Советым изэхэсыгъу

Цифрэ технологиехэм республикэм щатехьэгъэным епхыгъэ IофыгъохэмкIэ Советым изэхэсыгъо АР-м и Правительствэ зычIэт унэм непэ щыкIуагъ. Республикэм иэкономикэ, социальнэ лъэныкъор, къэралыгъо гъэIорышIэныр цифровизацие зэрашIыщтхэм япхыгъэ Iофыгъохэм мыщ щатегущыIагъэх.

Адыгеим и ЛIышъхьэу КъумпIыл Мурат пшъэрылъ зэрэфишIыгъэм тетэу АР-м иминистрэхэм я Кабинет и Тхьаматэу КIэрэщэ Анзаур зэхэсыгъор зэрищагъ. АР-м иминистрэхэм я Кабинет хэтхэр, хабзэм иреспубликэ, имуниципальнэ къулыкъухэм япащэхэр Iофтхьабзэм хэлэжьагъэх.
АР-м информационнэ, телекоммуникационнэ технологиехэмкIэ иминистрэу Шыу Заурбек къызэритыгъэмкIэ, «цифровая зрелость» зыфиIорэ лъэныкъомкIэ 2022-рэ илъэсым республикэм планыр проценти 134-кIэ ыгъэцэкIагъ. Республикэм иэкономикэрэ исоциальнэ лъэныкъорэ цифрэ амалхэр нахьыбэу ащыгъэфедэгъэнхэм тегъэпсыхьэгъэ унэшъо заулэ аштагъ.

Къэралыгъо фэIо-фашIэхэм язэхэщэн­кIэ цифровизациер гъэлъэшыгъэным тегъэпсыхьагъэуи пшъэрылъ заулэ афашIыгъ. АР-м информационнэ, телеком­муникационнэ технологиехэмкIэ иминистрэ иапэрэ гуадзэу Михаил Семенцовым зэхэсыгъом къызэрэщиIуагъэм­кIэ, 2023-рэ илъэсым иапэрэ кIэлъэныкъо электрон фэIо-фашIэу агъэцэкIа­гъэр процент 37-рэ хъугъэ, къэзытхырэр АР-м и ЛIышъхьэ ипресс-къулыкъу.

МуниципалитетхэмкIэ пэрытныгъэ зыIыгъыр Джэджэ районыр, къулыкъухэм­кIэ — АР-м мылъку зэфыщытыкIэхэмкIэ и Комитет ары.

АР-м иминистрэхэм я Кабинет и Тхьаматэ къулыкъухэмрэ муниципалитетхэмрэ пшъэрылъ афишIыгъ электрон шIыкIэкIэ фэIо-фашIэхэр гъэцэкIэгъэнхэм нахь псынкIэу техьанхэу. МыщкIэ ана­хьэу мэхьанэ зиIэр фэIо-фашIэхэр зэрагъэцакIэхэрэм цIыфхэр егъэразэхэмэ е емыгъэразэхэмэ зэгъэшIэгъэныр ары.

«Лъэныкъо пстэухэмкIи зэхъокIыныгъэшIухэр тэлъэгъух. Планхэр зэрагъэцэкIэщтхэм щэч хэлъэп. Ау Iофхэр Iэпэдэлэл ашIы хъущтэп. Лъэныкъо пстэуми цифрэ шапхъэхэр къащызфагъэфедэнэу амал щыIэн фае. Зыныбжь хэкIотэгъэ цIыфхэм электрон фэIо-фашIэ­хэр аIэ къырагъэхьанхэмкIэ IэпыIэгъу а­­фэхъугъэныр ищыкIагъ.
Цифровизацием цIыфхэм ящыIэкIэ-псэукIэ нахь зыкъыригъэ­Iэтыщт, къэралыгъо фэIо-фашIэхэм ягъэцэкIэн нахь Iэрыфэгъу хъущт. Шапхъэу щыIэхэм адиштэу яIофшIэн нэфэгъэ икъу хэ­лъэу зэхащэн фае», — къыIуагъ КIэрэщэ Анзаур.

ГъэцэкIэкIо хэбзэ къулыкъухэмрэ чIыпIэ зыгъэIорышIэжьынымкIэ къулыкъухэмрэ зэхэсыгъом пшъэрылъ щафашIыгъ социальнэ мэхьанэ зиIэ фэIо-фашIэхэм ягъэцэкIэнкIэ пIалъэхэр амыукъонхэм нахь пхъашэу гъунэ лъафынэу, электрон фэIо-фашIэхэм ягъэцэкIэнкIэ информационнэ IофшIэнэу зэшIуахырэр нахь агъэлъэшынэу.