ЦIыфхэм ящыIакIэ зыкъыIэтыным пай

Адыгеим и ЛIышъхьэу КъумпIыл Мурат Теуцожь районым зыщэIэм къуаджэу Джэджэхьаблэ щагъэпсыгъэ врач амбулаториер къыплъыхьагъ. Лъэпкъ проектэу «Псауныгъэм икъэухъумэн» зыфиIорэм тегъэпсыхьагъэу шъолъыр программэм диштэу ар ашIыгъ.

Федеральнэ ыкIи республикэ бюджетхэм сомэ миллион 36-рэ къахагъэкIи, амбулаторием игъэпсын пэIуагъэхьагъ. Илъэсрэ ныкъорэм къыкIоцI IофшIэнхэр кIуагъэх ыкIи мы илъэсым шышъхьэIум ахэр аухыгъэх. Медицинэ учреждениякIэм пае ящыкIэгъэ Iэмэ-псымэхэр, мебелыр къащэфыгъ ыкIи чIагъэуцуагъ. Врачхэмрэ медицинэ сестрахэмрэ аштагъэх, нахьыбэрэмкIэ ахэр Джэджэхьаблэ щыщых.

Республикэм и ЛIышъхьэ псэуалъэр ыкIи цIыфхэр еблэгъэнхэмкIэ амалэу ащ иIэхэр къыплъыхьагъэх. Квадрат метрэ 420-рэ фэдиз хъурэ унэм терапевтым, педиатрэм, мамыку-гинекологым якабинетхэр хэтых, цэхэм зыщяIазэхэрэ кабинетыр ыкIи мафэрэ зычIэлъыщтхэ палатэхэр икъоу зэтырагъэпсыхьагъэх.

Адыгэ Республикэм псауныгъэм икъэухъумэнкIэ иминистрэу Мэрэтыкъо Рустем къызэриIуагъэмкIэ, апэрэ медицинэ IэпыIэгъур ятыгъэнымкIэ, цIыфхэм япсауныгъэ изытет зэгъэшIэгъэнымкIэ, ахэм яIэзэнхэмкIэ амбулаторием зэкIэ ищыкIагъэр щызэрагъэуIугъ.

Кощхьэблэ районым ит псэупIэу Дружбэм ащ фэдэ врач амбулаторием ишIын епхыгъэ IофшIэнхэр шIэхэу щырагъэжьэщтых. Джащ фэдэу илъэсэу къихьащтым иублэгъухэм адэжь къутырэу Гавердовскэм амбулаторием ишIын щаухыщт. 2024-рэ илъэсым Мыекъопэ, Красногвардейскэ, Тэхъутэмыкъое районхэм ащ фэдэ псэолъи 5 ащашIыщт.

Медицинэм иучреждениякIэ къызеплъыхьэ нэужым КъумпIыл Мурат ащ Iоф щызышIэхэрэмрэ къоджэдэсхэмрэ гущыIэгъу афэхъугъ. ПсэупIэм тапэкIи хэхъоныгъэу ышIыщтым иIофыгъохэм ахэр атегущыIагъэх.

Республикэм ипащэхэм ыкIи муниципалитетым цIыфхэм яфэныкъоныгъэхэм ренэу анаIэ къызэратырагъэтырэм пае зэрафэразэхэр къоджэдэсхэм къаIуагъ. Ахэм къызэрэхагъэщыгъэмкIэ, мы аужырэ илъэсхэм Джэджэхьаблэ зэхъокIыгъэ хъугъэ: культурэм и Унэ агъэцэкIэжьыгъ, къуаджэм пхырыкIырэ гъогум ыбгъукIэ лъэсгъогухэм яшIын лъэкIуатэ, инфраструктурэм епхыгъэ Iофыгъохэри зэшIохыгъэ мэхъух.

«Псауныгъэм икъэухъумэн, гъсээныгъэм, культурэм, физическэ культурэм ыкIи спортым япхыгъэ учреждениехэр къуаджэхэм нахьыбэу къадэтэджэнхэм ренэу тынаIэ тетэгъэты, фэIо-фашIэу къалэхэм ащызэшIуахыхэрэм афэдэхэри къоджэдэсхэм ягъэгъотыгъэнхэм епхыгъэ Iофтхьабзэхэр игъорыгъоу пхырытэщых. Мы IофшIэнымкIэ ежь цIыфхэри къыддеIэх: къэралыгъо IэпыIэгъум ипрограммэ ахэр къыхэтэгъэлажьэх, къуаджэхэмрэ къутырхэмрэ IофшIэпIэ чIыпIакIэхэр ащызэхэщэгъэнхэм, ныбжьыкIэ кадрэхэр ахэм къадэнэнхэм, демографием ылъэныкъокIэ Iофхэм язытет нахьышIу шIыгъэным ренэу тынаIэ атетэгъэты. А пстэури зыкIатшIэрэр цIыфхэм щыIакIэу яIэм нахь зыкъыIэтыным пай», — къыIуагъ АР-м и ЛIышъхьэ.

Республикэм ипащэ къызэрэхигъэщыгъэмкIэ, къоджэдэсхэм щыIакIэу яIэр нахьышIу шIыгъэныр республикэм ихэбзэ къулыкъухэм яIофшIэнкIэ апшъэрэ мэхьанэ зэратыхэрэм ащыщ ыкIи а Iофыр тапэкIи лъагъэкIотэщт.