Илъэсым иунагъу

Урысые зэнэкъокъоу «Илъэсым иунагъу» зыфиIорэм текIоныгъэр къыщыдэзыхыгъэхэмрэ ащ хэлэжьагъэхэмрэ зыщафэгушIогъэхэ Iофтхьабзэ Адыгэ Республикэм и Правительствэ и Унэ непэ щыкIуагъ.

Адыгеим и ЛIышъхьэу КъумпIыл Мурат пшъэрылъ къызэрэфишIыгъэм тетэу Iофтхьабзэр зэрищагъ АР-м IофшIэнымрэ социальнэ хэхъоныгъэмрэкIэ иминистрэу Мырзэ Джанбэч.

Iофтхьабзэм къекIолIагъэхэм закъыфигъазэзэ министрэм зэрэхигъэунэфыкIыгъэмкIэ, мыщ фэдэ унэгъо зэгурыIожьхэм, унэгъо пытэхэм лъытэныгъэшхо къалэжьыгъ.

«ЗэкIэми шъузэзыпхырэр IофшIэным гуетыныгъэ зэрэфышъуиIэр, унагъом мэхьанэу ыкIи шIуагъэу иIэр къызэрэжъугурыIорэр, шъхьэкIафэ зэрэзэфэшъушIыжьырэр, шэн-хабзэхэр зэрэжъугъэлъапIэхэрэр ары. Шъуилъфыгъэхэмрэ шъуипхъорэлъфхэмрэ япIун шъукIуачIэ хэшъолъхьэ, ахэм еджэнымкIэ, творчествэмкIэ, IофшIэнымкIэ гъэхъагъэу ашIыхэрэм шъуащэгушIукIы. Ащ дакIоу чанэу шъуиIофшIэни шъогъэцакIэ, общественнэ Iофтхьабзэхэри зэшIошъохых», — къыIуагъ Мырзэ Джанбэч.

АР-м IофшIэнымрэ социальнэ хэхъоныгъэмрэкIэ иминистрэ къызэрэхигъэщыгъэмкIэ, унагъом IэпыIэгъу етыгъэным Урысыем лъэшэу анаIэ щытырагъэты. Президентыр кIэщакIо зыфэхъугъэ Iофтхьабзэхэу, къэралыгъо программэхэу ыкIи лъэпкъ проектхэу непэ республикэми хэгъэгуми ащагъэцакIэхэрэр зыфытегъэпсыхьагъэхэр унагъом щыIакIэу илъыр нахьышIу шIыгъэныр, кIэлэцIыкIухэм япIункIэ амал дэгъухэр ягъэгъотыгъэнхэр, ныбжьыкIэхэр щыIэныгъэм игъогу пытэу теуцонхэр ары.

«Федеральнэ гупчэм иIэпыIэгъу къызфэдгъэфедэзэ, Адыгеим цIыфхэм социальнэ IэпыIэгъу ятыгъэным нахь зыщетэгъэушъомбгъу, унагъохэм ящыIакIэ нахьышIу зэрэхъущтым ренэу тынаIэ тетэгъэты. ТапэкIи тигупсэ республикэ щыпсэурэ унагъохэм щыIэкIэ амалэу яIэхэр нахь дэгъу зэрэхъущтым тынаIэ тедгъэтыщт, унагъом тихэгъэгу мэхьанэу щыратырэр джыри нахь зэрэпытэщтым зэрэтфэлъэкIэу тыдэлэжьэщт. Джыри зэ сышъуфэгушIо зэнэкъокъум текIоныгъэу къыщыдэшъухыгъэм пае. Псауныгъэ пытэ, насып, щыIэкIэшIу шъуиIэнэу сышъуфэлъаIо. Шъуиунэхэм фэбагъэ арылъэу, гуIэтыпIэхэу щытынхэу, шъуикIэлэцIыкIухэм ягъэхъагъэхэмкIэ ренэу шъуагъэгушIонэу шъуфэсэIо», — къыIуагъ Мырзэ Джанбэч.

Ащ нэужым республикэмрэ Урысыемрэ текIоныгъэхэр къащыдэзыхыгъэхэм дипломхэмрэ шIухьафтынхэмрэ аратыжьыгъэх. Шъугу къэтэгъэкIыжьы: «Илъэсым иунагъу» зыфиIорэ зэнэкъокъур яенэрэу зэхащэ. КIэлэцIыкIухэу щыIэныгъэм чIыпIэ зэжъу щифагъэхэм IэпыIэгъу язытырэ Фондымрэ Урысые Федерацием IофшIэнымрэ цIыфхэр социальнэу ухъумэгъэнхэмрэкIэ и Министерствэрэ а Iофтхьабзэм изэхэщакIох.

Зэнэкъокъум ишъолъыр чэзыу унэгъо 38-рэ хэлэжьагъ. Федеральнэ лъэгапIэм республикэр лъэныкъо зэфэшъхьафхэмкIэ ахэм къыщагъэлъэгъуагъ. «Унэгъо дышъ» зыфиIорэмкIэ — Зыхьэ Заурбыйрэ Мэлайчэтрэ, къалэу Мыекъуапэ; «Къоджэ унагъу» — Бондаренко Александррэ Эсмирэрэ, Шэуджэн район; «Сабыибэ зэрыс унагъу» — Матыченко Александррэ Натальерэ, Джэджэ район; «Унэгъо ныбжьыкI» — Хъупэ Рустамрэ Зарэрэ, Кощхьэблэ район; «Шэн-хабзэхэм яухъумэкIо унагъу», — Тхьаркъохъо Тимуррэ Мариетрэ, Тэхъутэмыкъое район.

Тхьаркъуахъохэм яунагъо урысые зэнэкъокъоу «Илъэсым иунагъу» зыфиIорэм илъэныкъоу «Унагъор шэн-хабзэхэм яухъумакIу» зыфиIорэмкIэ текIоныгъэр къыдихыгъ. Тхьаркъохъо Тимуррэ Мариетрэ илъэсипшI хъугъэ унагъо зызэдашIагъэр, зы кIалэрэ пшъэшъищырэ апIу. Адыгэ культурэмрэ лъэпкъ шэн-хабзэхэмрэ зыпкъ игъэуцожьыгъэнхэм ыкIи хэхъоныгъэ ягъэшIыгъэным зэшъхьэгъусэхэр чанэу дэлажьэх. Тимур культурэм и Унэу къуаджэу Щынджые дэтым щэбзэ щэрыоныр ыкIи шым узэрэтесыщтыр арегъашIэ. Мариет лъэпкъ тхыпхъэхэр хэдыкIыгъэнхэм ыкIи лъэпкъ шъуашэхэр дыгъэнхэм кIэлэцIыкIухэр фегъасэх, ащи культурэм и Унэ Iоф щешIэ.