ГъэхъэгъэшIухэмкIэ пэгъокIыгъэх

Мэзым иIофышIэхэм я Мафэ фэгъэхьыгъэ Iофтхьабзэхэм къадыхэлъытагъэу Адыгеим и ЛIышъхьэу КъумпIыл Мурат пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Картонтарэм» щыIагъ.

Нафэу зэрэщытымкIэ, Урысыем и Къыблэ ицеллюлоз-тхылъыпIэшI отраслэ анахь гъэхъэгъэшхо щызышIыгъэхэм ар ащыщ.

Предприятием иIофышIэхэмрэ ахэм яунагъохэмрэ апае фирмэм иIэшъхьэтетхэм чIыпIэ стадионым концерт программэ гъэшIэгъон щызэхащэгъагъ ыкIи яIофышIэ анахь дэгъухэм щафэгушIуагъэх.

Мы Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур, «Картонтарэм» ипащэу Сергей Погодиныр, предприятием иветеранхэр ыкIи непэ ащ Iоф щызышIэхэрэр.

Предприятием пэщэныгъэ дызезыхьэхэрэмрэ Iоф щызышIэхэрэмрэ къафэгушIозэ Адыгеим и ЛIышъхьэ къызэрэхигъэщыгъэмкIэ, республикэм ипромышленнэ IофшIэпIэ шъхьаIэхэм ар зыкIэ ащыщ, социальнэ лъэныкъомкIи Iофтхьэбзабэ гъэхъагъэ хэлъэу мыщ щызэшIуахы.

«Шъо ренэу гъэхъэгъэ инхэм зафытешъогъэпсыхьэ, къулайныгъэ шъухэлъэу IофшIэкIакIэм иамалхэр шъогъэфедэх. Сыд фэдэ къиныгъохэм шъуяутэлIагъэми, зэрифэшъуашэу ахэр зэшIошъохых ыкIи нахь шъупсыхьагъэу гъэхъэгъакIэхэм шъуафэкIо», — къыIуагъ КъумпIыл Мурат.

Ащ къызэрэхигъэщыгъэмкIэ, Адыгеим ихэхъоныгъэ «Картонтарэм» иIахьышIу хешIыхьэ. Предприятием республикэм иэкономикэ зыкъыIэтыным чанэу хэлажьэ, социальнэ пшъэрылъхэр зэшIуехых, тыкъэзыуцухьэрэ дунаим ищынэгъончъагъэ иIофыгъохэм ренэу ынаIэ атырегъэты.

Республикэм и ЛIышъхьэ фирмэм ипащэхэм ыкIи Сергей Погодиным зэрафэразэр къыIуагъ культурэм, гъэсэныгъэм, общественнэ организациехэм ренэу IэпыIэгъу зэрафэхъухэрэм апае. Лъэпкъ къашъомкIэ къэралыгъо ансамблэу «Налмэсми» ренэу яшIуагъэ рагъэкIы.

Къэзэрэугъоигъэхэм шIуфэс гущыIэкIэ закъыфагъэзагъ АР-м и Къэралыгъо Совет – Хасэм и Тхьаматэу Владимир Нарожнэмрэ «Картонтарэм» ипащэу Сергей Погодинымрэ.

Предприятием иIофышIэ анахь дэгъухэм аратыжьыгъэх Адыгеим и ЛIышъхьэрэ АР-м и Къэралыгъо Совет – Хасэмрэ ярэзэныгъэ тхылъхэр, ахъщэ шIухьафтынхэр.

Шъугу къэтэгъэкIыжьы: «Картонтарэр» 1965-рэ илъэсым зэхащэгъагъ. 2007-рэ илъэсым къыщыублагъэу «СТФ групп» хэхьэрэ предприятиехэм якуп хэт. Производствэм игъэкIэжьын ренэу заводым щэкIо. 2021-рэ илъэсым комбинатым картон ыкIи тхылъыпIэ тонн мин 84-м ехъу къыдигъэкIыгъ. Предприятием игухэлъхэм ащыщ производствэм нахь зегъэушъомбгъугъэныр ыкIи илъэсым къыкIоцI продукцие тонн мин 300-м нэс къыдигъэкIыныр.