Хэгъэгум фэшъыпкъэх

Адыгеим къыщыхъугъэхэу Мыекъопэ реактивнэ дивизионым хэтхэр хэушъхьафыкIыгъэ дзэ операцием непэ ежьагъэх.

АдыгеимкIэ ащ фэдэ чIыпIэм щыкIорэ заом хэлэжьэнхэу кIуагъэхэм ятIонэрэ подразделениеу ар щыт. ТапэкIэ Советскэ Союзым и ЛIыхъужъэу Андырхъое Хъусен ыцIэкIэ щыт артиллерийскэ дивизион зэхащэгъагъ. Непи а зэолIхэм япшъэрылъ агъэцакIэ.

Адыгеим и ЛIышъхьэу КъумпIыл Мурат ыцIэкIэ дзэ къулыкъушIэхэм шIуфэс къарихыгъ АР-м и Къэралыгъо Совет —Хасэм и Тхьаматэу Владимир Нарожнэм.

Къэзэрэугъоигъэхэм закъыфигъазэзэ Владимир Нарожнэм къыIуагъ республикэм икIыгъэ дзэ къулыкъушIэхэм апашъхьэ ит пшъэрылъхэр дэгъоу зэрагъэцэкIэщтхэм ицыхьэ зэрателъыр.

«Непэ шъоры хэгъэгур анахь зыщыгугъырэр: шъо шъуипшъэрылъхэр зэрэжъугъэцэкIэщтхэм елъытыгъэщт Адыгеими Урысыеми янеущ зыфэдэщтыр. Шъузэкъоуцу, шъузэдеIэжь, мы лъэхъаным ахэм мэхьанэшхо яIэу щыт», — къыIуагъ АР-м и Къэралыгъо Совет — Хасэм и Тхьаматэ.

Командованием къызэритыгъэмкIэ, зэзэгъыныгъэу адашIыгъэм тетэу хэушъхьафыкIыгъэ дзэ операцием хэлэжьэнхэу ежьагъэхэм ухьазырыныгъэ дэгъу яI, подразделением ищыкIагъэр зэкIэ IэкIэлъ. Республикэм ипащэхэм, муниципалитетхэм яIэшъхьэтетхэм, политическэ партиеу «Единэ Россием» и Адыгэ шъолъыр къутамэ, бизнес-сообществэм, республикэм щыпсэухэрэм яIэпыIэгъу дэгъоу ахэм зэхашIагъ.

Мы Iофтхьабзэм хэлэжьагъэх АР-м и Къэралыгъо Совет —Хасэм и Тхьаматэ игуадзэу, Урысыем и ЛIыхъужъэу Цэй Эдуард, генерал-майорэу Александр Дорофеевыр, АР-м иветеранхэм я Совет итхьаматэу Къоджэ Аслъан, партиеу «Единэ Россием» и Адыгэ шъолъыр къутамэ игъэцэкIэкIо комитет ипащэу АфэшIэгъо Рэмэзан, Адыгэ Республикэмрэ Краснодар краимрэ арыс быслъымэнхэм я ДиндэлэжьапIэ ыкIи Свято-Троицкэ кафедральнэ чылысым ялIыкIохэр. Дзэ къулыкъушIэхэм закъыфагъазэзэ ахэм къаIуагъ япшъэрылъ лъапIэ дэгъоу агъэцэкIэнэу, Урысыем ифедэхэм якъэухъумэнкIэ зыпари къызтырамыгъэнэнэу, лIыхъужъныгъэ ахэлъэу, зэкъотхэу, текIоныгъэр къыдахыгъэу къагъэзэжьынэу.

Iофтхьабзэм илъэхъан Адыгэ Республикэм ибыракъ артиллерийскэ бригадэм къыратыгъ. ИкIэухым хэушъхьафыкIыгъэ дзэ операцием хэлэжьэнхэу ежьагъэхэм машинэхэри къаратыгъэх.

Мыекъопэ реактивнэ дивизионым хэтхэм республикэм ихэбзэ къулыкъухэм IэпыIэгъоу къаратырэм пае зэрафэразэхэр къыхагъэщыгъ. Офицерхэу хэушъхьафыкIыгъэ дзэ операцием ежьагъэхэм ащыщ горэм ипшъэшъэжъые ышIыгъэ сурэтыр КъумпIыл Мурат къыритыгъ.

Республикэм и ЛIышъхьэ къызэрэхигъэщыгъэмкIэ, хэбзэ къулыкъухэм партиеу «Единэ Россиер», общественнэ организациехэр ыкIи патриот движениехэр ягъусэхэу дзэ къулыкъушIэхэм IэпыIэгъу араты, ящыкIагъэхэмкIэ адеIэх.