Адыгеир апэрэхэм ащыщ

Гъэстыныпхъэ шхъуантIэр джыри зынэмысыгъэхэм ягъэгъотыгъэнымкIэ программэм къыхиубытэу хэгъэгум ишъолъырхэу зэкIэмэ апэ социальнэ псэуалъэхэм газыр аIэкIагъахьэу зыщаублагъэхэм Адыгеир ащыщ хъугъэ.

Партиеу «Единэ Россиер» кIэщакIо зыфэхъугъэ программэу Урысые Федерацием и Президентэу Владимир Путиным зыдыригъэштагъэм ар ичэзыукI.

УФ-м и Президент пшъэрылъ къафишIыгъ программэм зырагъэушъомбгъунэу ыкIи псауныгъэм икъэухъумэн къыхиубытэрэ псэуалъэхэм пстэуми апэу газыр аIэкIагъэхьанэу.

А программэм тегъэпсыхьагъэу АдыгеимкIэ апэрэу газыр зыIэкIагъэхьагъэхэм ащыщ Мыекъопэ районымкIэ къутырэу Садовэм фельдшер-мамыку пунктэу дэтыр. Газыр аIэкIэгъэхьэгъэным фытегъэпсыхьэгъэ Iофтхьабзэу зэхащэгъагъэм республикэм и ЛIышъхьэу КъумпIыл Мурат пшъэрылъ зэрэфишIыгъэм тетэу хэлэжьагъ АР-м иминистрэхэм я Кабинет и Тхьаматэу КIэрэщэ Анзаур.

ГазрыкIуапIэм пышIэгъэнымкIэ партиеу «Единэ Россием» игупчэ офискIэ Iизын къязытыгъэхэр: УФ-м и Федеральнэ ЗэIукIэ ФедерациемкIэ и Совет и Тхьаматэ иапэрэ гуадзэу, партиеу «Единэ Россием» и Генеральнэ совет исекретарэу Андрей Турчак, Урысыем и ФАС ипащэу Максим Шаскольскэр, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром межрегионгаз» зыфиIорэм игенеральнэ пащэу Сергей Густовыр.

«2022-рэ илъэсым чъэпыогъум УФ-м и Президентэу Владимир Путиныр кIэщакIо фэхъугъагъ социальнэ псэуалъэхэм газыр аIэкIэгъэхьэгъэным нахь зырагъэушъомбгъуным, пстэуми апэу гъэсэныгъэмрэ псауныгъэм икъэухъумэнрэ къахиубытэрэ учреждениехэр. НепэкIэ хэгъэгум ишъолъырихмэ яапэрэ социальнэ псэуалъэхэм газыр анагъэсыгъ. Хэгъэгум и Президент ышIыгъэ унашъом ишIуагъэкIэ, социальнэ газификацием ипрограммэу «Единэ Россиер» кIэщакIо зыфэхъугъэр цIыф жъугъэхэм яе шъыпкъэу хъугъэ. Шъолъырхэм яхэпIэ мин 720-мэ газыр аращэлIэгъах», — къыIуагъ Андрей Турчак.

АдыгеимкIэ къутырэу Садовэм дэт фельдшер-мамыку IэзапIэм газыр IэкIэгъэхьэгъэнымкIэ техническэ амалхэр щыIэнхэм пае Iахьзэхэлъ обществэу «Газпром газораспределение Майкоп» зыфиIорэм икъулыкъухэм метрэ 25-рэ зикIыхьэгъэ газрыкIуапIэр агъэпсыгъ. Джащ фэдэу газ оборудованиери агъэуцугъ.

КIэрэщэ Анзаур къызэрэхигъэщыгъэмкIэ, АдыгеимкIэ социальнэ псэолъэ 28-мэ джыри газыр аIэкIагъэхьанэу рахъухьагъ. IофшIэнхэр зэкIэ ипIалъэм гъэцэкIагъэ хъущтых.

АР-м иминистрэхэм я Кабинет и Тхьаматэ къызэриIуагъэмкIэ, мы программэм игъэцэкIэн заублэгъэ илъэситIум къыкIоцI республикэмкIэ лъэIу тхылъ мини 9,2-рэ фэдиз къатыгъ, зэзэгъыныгъэ мини 5,4-м ехъу гъэцэкIагъэ хъугъэ, хэпIэ 1808-мэ газыр алъагъэIэсыгъ. ЦIыф куп гъэнэфагъэхэм: сэкъатныгъэ зиIэхэм ыкIи Хэгъэгу зэошхом хэлэжьагъэхэм, а 1-рэ ыкIи я 2-рэ купхэм къахиубытэрэ сэкъатныгъэ зиIэхэм, зигъот макIэхэм газыр аIэкIэгъэхьэгъэнымкIэ Iофтхьабзэу ищыкIагъэхэр зэшIохыгъэ хъунхэм пае сомэ мини 100 зырыз аIэкIагъэхьащт. 2022 — 2023-рэ илъэсхэм лъэIу тхылъ къэзытыгъэ нэбгырэ 519-мэ ащ фэдэ фэгъэкIотэныгъэр къызфагъэфедагъ, унэгъо 92-р хэушъхьафыкIыгъэ дзэ операцием хэлажьэхэрэм яунагъох.

«Хэгъэгум и Президент, и Правительствэ, ФедерациемкIэ Советым ыкIи партиеу «Единэ Россием» и Генеральнэ совет тафэраз республикэм социальнэ газификациер щызэшIохыгъэнымкIэ программэм ипхырыщын IэпыIэгъу къызэрэфэхъугъэхэм ыкIи Адыгеим газыр IэкIэгъэхьэгъэным епхыгъэ IофшIэнымкIэ яшIуагъэ къызэрэтэкIыгъэм апае. Тэ гъусэныгъэ пытэ адытиI Урысыем энергетикэмкIэ и Министерствэ, Газпромым газинфраструктурэр аIэкIэгъэхьэгъэным иIофыгъо изэшIохынкIэ. Ащ фэдэ зэдэлэжьэныгъэм ишIуагъэкIэ республикэм газыр зэращыIэкIагъахьэрэр процент 94,6-м нэсыгъ, 2025-рэ илъэсым ыкIэхэм адэжь процент 96,65-м нэсынэу тэгугъэ. Республикэм исоциальнэ-экономикэ хэхъоныгъэкIэ ащ ишIогъэшхо къэкIощт», — къыхигъэщыгъ КIэрэщэ Анзаур.