Гурыт еджапIэхэм ягъэцэкIэжьын

Адыгеим и ЛIышъхьэу КъумпIыл Мурат Мыекъуапэ игурыт еджапIэхэм ащыщ гъэцэкIэжьын IофшIэнхэр зэрэщыкIорэр ыуплъэкIугъ. Ащ игъусагъэх АР-м гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцакIэу Евгений Лебедевыр, АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэ игуадзэу Лафышъ Рэмэзан, муниципальнэ образованиеу «Къалэу Мыекъуапэ» ипащэу Геннадий Митрофановыр, гурыт еджапIэм иадминистрацие, подряднэ организацием, гъэIорышIэкIо компанием ялIыкIохэр.

Шъугу къэтэгъэкIыжьы Урысыем и Президентэу Владимир Путиным къызыдыригъэштэгъэ программэм къыдыхэлъытагъэу Урысые политическэ партиеу «Единэ Россиер» кIэщакIо зэрэфэхъугъэм тетэу гурыт еджапIэхэм ягъэцэкIэжьын тегъэпсыхьэгъэ программэр тихэгъэгу зэрэщагъэцакIэрэр.

ГъэрекIо Адыгеим игурыт еджэпIи 9-мэ гъэцэкIэжьын IофшIэнхэр арашIылIагъэх, мыгъэ еджэпIи 7 агъэцэк1эжьы. Илъэси 3-м къыкIоцI республикэм игурыт еджэпIэ 62-мэ гъэцэкIэжьын игъэкIотыгъэхэр яшIылIэгъэнхэмкIэ лъэIу тхылъхэр федеральнэ гупчэм IэкIагъэхьагъэх. Мыгъэ Мыекъуапэ дэт гурыт еджапIэхэр ары нахьыбэу агъэцэкIэжьыщтхэр. ГущыIэм пае, къэлэ гурыт еджапIэхэу N 3-м, 20-м, 23-м, лицееу N 8-м гъэцэкIэжьын IофшIэнхэр джырэк1э ащэкIох. КъумпIыл Мурат лицееу N 2-м гъэцэкIэжьын IофшIэнхэр зэрэщык1охэрэм тыгъуасэ нэIуасэ зыфишIыгъ. ГъэрекIо спорт джэгупIэ мыщ щагъэпсыгъ, мыгъэ унэм гъэцэкIэжьын IофшIэнхэр рашIылIэх. Лицееу N 8-у Женя Поповым ыцIэ зыхьырэм ипащэу Эмма Осерскаям Адыгеим и ЛIышъхьэ IэпыIэгъу къызэраритырэм фэшI зэрэфэразэр риIуагъ. Гурыт еджапIэм ипащэ къызэрэхигъэщыгъэмкIэ, загъэпсыгъэм къыщегъэжьагъэу еджапIэм зыкIи гъэцэкIэжьынышхохэр рашIылIэгъагъэхэп. Лицеим иинженер коммуникациехэр, ипчъэ, ишъхьаныгъупчъэ блыпкъхэр зэкIэ зэблахъущтых. Джащ фэдэу ыкIоцIкIи, ыкIыбкIи ар агъэдэхэщт. IофшIэнхэм япроцент 85-р агъэцэкIэгъах.

Адыгеим и ЛIышъхьэ пшъэрылъ афишIыгъ гурыт еджапIэхэм ягъэцэкIэжьынкIэ псэолъэпхъэ дэгъухэр, къэбар технологие пэрытхэр къызфагъэфедэнэу, гурыт еджапIэхэу IофшIэкIэ амал дэгъухэр зиIэхэм яопыт зэрагъэшIэнэу ыкIи къызфагъэфедэнэу. Лицеим ищагу изэтегъэпсыхьанкIэ, чъыг-къэгъагъхэмрэ ащ щыгъэтIысхьэгъэнхэмкIэ, остыгъэхэр щыгъэуцугъэнхэмкIэ, пионер лIыхъужъэу Женя Поповым исаугъэт къыпэIулъ чIыпIэм изэтегъэпсыхьанкIэ пшъэрылъ гъэнэфагъэхэр республикэм ипащэ афишIыгъэх.

«ГъэцэкIэжьын IофшIэнхэр зэрашIылIэщт гурыт еджапIэхэу программэм хагъэхьагъэхэр илъэсыкIэм ехъулIэу хьазырынхэ фае. ГъэцэкIэжьынхэм яшIуагъэкIэ гурыт еджапIэхэм теплъакIэ яIэ, еджэныр ахэм гъэхъагъэ хэлъэу ащызэхэщагъэ хъущт. Къэралыгъо программэм иамалхэр нахь шIуагъэ къытэу къызфэдгъэфедэн фае», - къыIуагъ КъумпIыл Мурат.

ГъэсэныгъэмкIэ гупчэу N 5-у Абдзэхэхьаблэ дэтым, къутырэу Чернышевым игурыт еджапIэу N 8-м, къутырэу Тихоновым дэт гурыт еджапIэу N 9-м гъэцэкIэжьын IофшIэнхэр джыдэдэм ащэкIох.

Гъэсэныгъэ языгъэгъотырэ организациехэм гъэцэкIэжьын IофшIэнхэр игъом ащаухынхэу, амалыкIэхэр яIэу Iоныгъом и 1-м еджэныр ахэм ащарагъэжьэжьынэу Адыгеим и ЛIышъхьэ пшъэрылъ афишIыгъ.