ЕгъэджэкIо- гъэсакIохэр агъэшIуагъэх

КIэлэцIыкIу IыгъыпIэхэм Iоф ащызышIэхэрэм, гурыт сэнэхьат, гъэсэныгъэ тедзэ кIэлэегъаджэхэм языгъэгъотыхэрэм я Мафэ фэгъэхьыгъэ мэфэкI зэхахьэ АР-м и Къэралыгъо филармоние непэ щыкIуагъ. Ащ хэлэжьагъ Адыгэ Республикэм и ЛIышъхьэу КъумпIыл Мурат.

Iофтхьабзэм къырагъэблэгъагъэх Адыгеим и Къэралыгъо Совет — Хасэм и Тхьаматэу Владимир Нарожнэр, министрэхэм я Кабинет хэтхэр, депутатхэр, муниципалитетхэм япащэхэр, общественнэ организациехэм ялIыкIохэр, кIэлэегъаджэхэр, нэмыкIхэри.

Адыгеим и ЛIышъхьэ пэублэ псалъэ къышIызэ, шъолъырым Iоф щызышIэрэ кIэлэегъаджэхэм, кIэлэпIухэм, ветеранхэм ямэфэкIкIэ къафэгушIуагъ, нэбгырэ пэпчъ щыIэныгъэ гъогум тезыщэхэрэм, езыгъаджэхэрэм ыкIи зыпIухэрэм ясэнэхьат анахь шъхьаIэу зэрилъытэрэр къыхигъэщыгъ. Ахэм яIофшIэн осэ ин зэриIэр къеушыхьаты УФ-м и Президентэу Владимир Путиным иунашъокIэ мы илъэсыр егъэджэкIо-гъэсакIом и Илъэсэу зэрагъэнэфагъэм.

— Ныбджэгъу лъапIэхэр, кIэлэегъэджэ IофшIэным иветеранхэр, шъуимэфэкI мафэкIэ сышъуфэгушIо, — къыIуагъ КъумпIыл Мурат къэзэрэугъоигъэхэм закъыфигъазэзэ. — Мы сэнэхьатым зищыIэныгъэ езыпхыгъэхэм яIофшIэн хэшIыкIышхоу фыряIэм ишIуагъэкIэ къыткIэхъухьэрэ лIэужхэм шIэныгъэ куухэр зэрагъэгъотынхэ, щыIэныгъэмкIэ ящыкIэгъэщт сэнэхьатым феджэнхэ амал яI.

НыбжьыкIэхэм яхэгъэгу шIу алъэгъоу пIугъэнхэмкIэ кIэлэегъаджэхэм IофшIэнышхо зэрагъэцакIэрэр къыхигъэщыгъ, ахэм рагъэджагъэхэр непэ хэушъхьафыкIыгъэ дзэ операцием хэлажьэх, лIыхъужъныгъэ зэрахьэзэ япшъэрылъхэр агъэцакIэх.

— ТилIыхъужъхэм ягъэхъагъэхэм тарэгушхо, ахэм ахэтых кIэлэегъаджэхэр — шъо шъуиIофшIэгъухэр. Хэгъэгум, ащ щыпсэухэрэм узэрафэшъыпкъэн фаемкIэ ахэр щысэтехыпIэх. Ны-тыхэм ягъусэхэу кIэлэегъэджэ-гъэсакIохэм ахэм ар ахалъхьагъ, — къыIуагъ КъумпIыл Мурат.

Непэ республикэм еджапIэхэр, кIэлэцIыкIу IыгъыпIэхэр зэрэщагъэцэкIэжьыхэрэр, кIэу зэрашIыхэрэр, ящыкIэгъэ Iэмэпсымэхэр зэрачIэтхэр, шэпхъэшIухэм адиштэрэ гъэсэныгъэ ыкIи къэбарлъыгъэIэс амалхэр зэрэщагъэфедэхэрэр Адыгеим и ЛIышъхьэ къыIуагъ. Анахьэу анаIэ зытырагъэтыщтыр кIэлэегъэджэ ныбжьыкIэхэм ягъэхьазырын ары.

— Специалист ныбжьыкIэхэр нахьыбэу къещэлIэгъэнхэр пшъэрылъ шъхьаIэхэм ащыщ. Сигуапэу къыхэзгъэщымэ сшIоигъу Iоныгъом и 1-м ехъулIэу республикэм ит гъэсэныгъэм иучреждениехэм ныбжьыкIэ 200 фэдиз зэраIухьагъэр. КIэлэегъаджэхэр икъунхэм пае мы IофшIэныр джыри лъыдгъэкIотэн фае, — къыIуагъ республикэм и ЛIышъхьэ.

Ащ дакIоу мы сэнэхьатым епхыгъэу Iоф зышIэхэрэр социальнэу ухъумэгъэнхэм, обществэр ыкIи къэралыгъор IэпыIэгъу афэхъуным мэхьанэшхо зэряIэр хигъэунэфыкIыгъ.

— Республикэм гъэсэныгъэмкIэ исистемэ Iоф щызышIэхэрэм IэпыIэгъу ягъэгъотыгъэным фэгъэхьыгъэу джыри ищыкIагъэр зэкIэ гъэцэкIагъэ хъущт. КIэлэегъаджэу, кIэлэпIоу, гъэсэныгъэм исистемэ Iоф щызышIэу республикэ зэнэкъокъухэм ахэлажьэхэрэм япчъагъэ зэрэхахъорэр тигуапэ. КIэлэегъэджэ сэнэхьатым уасэу фашIырэм хэдгъэхъоным, Адыгеим гъэсэныгъэм исистемэ хэхъоныгъэхэр ышIынхэм афэшI къыттефэрэр зэкIэ дгъэцэкIэщт. Лъытэныгъэ зыфэтшIырэ тикIэлэегъаджэхэр! ШъуимэфэкIкIэ джыри зэ сыгу къыздеIэу сышъуфэгушIо, — къыIуагъ КъумпIыл Мурат.

Нэужым «Адыгэ Республикэм гъэсэныгъэмкIэ изаслуженнэ IофышI» зыфиIорэ щытхъуцIэр кIэлэегъэджэ пэрытхэм, гурыт еджапIэхэм, кIэлэцIыкIу IыгъыпIэхэм япащэхэм афигъэшъошагъ.

Джащ фэдэу 2023-рэ илъэсым зэхащэгъэ зэнэкъокъум щатекIуагъэхэм АР-м и ЛIышъхьэ и Дипломрэ сомэ мин 200 зырызрэ шIухьафтынэу афигъэшъошагъэх. Джащ фэдэу зэнэкъокъум илауреат хъугъэхэм дипломхэр ыкIи сомэ мин 50 зырыз аратыжьыгъ.

Нэужым Владимир Нарожнэр АР-м и Парламент идепутатхэм ацIэкIэ зисэнэхьат мэфэкI хэзыгъэунэфыкIыхэрэм къафэгушIуагъ. АР-м и Къэралыгъо Совет — Хасэм и Рэзэныгъэ тхылъ нэбгырэ заулэмэ аритыжьыгъ.

Республикэм итворческэ купхэм къагъэхьазырыгъэ концертымкIэ мэфэкIыр аухыгъ.