Республикэм федеральнэ мылъку къыфыхагъэкIыгъ

Урысые Федерацием и Правительственнэ комиссиеу шъолъырхэм яхэхъоныгъэ фэгъэзагъэм и Президиум (иштаб) адыригъэштагъ Адыгэ Республикэм 2023-рэ илъэсым хэушъхьафыкIыгъэ кредит гъэнэфагъэ къыфыхэгъэкIыгъэнымкIэ игъоу алъэгъугъэхэм. А чIыфэу сомэ миллиард 1,4-рэ фэдиз хъурэр игъэкIотыгъэ псэолъэшIыным пэIуагъэхьащт.

Мы ахъщэм щыщэу сомэ миллион 450-р мыекъопэ рекреационнэ шъолъырым ихэхъоныгъэ, миллион 994-рэ фэдиз хъурэр республикэм икъушъхьэлъэ чIыпIэхэм ягъогу инфраструктурэ пэIуагъэхьащт. Ащ фэгъэхьыгъэу къыIуагъ Адыгеим ыцIэкIэ Къэралыгъо Думэм идепутатэу, бюджетымкIэ ыкIи хэбзэIахьхэмкIэ Къэралыгъо Думэм икомитет хэтэу Владислав Резник.

Шъугу къэтэгъэкIыжьы: Урысые Федерацием и Президентэу Владимир Путиныр зыкIэтхэжьыгъэ федеральнэ хэбзэгъэуцугъэм шъолъырхэм амал ареты социальнэ-экономикэ лъэныкъомкIэ шIогъэшхо къэзытын зылъэкIыщт инфраструктурнэ проектхэм апэIухьащт хэушъхьафыкIыгъэ чIыфэр къызIэкIагъэхьанэу.

Федеральнэ IэпыIэгъум ишIуагъэкIэ республикэм социальнэ мэхьанэ зиIэ проектхэр щызэшIуахыщтых, Адыгеим зекIохэм нахь анаIэ къытырадзэнымкIэ, мыщ щыпсэухэрэм ящыIакIи нахьышIу шIыгъэнымкIэ ащ ишIуагъэ къэкIощт.

Сомэ миллион 450-р бассейным иигъэкIотыгъэ гъэцэкIэжьын пэIуагъэхьащт. ЕвропэмкIэ узщесын плъэкIыщт шъхьэихыгъэ бассейн анахь инэу ар алъытэ (икIыхьагъэ метрэ 450-м ехъу, ишъомбгъуагъэ метрэ 35-м къыщыублагъэу 80-м нэсы, пстэумкIи квадрат метрэ 30822-рэ фэдиз зэрэхъурэр). Ренэу ащ зызгъэпсэфхэрэр къакIощтыгъэх, ау техническэ лъэныкъомкIэ бгъэфедэжьын умылъэкIынэу зэрэхъугъэм къыхэкIэу зэфашIыжьыгъагъ. Адыгеим ипащэхэр ащ игъэкIэжьынкIэ пшъэрылъхэм язэшIохын епхыгъэ Iофтхьабзэхэм атегущыIэхэ зэхъум, зыгъэпсэфыпIэ къэлэ паркым инэпкъхэм язэтегъэпсыхьан ылъэныкъокIэ Iофыгъоу къэуцугъэхэри къыдалъытагъэх. Мы Iофыгъом изэшIохынкIэ Урысые Федерацием и Правительствэ и Тхьаматэу Михаил Мишустиным, ащ игуадзэхэу Марат Хуснуллинымрэ Дмитрий Чернышенкэмрэ, джащ фэдэу УФ-м псэолъэшIынымкIэ и Министерствэ ипащэхэм республикэм къыдырагъэштагъ. Джащ тетэу Адыгеим изаявкэ пхыращыгъ. Мылъкур къызаIэкIахьэкIэ ыкIи Iофтхьабзэу мыщ епхыгъэхэм язэшIохын заухыкIэ бассейным иигъэкIотыгъэ гъэцэкIэжьын рагъэжьэщт. Ащ пае проект-сметэ документациер ыпэрапшIэу агъэхьазырыгъагъ, къэралыгъо экспертизэми ышIыгъэ зэфэхьысыжьымкIэ ар игъоу алъэгъугъ.

ГъэцэкIэжьыным илъэхъан зэкIэ инженер коммуникациехэр зэблахъущтых, джырэ уахътэм диштэрэ материал пытэхэмкIэ бассейным ычIэ агъэчъыщт. Джащ фэдэу зэтырагъэпсыхьащтхэм ахэхьэх дэкIоепIэ-ехыпIэхэм ягъэкIэжьын, амфитеатрэм ишIын, гъогухэм ягъэпкIэн, чIыпIэхэр къэгъэнэфыгъэнхэр, чъыг-къэгъагъэхэм ягъэтIысхьан, хэкIитэкъупIэхэр гъэуцугъэнхэр, зызщатIэкIыщт ыкIи зызщафэпэжьыщт чIыпIэхэр къыдэлъытэгъэнхэр.

«Ащ дакIоу шъолъырэу «Мэздахэм» игъэпсын тыдэлэжьэщт, бассейныр, нэпкъыр, гъэкIэжьыгъэ къэлэ паркыр зэхэтхэу зы рекреационнэ комплекс зыкI хъущтых. Республикэм щыпсэухэрэми, зекIо къакIохэрэми анаIэ зытырадзэрэ, зэкIолIэхэрэ чIыпIэу ар щытыщт», — къыIуагъ Адыгеим и ЛIышъхьэу КъумпIыл Мурат.