Зэдэлэжьэныгъэм иIофыгъохэр

Херсон хэкум экономикэ хэхъоныгъэмкIэ и Министерствэрэ Адыгэ Республикэм экономикэ хэхъоныгъэмкIэ ыкIи сатыумкIэ и Министерствэрэ шъолъыритIум ясоциальнэ-экономикэ хэхъоныгъэ ылъэныкъокIэ бгъуитIуми шIуагъэ къафэзыхьыщт зэдэлэжьэныгъэм Форумым щыкIэтхагъэх.

АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Зауррэ Херсон хэкум экономикэ хэхъоныгъэмкIэ иминистрэ ипшъэрылъхэр зыгъэцэкIэрэ Константин Костинымрэ аIапэ тхылъым кIадзэжьыгъ.

Лъэныкъохэм къызэрэхагъэщыгъэмкIэ, шъолъыритIум экономикэмкIэ язэпхыныгъэхэм, джащ фэдэу учреждениехэмрэ организациехэмрэ язэдэлэжьэныгъэ зягъэушъомбгъугъэным пае амалышIу­хэр къэзытыщт лъэныкъохэм хэхъоныгъэ ягъэшIыгъэн, бгъуитIуми федэ къафэзыхьыщт кооперациер зэхэщэгъэн фае.

Меморандумым къызэрэдилъытэрэм тетэу Адыгеимрэ Херсон хэкумрэ ялIыкIохэм мыщ фэдэ лъэныкъо шъхьаIэхэм: специалистхэр зыхэтыщтхэ IофышIэ купхэр, зэIукIэгъухэр, конференциехэр, семинархэр, симпозиумхэр зэхэщэгъэнхэм, ушэтын лъэныкъохэмкIэ программэхэр ыкIи проектхэр зэхэгъэуцогъэнхэм, къэбарымкIэ зэхъожьынхэм, Херсон хэкумрэ Адыгэ Республикэмрэ ясоциальнэ-экономикэ хэхъоныгъэ зыкъегъэ­этыгъэным, шъолъыритIумэ япредприятиехэм язэпхыныгъэ гъэпытэгъэным анаIэ атырагъэтыщт.

Адыгеим и ЛIышъхьэу КъумпIыл Мурат зэрилъытэрэмкIэ, хэгъэгум ишъо­лъырыкIэхэм гъусэныгъэ-зэдэлэжьэныгъэ зэдыряIэным мэхьэнэ гъэнэфагъэ иIэу щыт, ахэр зыпкъ игъэуцожьыгъэнхэмкIэ ыкIи хэхъоныгъэ ашIынымкIэ ящыкIэгъэ IэпыIэгъур аIэкIигъэхьаным республикэр фэхьазыр. ТапэкIи зэрэщытыгъэм фэдэу лъэшэу тынаIэ тедгъэтыщт Херсон хэкум и Геничекэ район. Адыгеим и ЛIышъхьэ ренэу а Iофыгъохэм ынаIэ атырегъэты, Iофхэм язытет нахь щыгъуазэ хъуным пае Геническэ районым кIозэ ешIы.

Шъугу къэтэгъэкIыжьы: шъолъыритIумэ язэдэлэжьэныгъэкIэ Адыгеим и ЛIышъхьэу КъумпIыл Мурат Херсон хэкум игубернатор ипшъэрылъхэр зыгъэцэкIэрэ Владимир Сальдо, джащ фэдэу Херсон хэкум и Правительствэ итхьаматэу Андрей Алексеенкэм тапэкIэ зэIукIэгъу­хэр задыреIэхэм а Iофыгъохэм атегущыIэгъагъэх. Республикэм щыпсэухэрэм яIэпыIэгъу пае Адыгеим и ЛIышъхьэ рэзэныгъэ гущыIэхэр ахэм къыраIуа­гъэх. Ежь КъумпIыл Мурат къызэрэхигъэщыгъэмкIэ, хэгъэгум ишъолъырыкIэ нахь зыпкъ иуцонымкIэ, хэхъоныгъэ ышIынымкIэ ищыкIэгъэ IэпыIэгъур респуб­ликэм IэкIигъэхьащт.

«Илъэсэу икIыгъэм Геническэ районыр зыпкъ игъэуцожьыгъэнымкIэ Iофы­шхо зэшIотхыгъ. ТапэкIи тизэдэлэжьэныгъэ зедгъэушъомбгъущт, Урысые Федерацием и Президентэу Владимир Путиным Херсон хэкум IэпыIэгъу етыгъэнымкIэ пшъэрылъэу къыгъэуцугъэхэр гъэцэкIагъэ хъун­хэм пае амалэу тиIэр зэкIэ дгъэфедэщт. Партиеу «Единэ Россиер» тигъусэу лъэныкъо зэфэшъхьафхэмкIэ Iофтхьабзэхэр зэшIотэхых: еджапIэхэм, кIэлэцIыкIу IыгъыпIэхэм тадеIэ, унэу ыкIи инфраструктурэу зэхэкъутагъэхэр зыпкъ итэгъэуцожьых, кIэлэцIыкIу IыгъыпIэхэр тэшIых, санитарием ишапхъэхэр укъуагъэ мыхъунхэм тынаIэ тетэгъэты. Районым щыIакIэу илъыр тIэкIу-тIэкIузэ зыпкъ иуцожьыным, цIыфхэу ащ щыпсэухэрэм IэпыIэгъу тызэрафэхъурэр нахь зэхашIэным пае тфэлъэкIыщтыр зэкIэ тшIэщт», — къыхигъэщыгъ АР-м и ЛIышъхьэ.

Адыгеим ихэбзэ къулыкъушIэхэм яIэпыIэгъу хэлъэу Геническэ районым общественнэ чIыпIэхэр зыпкъ щыра­гъэуцожьых, цIыфхэм япсауныгъэ зыща­гъэпытэщт, пшъэрылъыбэ зэшIозыхыщт гупчэхэр къыщызэIуахых, гурыт еджапIэу N 1-м игъэкIотыгъэ гъэцэкIэжьын рашIы­лIагъ.