Республикэм иэкономикэ хэпшIыкIэу зыкъыригъэIэтыщт

Адыгеим иэкономикэ тапэкIи хэхъоныгъэ ышIыным пае Адыгеим инвестиционнэ проектышхо заулэ щагъэцэкIэщт. Ахэм анахь шъхьаIэхэм зыкIэ ащыщ Тэхъутэмыкъое районым промышленнэ паркэу «Инэм» зыфиIоу къыщызэIуахыщтым ипроект. Ащ амалышIухэр къытыщтых. Джыри зы промышленнэ шъолъырэу «ПсэкъупсэкIэ» зэджагъэхэм игъэпсын иамал республикэм щыхэплъэх.

Адыгэ Республикэм иминистрэхэм я Кабинетрэ Инвестиционнэ холдингэу АVА Grоuр инвестиционнэ зэзэгъыныгъэ ащкIэ зэдашIыгъ ыкIи Петербург щыкIорэ дунэе экономическэ форумым ащ щыкIэтхэжьыгъэх. Адыгэ Республикэм и ЛIышъхьэу КъумпIыл Муратрэ АVА Grоuр и Президентэу Ваган Арутюнянрэ аIапэ а тхылъым кIадзэжьыгъ.

«Джырэ лъэхъаным индустриальнэ шъолъырхэм яшIын гугъапIэ къэзытырэ лъэныкъохэм ащыщ ыкIи хэгъэгум ипромышленность ихэхъоныгъэкIэ зишIогъэшхо къэкIощт, производствакIэхэр щыIэ хъунхэм иамал къэзытыщт Iофэу щыт. Тэхъутэмыкъое районым промышленнэ паркэу «Инэмыр» щыгъэпсыгъэнымкIэ Iофышхо зэшIотхыгъ, Адыгеим ипроект шъхьа­Iэхэм ар зыкIэ ащыщ. ТапэкIи а Iоф­шIэным зедгъэушъомбгъущт, джащ фэдэу зигугъу къэтшIыгъэ Инвестиционнэ холдингыр тигъусэу зы промышленнэ парк джыри дгъэпсыщт. Респуб­ликэм иэкономикэ тапэкIи хэхъоныгъэ ышIынымкIэ, IофшIэпIэ чIыпIакIэхэр бэу щыIэ хъунхэмкIэ а проектхэм яшIуа­гъэ къызэрэкIощтым сицыхьэ телъ», — къы­Iуагъ Адыгеим и ЛIышъхьэ.

Промышленнэ паркым иконцепциеу аухэсыгъэм къызэригъэлъагъорэмкIэ, псэолъэшIыным фытегъэпсыхьэгъэ предприятиехэр ары мыщкIэ резидент хъущт­хэр. Промышленнэ паркым игъэпсын пае къутырэу Псэкъупсэ итемыр-къохьэпIэ лъэныкъокIэ гъэзэгъэ чIыгу гектар 32,9-рэ къыхагъэкIыгъ. Ваган Арутюнян къызэриIуагъэмкIэ, илъэс заулэкIэ предприятии 3 ащ щагъэпсынэу мэгугъэх — газ блокхэр, шъхьаныгъупчъэ блыпкъ­хэр, гъучI конструкциехэр а заводхэм къыдагъэкIыщтых. Псэуалъэхэм яIофшIэн заублэкIэ, IофшIэпIэ чIыпIакIэу 335-рэ щыIэ хъущт.

Джырэ шапхъэхэм адиштэу зэкIэ псэуалъэхэм акIоцIхэр зэтырагъэпсыхьащтых. Материалхэу ящыкIагъэхэр къызIэкIагъэхьанхэм пае логистикэм ылъэ­ныкъокIэ тырагъэкIуадэрэр хэпшIыкIэу нахь макIэ хъунымкIэ, продукциер къы­зэрафекIурэм къыкIегъэчыгъэнымкIэ а псэолъакIэу къызэIуахыщтхэм яшIогъэшхо къэкIощт. «Промышленнэ паркым анахь шIуагъэу пылъхэм ащыщых чIыпIэ­хэмрэ инфраструктурэмрэ икъоу къызэ­рэдалъытагъэхэр, производствэхэр зыдэщытыщтхэ чIыпIэхэр зэрагъэхьазырыгъэхэр. Урысыем ежь иеу производствэхэр сыд фэдэрэ лъэныкъомкIи иIэнхэм ишIогъэшхо къэкIощт, сыда пIомэ ежь итовархэр къыдигъэкIынхэмкIэ, IофшIэпIэ чIыпIакIэхэр иIэ хъунхэмкIэ, экономикэм зиушъомбгъунымкIэ а пстэуми яшIуагъэ къызэрэкIощтым сицыхьэ телъ. Джащ тетэу продукциер цIыфхэм къызIэкIагъэхьаным иIоф нахь Iэрыфэгъу хъунымкIэ, логистикэм епхыгъэ Iофтхьабзэхэр нахь шIэхэу зэпыгъэ­фэгъэнхэмкIэ тимурадхэм амал дэгъу къатыщт», — къыхигъэщыгъ АVА Grоuр и Президентэу Ваган Арутюнян.

Инвестиционнэ проектыкIэхэр пхырыщыгъэнхэмкIэ промышленнэ паркэу агъэпсыхэрэм амалышхохэр къызэратыщтхэр Адыгеим и ЛIышъхьэ къыхигъэщыгъ ыкIи республикэм иэкономикэ тапэкIи нахь зыкъыIэтынымкIэ, Iоф­шIэпIэ чIыпIакIэхэр бэу щыIэ хъунхэмкIэ промышленнэ паркхэм яIофшIэн бэкIэ узэрэщыгугъын плъэкIыщтыр къы­­Iуагъ.