэ зэфэшъхьафхэр ащиIыгъыгъэх. Разведвзводым ипэщагъ, ащ нэужым Къыблэ дзэ коим ия 49-рэ дзэ ишхончэо взвод пэщэныгъэ дызэрихьагъ. Я 150-рэ мотострелковэ дивизием ия 102-рэ мотострелковэ полк имотострелковэ батальон ипэщэ IэнатIэ ыIыгъыгъ. 2020-рэ илъэсым Сирием къулыкъу щихьыгъ, 2022-рэ илъэсым — Донбасс, хэушъхьафыкIыгъэ дзэ операциер зыщыкIорэ шъо­лъырым.

Шъхьэгъусэ иI, къуитIу — Владимиррэ Максимрэ ыпIугъэх. Ишъхьэгъусэрэ икIа­лэхэмрэ Мыекъуапэ щэпсэух, янэрэ ышрэ Новосибирскэ дэсых.

ДзэкъулыкъушIэхэм ащыщ горэм къыIотэжьыгъ Вадим Лемеш ежь хэкIодэн зэрилъэ­кIыщтым емыгупшысэу къызэригъэнэжьыгъагъэр. Джащ фэ­дэу зэIукIэгъум илъэхъан къулыкъур дэзыхьыгъэхэр якомандир фэгъэхьыгъэ гукъэкIы­жьы­бэхэмкIэ къадэгощагъэх. Ар ныбджэгъу шъыпкъэу зэрэщытыгъэр къаIуагъ. Новосибирскэ апшъэрэ команднэ училищым илIыкIохэм къызэрэхагъэщы­гъэм­кIэ, апшъэрэ еджапIэм Щытхъум иаллееу иIэм ащ ыцIэрэ илIыхъужъныгъэрэ ащымыгъупшэнэу чIыпIэ къыщыфыхагъэкIыщт. КъумпIыл Мурат зэIукIэгъум илъэхъан джыри зэ къыхигъэщыгъ республикэм ихэбзэ къулыкъухэм дзэкъулыкъушIэу хэкIодагъэм иунагъорэ игупсэхэмрэ ренэу IэпыIэгъу зэрафэхъущтхэр.