Язэдэлэжьэныгъэ агъэпытэщт

Адыгэ Республикэм и ЛIышъхьэу КъумпIыл Мурат Урысыем хэгъэгу кIоцI IофхэмкIэ и Министерствэ и Научнэ-ушэтэкIо институт ипащэ игуадзэу Сергей Невскэм, а институтым иструктурнэ подразделение иIэшъхьэтетэу Роман Черкасовым, АР-м хэгъэгу кIоцI IофхэмкIэ иминистрэу Олег Безсмельницыным АР-м и Правительствэ и Унэ непэ зэIукIэгъу щадыриIагъ. Зэдэлэжьэныгъэм илъэныкъохэм ахэр атегущыIагъэх.

ЗэIукIэгъум къызэрэщыхагъэщыгъэмкIэ, оперативнэ лъэныкъомкIэ республикэм зыпкъитыныгъэ илъ. Мыщ дэжьым АР-м и ЛIышъхьэ къыкIигъэтхъыгъ республикэм мамырныгъэмрэ зэгурыIоныгъэмрэ къыщыухъумэгъэнхэмкIэ, щынэгъончъагъэ ащ илъынымкIэ, хэбзэгъэуцугъэу щыIэр мыукъогъэнымкIэ зэдэлэжьэныгъэм мэхьанэшхо зэриIэр. Республикэм инвестициехэм ыкIи зекIоным алъэныкъокIэ анаIэ нахь къытырадзэнымкIи ащ бэ елъытыгъэр.

«Зэдэлэжьэныгъэм иамалэу щыIэхэм защыгъэгъозэгъэнымкIэ, Адыгэ Республикэм хабзэр щыгъэпытэгъэным тегъэпсыхьэгъэ шIыкIэхэр гъэфедэгъэнхэмкIэ тапэкIи МВД-м зэдэлэжьэныгъэ дытиIэным тифедэ хэлъ, — къыIуагъ КъумпIыл Мурат. – Социологие ушэтынхэм, къэралыгъо пшъэрылъ шъхьаIэхэм ягъэцэкIэнкIэ цIыфхэм яеплъыкIэ гъэунэфыгъэным афытегъэпсыхьэгъэ Iофтхьабзэхэу зэрахьэхэрэм якIэуххэм ягъэфедэн къэралыгъо пшъэрылъхэм язэшIохынкIэ мэхьанэшхо яI. Ушэтынэу непэ тшIыхэрэм якIэуххэм тынаIэ атетэу защыдгъэгъозэщт, ащ нэужым республикэм щыпсэухэрэм яфедэ зыхэлъ IофшIэнэу Министерствэм тыригъусэу зэшIотхыщтым зэхъокIыныгъэ гъэнэфагъэхэр фэтшIынхэм тыфэхьазыр».

Урысыем хэгъэгу кIоцI IофхэмкIэ и Министерствэ испециалистхэм тхьамафэм къыкIоцI общественнэ-политикэ ыкIи экономикэ лъэныкъомкIэ мониторинг республикэм щызэхащэщт, оперативнэ лъэныкъомкIэ Iофхэм язытет зыфэдэм зыщагъэгъозэщт, полицием иIофшIэн зэрэзэхэщагъэм цIыфхэм еплъыкIэу фыряIэр зэрагъэшIэщт, республикэм и МВД иструктурнэ подразделениехэм АР-м игъэцэкIэкIо ыкIи ихэбзэихъухьэ къулыкъухэм зэдэлэжьэныгъэу адыряIэм инэшэнэ хэушъхьафыкIыгъэхэм защагъэгъозэщт. Ащ пае республикэм IэнатIэхэр щызыIыгъхэм, общественнэ организациехэм, дин конфессиехэм, къэбар жъугъэм иамалхэм ялIыкIохэм зэIукIэгъухэр адыряIэщтых. Ащ нэмыкIэу муниципальнэ образованиехэм ащыпсэухэрэм яеплъыкIэхэр зэрагъэшIэнхэм пае упчIэхэу афагъэуцухэрэм къаратыжьырэ джэуапхэр зэрытыщт тхьапэхэм защагъэгъозэщт, АР-м хэгъэгу кIоцI IофхэмкIэ и Министерствэ хэтхэми яшIэныгъэхэм зэрахагъэхъощтым телъытэгъэ егъэджэнхэр зэхащэщтых. Ушэтыным гухэлъ шъхьаIэу иIэр общественнэ институтхэмрэ хэбзэухъумэкIо къулыкъухэмрэ язэдэлэжьэныгъэ изытет гъэунэфыгъэныр, цIыфхэм республикэм хэгъэгу кIоцI IофхэмкIэ икъулыкъухэм цыхьэу афашIырэм нахь зыкъыIэтынымкIэ игъоу алъэгъухэрэр алъыгъэIэсыгъэнхэр ары.