ЗэгурыIоныгъэм фэлажьэх

Адыгэ Республикэм и ЛIышъхьэу КъумпIыл Мурат Адыгеимрэ Краснодар краимрэ ямуфтиеу Къэрдэн Аскэрбый IофшIэгъу зэIукIэгъу дыриIагъ. Къалэу Мыекъуапэ имэрэу Геннадий Митрофановыр зэдэгущыIэгъум хэлэжьагъ.

ЦIыф лъэпкъ зэфэшъхьафхэм къахэкIыгъэхэм ыкIи дин зэмылIэужыгъохэр зылэжьыхэрэм зэдегъэштэныгъэ, зэгурыIоныгъэ азыфагу илъыным иIофыгъохэр ары ахэр зытегущыIагъэхэр. Республикэм и ЛIышъхьэ быслъымэнхэм яIофхэм язытет, анахь зигъо пшъэрылъхэу республикэм ихэбзэ къулыкъухэр къыхэлажьэхэзэ зэшIохыгъэн фаеу щытхэм къакIэупчIагъ.

«Ренэу тидин пащэхэм таIокIэ, Iофыгъоу къэуцухэрэр зэшIотэхых. Непэ Адыгэ Республикэмрэ Краснодар краимрэ арыс быслъымэнхэм я ДиндэлэжьапIэ имуфтий зичэзыу зэIукIэгъу дытиI. Мыекъуапэ имэри къедгъэблэгъагъ. Зигъо пшъэрылъхэм тызэгъусэу татегущыIэным ыкIи зэшIохыкIэу ахэм афэхъущтхэм тызэдягупшысэным тыфэхьазыр», — къыхигъэщыгъ Адыгеим и ЛIышъхьэ.

Быслъымэнхэмрэ чыристан диныр зылэжьхэрэмрэкIэ мэхьанэшхо зиIэ шIушIэ Iофыгъохэм язэшIохынкIэ республикэм ипащэхэм ренэу яшIуагъэ зэрарагъэкIырэм пае зэрафэразэр муфтиим къыIуагъ.

«Дин конфессие шъхьэIитIум ренэу тызэIокIэ, тызэдэлажьэ. Непэ сызыфэягъэр мэщытхэм яшIын иIофыгъо тытегущыIэнэу ары, джащ фэдэу лъэпкъ къэхалъэм псыр дэщыгъэнымкIэ цIыфхэми лъэIухэр яIэх», — къыIуагъ Къэрдэн Аскэрбый.

ЗэдэгущыIэгъум илъэхъан республикэм икъэлэ шъхьаIэ ипащэ пшъэрылъ заулэ фашIыгъ. Геннадий Митрофановым къыхигъэщыгъ быслъымэнхэм я ДиндэлэжьапIэрэ епархиемрэ зэгурыIоныгъэ азыфагу зэрилъыр, пшъэрылъэу къэуцугъэхэри пIэлъэ гъэнэфагъэхэм къакIоцI зэшIохыгъэ зэрэхъущтхэр.

ИкIэухым Адыгеим и ЛIышъхьэ къыхигъэщыгъ республикэм мамырныгъэрэ зэгурыIоныгъэрэ илъынхэмкIэ, къыткIэхъухьэхэрэр пIугъэнхэмкIэ, зыныбжь хэкIотагъэхэм, гъот макIэ зиIэхэм ыкIи сабыибэ зэрыс унагъохэм IэпыIэгъу афэхъугъэнымкIэ дин конфессие шъхьэIитIум мэхьанэшхо зэряIэр. Джащ фэдэу КъумпIыл Мурат къыхигъэщыгъ дин объединениехэм ялIыкIохэм азыфагу илъ зэдэлэжьэныгъэмрэ зэфыщытыкIэшIухэмрэ джыри нахь гъэпытэгъэнхэм тегъэпсыхьэгъэ IофшIэныр лъыгъэкIотэгъэным мэхьанэшхо зэриIэр.