Республикэм ищыIэныгъэкIэ мэхьанэшхо яI

Адыгеим ипрофсоюзхэр зызэхащагъэхэр илъэси 100 зэрэхъурэм тефэу республикэм и ЛIышъхьэу КъумпIыл Мурат зэIукIэгъу дыриIагъ АР-м ипрофсоюзхэм я Федерацие итхьаматэу Устэ Руслъан.

АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец, АР-м псауныгъэм икъэухъумэнкIэ иминистрэу Мэрэтыкъо Рустем, АР-м гъэсэныгъэмрэ шIэныгъэмрэкIэ иминистрэ иапэрэ гуадзэу Пэрэныкъо Сусаннэ, лъэныкъо зэфэшъхьафхэмкIэ профсоюз организациехэм япащэхэр зэIукIэгъум хэлэжьагъэх.

Шъугу къэтэгъэкIыжьы: Адыгэ-Черкес автоном хэкум ипрофсоюзхэу зэпэIэпчъэ профсоюз ячейкэхэр зэзыпхыхэрэм иа I-рэ зэфэс 1923-рэ илъэсым чъэпыогъум и 22-м Краснодар щыкIуагъ.

Республикэм и ЛIышъхьэ къызэрэхигъэщыгъэмкIэ, автоном хэкур зызэхащагъэм ыуж профсоюз организацие зыкIыр щыIэ хъугъагъэ, социальнэ IофшIэным зыпкъитыныгъэ хэлъыным ублапIэ ар фэхъугъ.

«Профсоюзхэр чанэу хэлажьэщтыгъэх лэжьакIохэм яIофшIэнрэ япсэукIэрэ тэрэзэу зэхэщэгъэнхэм, ащ дакIоу социальнэ ыкIи нэмыкI фэгъэкIотэныгъэхэр цIыфхэм аIэкIагъахьэщтыгъэх. Зэо ыкIи зэоуж илъэсхэм профсоюз къулыкъухэм пыим текIонхэм, хэгъэгур зыпкъ игъэуцожьыгъэным, промышленностымрэ мэкъу— мэщымрэ зыпкъитыныгъэ хэлъэу яIофшIэн рагъэжьэжьыным яIахьышхо хашIыхьагъ», — къыIуагъ КъумпIыл Мурат.

НепэкIэ профсоюз движением изытет къытегущыIэзэ, республикэм ипащэ къызэрэхигъэщыгъэмкIэ, профессиональнэ союзхэм нахьыпэм фэдэу джыри анаIэ зытырагъэтырэр Iоф зышIэрэ цIыфхэм яфитыныгъэхэр къэухъумэгъэнхэр, ящыIакIэ нахь зыкъегъэIэтыгъэныр, IофшIэныр щынэгъончъэу щытыныр, социальнэ фэгъэкIотэныгъэхэр ягъэгъотыгъэнхэр ыкIи нэмыкIхэр ары.

КъумпIыл Мурат анахьэу ынаIэ зытыридзагъэхэм ащыщ республикэм икъэралыгъо хабзэ икъулыкъухэм профсоюз организациехэм гъусэныгъэ пытэ адыряIэным ренэу анаIэ зэрэтырагъэтырэр.

«Iофэу жъугъэцакIэрэм мэхьанэшхо зэриIэр къыдгурыIозэ, анахь зигъо Iофыгъохэу къэуцухэрэм тызэгъусэу татегущыIэным ренэу тыфэхьазыр, амалэу тиIэм тетэу тишIуагъэ шъодгъэкIынми ренэу тынаIэ тетэгъэты», — къыIуагъ КъумпIыл Мурат зэIукIэгъум хэлажьэхэрэм закъыфигъазэзэ. Урысыем и Президент, и Правительствэ, Федеральнэ ЗэIукIэм IэпыIэгъоу къатырэм шъхьафэу игугъу ащ къышIыгъ. А IэпыIэгъум ишIуагъэкIэ псауныгъэм икъэухъумэнкIэ, гъэсэныгъэмкIэ, унагъохэм IэпыIэгъу ятыгъэнымкIэ, ныбжьыкIэхэм амалэу яIэхэм нахь заушъомбгъунымкIэ Iофыгъохэу къэуцухэрэр Адыгеим щызэшIохыгъэ мэхъух. Адыгеим и ЛIышъхьэ къызэрэхигъэщыгъэмкIэ, а лъэныкъохэм республикэм ипащэхэр ренэу адэлэжьэщтых, инвестициехэр нахьыбэу республикэм къихьанхэм, бизнесым IэпыIэгъу етыгъэным, инфраструктурэм хэхъоныгъэ егъэшIыгъэным, псэолъакIэхэр игъом гъэпсыгъэнхэм анаIэ атырагъэтыщт.

АР-м ипрофсоюзхэм я Федерацие итхьаматэу Устэ Руслъан къызэгущыIэм профсоюз движением ыкIи Iоф зышIэрэ цIыфхэм ясоциальнэ Iофыгъохэм язэшIохын ренэу ынаIэ къызэратыригъэтырэм пае КъумпIыл Мурат зэрэфэразэр къыхигъэщыгъ. Ащ къызэриIуагъэмкIэ, Адыгеим профсоюз движениер зыпкъ щиуцоным ыкIи хэхъоныгъэ ышIыным япхыгъэу хъарзынэщ материалышхо юбилеим ехъулIэу къаугъоин алъэкIыгъ.

ЗэIукIэгъум илъэхъан къызэрэхагъэщыгъэмкIэ, Адыгеим ипрофсоюзхэм пэублэ организацие 500-м ехъу ахэхьэ, пстэумкIи нэбгырэ мин 30-м ехъу ащ къызэлъеубыты. Профсоюз организациехэм яIэшъхьэтетхэр республикэм и ЛIышъхьэ игъусэхэу социальнэ зэдэлэжьэныгъэм, гурыт медицинэ IофышIэхэм ыкIи кIэлэегъаджэхэм ахъщэ тедзэ аIэкIэгъэхьэгъэным, профессиональнэ зэнэкъокъухэр зэхэщэгъэнхэм, отраслэ зэфэшъхьафхэм IэпэIэсэныгъэ ин зиIэ кадрэхэр ащылэжьэнхэм афэгъэхьыгъэ Iофыгъохэм атегущыIагъэх.

ИкIэухым Адыгеим и ЛIышъхьэ къыIуагъ профсоюзхэм япащэхэм ыкIи ахэм ахэтхэм чанэу Iоф зэрашIэрэм пае зэрафэразэр, республикэм иобщественнэ-политикэ щыIакIэ ахэр зэрэхэлажьэхэрэм мэхьанэшхо иIэу щыт ыкIи лъэныкъо пстэумкIи зэдиштэу ащ хэхъоныгъэ ышIыным ренэу ынаIэ тырегъэты.