Пшъэрылъ афишIыгъ

ЗыгъэпсэфыпIэу «Лэгъонакъэ» ипроект Адыгеим зэрэщагъэцэкIэщтым епхыгъэ IофыгъохэмкIэ зэIукIэу непэ щыIагъэр Адыгэ Республикэм и ЛIышъхьэу КъумпIыл Мурат зэрищагъ.

Ащ хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, республикэм ихэбзэ къулыкъухэм, инвестиционнэ компаниехэм, псэолъэшI организациехэм ялIыкIохэр.

ЗыгъэпсэфыпIэм иинфраструктурэ зэрагъэпсыщтым мыщ щытегущыIагъэх, апэрэ чэзыум ипроект иэскиз къащыхалъхьагъ. Шъугу къэтэгъэкIыжьы пстэумкIи зыгъэпсэфыпIэм гектар 63,81-рэ зэрэзэлъиубытыщтыр. Апэрэ чэзыум къыдыхэлъытагъэу транспорт, инженер инфраструктурэр, ятIонэрэ чэзыум — хьакIэщ инфраструктурэр агъэпсынэу рахъухьэ. Ящэнэрэ чэзыум зыгъэпсэфыпIэм ишIын аухыщт.

АР-м и ЛIышъхьэ зэIукIэм зэрэщыхигъэунэфыкIыгъэмкIэ, зыгъэпсэфыпIэу «Лэгъонакъэр» федеральнэ мылъкушхо зыхалъхьэрэ проектэу щыт. Гъогу картэм диштэу пшъэрылъхэр зэрагъэцакIэхэрэм гъунэ лъафынэу, экологиемкIэ шапхъэхэр дэх имыIэу къыдалъытэнэу республикэм ипащэ пшъэрылъ афишIыгъ. КъумпIыл Мурат зэрилъытэрэмкIэ, ащ фэдэ екIолIакIэм ишIуагъэкIэ джырэ шапхъэхэм адиштэщт зыгъэпсэфыпIэм чIыопсым зэрар рихыщтэп.

«ЗыгъэпсэфыпIэу «Лэгъонакъэр» Адыгеим ичIыгу къыхеубытэ ыкIи тиреспубликэ ынапэу щытыщт. ФэIо-фашIэхэр егугъухэзэ мыщ щагъэцэкIэнхэу, итеплъэ дэхэ дэдэнэу тыфай. Джащ пае инвесторхэм тырягъусэу инфраструктурэм къыщегъэжьагъэу, архитектурэм нэсыжьэу Iофыгъо пстэуми тазэдыхэплъэн фае. Ащ иархитектурэ, лъэпкъ нэшанэу хэлъыщтхэм, тыкъэзыуцухьэрэ дунаим диштэным лъэшэу тынаIэ атедгъэтыщт. Типроект шъхьаIэ ипхырыщынкIэ сэри IэпыIэгъу тапэкIи язгъэгъотыщт, инвесторхэм ящыкIэгъэ амалхэр афызэхэтщэщтых», — къыIуагъ КъумпIыл Мурат.

Iахьзэхэлъ обществэу «Гъэхъунэ плъыжьым» игенеральнэ пащэ инвестициехэмкIэ ыкIи финансхэмкIэ игуадзэу Алексей Плахтеевым къызэриIуагъэмкIэ, апэрэ чэзыум телъытэгъэ чIыгу Iахьхэр агъэнэфагъэх. Номер 690-рэ зыхэтыщт хьакIэщ комплекси 4 агъэпсынэу рахъухьэ. ЛыжэкIэ къызыщачъыхьащт гъогу километрэ 25-рэ ыкIи кIапсэкIэ кIэшIэгъэ гъогуи 6 агъэпсынэу щыт.

Ащ нэмыкIэу зыгъэпсэфыпIэм чъыгхэр, къэгъагъэхэр щагъэтIысхьащтых, спа-гупчэ, кIэлэцIыкIухэм апае джэгупIэхэр, зыгъэпсэфыпIэ чIыпIэхэр щагъэпсыщтых. Охътэ гъэнэфагъэкIэ (прокатэу) пкъыгъохэр къызыщаIахын алъэкIыщт чIыпIэхэр, автомобиль уцупIэхэр, административнэ, хъызмэт псэуалъэхэр мыщ щагъэпсыщтых. Ахэр зыхашIыкIыщт пкъыгъохэр экологическэу къабзэу щытынхэм мэхьанэ яI.

ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Мантера-Групп» зыфиIорэм игенеральнэ пащэ игуадзэу Валерий Жуковым зэIукIэм къызэрэщиIуагъэмкIэ, 2025 — 2026-рэ илъэсхэм лыжэкIэ къызыщачъыхьан алъэкIыщт гъогухэмрэ хьакIэщ номер 690-рэ агъэпсыщтых. Адыгеим къыщыдагъэкIырэ пкъыгъохэр псэолъэшIынымкIэ агъэфедэщтых, республикэм испециалистхэр ары нахьыбэрэмкIэ ахэм ахэлэжьэщтхэр.

КIэрэщэ Анзаур зэIукIэм къызэрэщиIуагъэмкIэ, гъогу картэм диштэу инфраструктурэм ипсэуалъэхэу рахъухьэгъэ пстэури агъэпсых. Автомобиль гъогоу Дахъорэ Лэгъо-Накъэрэ зэзыпхыхэрэр зэрагъэцэкIэжьыщтым дакIоу газрыкIуапIи, псыр зэраIэкIагъэхьащт, зэрэIуащыщт псэуалъэхэр, электрорыкIуапIэхэр агъэпсынхэу рахъухьэ. 2022-рэ илъэсым къыщегъэжьагъэу Урысыем псэолъэшIынымкIэ и Министерствэ электроэнергиер аIэкIэзыгъэхьэрэ сетьхэм апышIэгъэнхэмкIэ IэпыIэгъу къафэхъу.

Шъугу къэдгъэкIыжьын зыгъэпсэфыпIэу «Лэгъонакъэр» зыщагъэпсыщт чIыпIэр ЮНЕСКО-м идунэе кIэн зэрэхэмыхьэрэр, республикэм ичIыопс баиныгъэ къаухъумэзэ, псэолъэшIын IофшIэнхэр зэрэзэхащэхэрэр. Капитальнэ псэолъэшIыпIэхэр Лэгъо-Накъэ ишъолъыр къыхиубытэхэрэп. Ар афэгъэхьыгъэп кIапсэкIэ кIэшIэгъэ, лыжэкIэ къызыщачъыхьащт гъогухэм.

АР-м и ЛIышъхьэ зэIукIэм икIэух къызэрэщыхигъэщыгъэмкIэ, зекIоным имызакъоу, республикэм иэкономики зэрэщытэу зыгъэпсэфыпIэм хэхъоныгъэ аригъэшIыщт. IофшIэпIэ чIыпIакIэхэр щыIэ хъущтых, псэолъэшIынми, нэмыкI лъэныкъохэми нахь заушъомбгъущт, хэбзэIахьэу бюджетхэм арыхьэрэри нахьыбэ хъущт.