Къэралыгъо тынхэр афагъэшъошагъэх

Росгвардием АдыгеимкIэ и ГъэIорышIапIэ идзэкъулыкъушIэхэу, иIофышIэхэу щытхъу пылъэу зипшъэрылъ зыгъэцакIэхэрэм къэралыгъо тынхэр къазэрафагъэшъошагъэхэм фэгъэхьыгъэ Iофтхьабзэ АР-м и Правительствэ зычIэт унэм непэ щыкIуагъ. Адыгеим и ЛIышъхьэу КъумпIыл Мурат тынхэр ахэм аритыжьыгъ.

Iофтхьабзэм джащ фэдэу хэлэжьагъэх АР-м и Апшъэрэ хьыкум и Тхьаматэу Шумэн Байзэт, федеральнэ инспектор шъхьаIэу Сергей Дрокиныр, Росгвардием АР-мкIэ и ГъэIорышIапIэ ипащэу Олег Якушевыр, АР-м и Къэралыгъо Совет — Хасэм и Тхьаматэ игуадзэу, Урысыем и ЛIыхъужъэу Цэй Эдуард.

Республикэм ипащэ Росгвардием АР-мкIэ и ГъэIорышIапIэ иIофышIэхэу тынхэр къызфагъэшъошагъэхэм афэгушIуагъ.

«Росгвардием иIофышIэхэм хэушъхьафыкIыгъэ дзэ операцием щызэшIуахырэ анахь Iоф къинхэр афагъазэ. Ащ хэтхэм сыд фэдэрэ пшъэрылъи дэгъоу агъэцакIэ. Апшъэрэ главнокомандующым къышъуфишIыгъэ пшъэрылъхэр гъэхъагъэ хэлъэу жъугъэцэкIагъэх, тихэгъэгу ифедэхэмрэ ишъхьафитыныгъэрэ къэжъугъэгъунэхэзэ, шъолъырыкIэхэм арысхэр къэшъуухъумэхэзэ, лIыхъужъныгъэрэ псэемыблэжьныгъэрэ къызхэжъугъэфагъ. Шъори, хэушъхьафыкIыгъэ дзэ операцием хэлэжьэрэ тидзэкIолIхэу зэрифэшъуашэм тетэу зипшъэрылъ зыгъэцакIэхэрэми, лъэшэу тышъуфэраз. ДзэкIолI пэпчъ тырэгушхо. ТидзэкIолIхэми, ахэм яунагъохэм арысхэми зэрэтфэлъэкIэу тапэкIи IэпыIэгъу тафэхъущт. Анахьэу мэхьанэ зэттырэ лъэныкъохэм ар ащыщ», — къыIуагъ КъумпIыл Мурат.

ДзэкъулыкъушIэхэмрэ ахэм яунагъохэм арысхэмрэ IэпыIэгъу ягъэгъотыгъэнымкIэ Iофтхьэбзабэ Адыгеим щызэрахьэ. Муниципалитетхэм куп гъэнэфагъэхэр ащызэхащагъэх, хэушъхьафыкIыгъэ дзэ операцием хэлажьэрэм иунагъо социальнэ IофышIэ рапхыгъ. Къэралыгъо фондэу «Хэгъэгум иухъумакIохэр» зыфиIорэм икъутамэ чанэу Iоф ешIэ. Ащ пшъэрылъэу иIэр хэушъхьафыкIыгъэ дзэ операцием иветеранхэм, 2014-рэ илъэсым къыщегъэжьагъэу Донбасс щыкIогъэ заохэм ахэлэжьагъэхэм, ахэм яунагъохэм, фэхыгъэ дзэкъулыкъушIэхэм яунагъохэм IэпыIэгъу афэхъугъэныр ары. ХэушъхьафыкIыгъэ дзэ операцием хэлэжьэрэ дзэкIолIхэми, тынаIэ зытедгъэтынэу къытфагъэзэгъэ дзэ частьхэу Адыгеим щыIэхэми ящыкIэгъэ IэпыIэгъур ягъэгъотыгъэным партиеу «Единэ Россиеми» иIахь хешIыхьэ. Мыщ фэдэ Iофыгъохэм республикэм и ЛIышъхьэ ышъхьэкIэ ынаIэ атырегъэты.

Адыгеим и ЛIышъхьэ Росгвардием иIофышIэ анахь хъупхъэхэм орденэу «Хэгъэгум ыпашъхьэ гъэхъагъэхэр зэрэщыриIэхэм фэшI» зыфиIоу я II-рэ шъуашэ зиIэм имедаль, медалэу «За отвагу» зыфиIорэр, Суворовым имедаль Iофтхьабзэм щаритыжьыгъэх.