Фестивалым изэхэщэн

Адыгэ къуаем ифестиваль изыфэгъэхьазырын фэгъэзэгъэ зэхэщэкIо комитетым зэхэсыгъо иIагъ.

Адыгэ Республикэм и ЛIышъхьэу КъумпIыл Мурат пшъэрылъ зэрэфишIыгъэм тетэу Iофтхьабзэр зэрищагъ АР-м мэкъу-мэщымкIэ иминистрэу Къуанэ Анзаур.

Шъугу къэтэгъэкIыжьы: 2023-рэ илъэсым Iоныгъом и 16 — 17-м фестивалыр зэхащэщт. Ар зыщыкIогъагъэр ары джыри зыщыкIощтыр: Мыекъопэ районымкIэ Дахъо игъэхъун. Республикэм и ЛIышъхьэ фестивалым изэхэщэн пшъэдэкIыжь хэлъэу екIолIэнхэу пшъэрылъ афишIыгъ: программэ гъэшIэгъоным къыщегъэжьагъэу ермэлыкъ зэфэшъхьафхэм язэхэщэн, адыгэ къуаем иIэшIугъэ иуплъэкIун, мэфэкIыр щынэгъончъэу рекIокIыным ыкIи автомобильхэр зыщагъэуцущтхэ чIыпIэм анэсыжьэу зэкIэри къыдалъытэн фае.

Адыгеим и ЛIышъхьэ пшъэрылъ афишIыгъ фестивалым чIыпIэу ыубытыщтым зэкIэ ищыкIагъэр рагъэолIэнэу. Къуанэ Анзаур къызэрэхигъэщыгъэмкIэ, гъэхъунэр шъолъыр-шъолъырэу гощыгъэщт: муниципальнэ щагухэм апае чIыпIэ гъэнэфагъэ яIэщт, къуае къэзышIыхэрэм, сатыушIэхэм ыкIи цIыфхэм ягъэшхэн фэгъэзэгъэщтхэм апаий чIыпIэ къыхагъэкIыщт. Щэтыр пчъагъэу агъэIэщтыри нахьыбэ ашIыщт фэе пстэури лъэпкъ шхыныгъохэм ахэIэнхэм пае. Ащ нэмыкIэу лъэпкъ художественнэ Iэпэщысэхэр къагъэлъэгъощтых, мастер-классхэр бэу зэхащэщтых, творческэ мастерскойхэри мыщ щыIэщтых. Iофтхьабзэм мэфэкI нэшанэ къаратыщт лъэпкъ псэолъэ зэфэшъхьафхэм, щагухэм, баннерхэм, адыгэ хьакIэщхэм афэдэу зэтырагъэпсыхьащт унэхэм.

Фестивалым республикэм ихудожественнэ коллективхэм концерт къызщатыщт чIыпIэ гъэнэфагъэ иIэщт. Мыщ зэнэкъокъу зэфэшъхьафхэр щызэхащэщтых, атекIохэрэм шIухьафтынхэр аратыщтых, лъэпкъ шъуашэхэр къыщагъэлъэгъощтых.

АР-м культурэмкIэ иминистрэу Аулъэ Юрэ къызэриIуагъэмкIэ, фестивалыр театрализованнэ къэгъэлъэгъонкIэ рагъэжьэщт, нэужым Адыгеим и ЛIышъхьэу КъумпIыл Мурат хэлажьэзэ ар къызэIуахыщт.

ЗэренэгуехэрэмкIэ, фестивалым хьэкIабэ хэлэжьэщт. Адыгеим къэмыкIошъущтхэр онлайн шIыкIэм тетэу фестивалым еплъышъущтых.

Фестивалым ипрограммэ гъэшIэгъон зэкIэми амал аритыщт Адыгеим щыпсэурэ цIыф лъэпкъ зэфэшъхьафхэм якультурэ бай, ялъэпкъ шэн-хабзэхэм нэIуасэ зафашIынымкIэ. ХьакIэхэм зэрагъэлъэгъун алъэкIыщт къуаер зэрэрахырэ шIыкIэр, джащ фэдэу зышIоигъохэми ащ иIэшIугъэ ауплъэкIушъущт. Щагу пэпчъ адыгэ къуаем иихынкIэ, хьалыжъохэр ыкIи ижъырэ шIыкIэм тетэу къуаер агъэфедэзэ нэмыкI лъэпкъ шхыныгъохэр зэрашIыщтыгъэхэм епхыгъэу зэнэкъокъухэр ащызэхащэн алъэкIыщт. Ащ нэужым анахь дэгъухэр лъэныкъуи 4-кIэ къыхахыщтых. Iофтхьабзэр адыгэ джэгукIэ ыкIи мэшIоустхъукIэ аухыщт.

ЗэIукIэм илъэхъан зэхэщэкIо комитетым хэтхэр Iофыгъоу къапыщылъхэм атегущыIагъэх, Iоныгъом и 1-м нэс программэр зэхэгъэуцуагъэ хъущт. Джащ фэдэу цIыфхэр щынэгъончъэу мэфэкIым хэлэжьэнхэмкIэ, машIом зыкъымыштэнымкIэ, нэмыкI Iофыгъоу зэшIохыгъэн фаеу къапыщылъхэм атегущыIагъэх.