ПаркитIумэ язэтегъэпсыхьанкIэ пшъэрылъхэр

Адыгэ Республикэм иминистерствэхэмрэ имуниципалитетхэмрэ япащэхэм язэIукIэ къэлэ цIыкIухэм яя VIII-рэ Урысые зэнэкъокъу кIэухэу фэхъугъэхэм афэгъэхьыгъэу Адыгеим и ЛIышъхьэу КъумпIыл Мурат къыщыфаIотагъ.

АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэ иапэрэ гуадзэу Лафышъ Рэмэзан зэIукIэм къызэрэщиIуагъэмкIэ, Мыекъуапэ ипаркэу «Мэздахэмрэ» Адыгэкъалэ ипаркэу Лениным ыцIэ зыхьырэмрэ язэтегъэпсыхьанкIэ лъэIу тхылъхэр зэнэкъокъум щыпхырыкIыгъэх. 2024-рэ илъэсым имэлылъфэгъу къыщыублагъэу итыгъэгъазэ нэс проектхэр гъэцэкIэгъэнхэ фае.

КъумпIыл Мурат мы министерствэм пшъэрылъ фишIыгъ проект-сметэ документхэм ягъэхьазырынрэ проектхэм мылъкоу апэIухьащтымрэ гъунэ алъифынэу.

«МыекъуапэкIи, АдыгэкъалэкIи къыхахыгъэ паркхэм мэхьанэшхо яI. Типроектхэр Урысыем псэолъэшIынымкIэ и Министерствэ щыпхырыкIынхэмкIэ ищыкIэгъэ шапхъэхэр къыдэтлъытэнхэ, ипIалъэм ахэр дэгъоу дгъэцэкIэнхэ фае. Республикэм илъэгъупхъэ чIыпIэ ахэр хъунхэм, Адыгеим щыпсэухэрэмкIи, ихьакIэхэмкIи кIуапIэу щытынхэм зэрэтфэлъэкIэу ткIуачIэ етхьылIэн фае», — къыIуагъ Адыгеим и ЛIышъхьэ.

Нэужым зэIукIэм хэлажьэхэрэр лъэпкъ проектхэмрэ къэралыгъо программэхэмрэ къазэращыдэлъытагъэм диштэу республикэм ищагухэмрэ иобщественнэ чIыпIэхэмрэ зэрэзэтырагъэпсыхьащтхэм атегущыIагъэх.

Адыгеим псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ и Министерствэ къызэритыгъэмкIэ, проектэу «Джырэ шапхъэхэм адиштэу къалэр зэтегъэпсыхьэгъэныр» зыфиIорэм пае мыгъэ сомэ миллион 359-м ехъу къатIупщыгъ. А мылъкумкIэ щагу 31-рэ, общественнэ чIыпIи 10 зэтырагъэпсыхьащт. Федеральнэ мылъкум ипроцент 66-р къызфагъэфедэгъах. Непэрэ мафэм ехъулIэу общественнэ чIыпIи 8-мэ, щагу 30-мэ язэтегъэпсыхьан аухыгъ.

2024-рэ илъэсым общественнэ чIыпIэ 12-рэ щагу 30-рэ нахь зэтырагъэпсыхьанхэу рахъухьэ. Ащ пае сомэ миллиони 155-м ехъу къыхагъэкIыщт. ПсэупIэу зэтырагъэпсыхьэхэрэм адэс цIыфхэм яшIошIхэр къыдэлъытэгъэн зэрэфаер КъумпIыл Мурат къыхигъэщыгъ.