ШъолъырыкIэхэм язэтегъэпсыхьажьын

Хэгъэгум ишъолъырыкIэхэр зыпкъ игъэуцожьыгъэнхэм фэгъэхьыгъэ зэхэсыгъоу УФ-м и Правительствэ и Тхьаматэ игуадзэу Марат Хуснуллиным видеоконференцие шIыкIэм тетэу зэрищагъэм Адыгеим и ЛIышъхьэу КъумпIыл Мурат хэлэжьагъ.

Урысыем, Донецкэ ыкIи Луганскэ народнэ республикэхэм, Херсон ыкIи Запорожскэ хэкухэм псэолъэшIынымкIэ я Министерствэхэм япащэхэм социальнэ мэхьанэ зиIэ ыкIи инфраструктурэ псэуалъэхэр зэрашIыхэрэм, зэрагъэцэкIэжьыхэрэм афэгъэхьыгъэ зэфэхьысыжьхэр зэхэсыгъом къыщашIыгъэх.

ГущыIэм пае, Херсон хэкумкIэ Геническэ районэу тиреспубликэ къыфэгъэзагъэр зыпкъ зэрэрагъэуцожьырэм зэхэсыгъом щытегущыIагъэх. Херсон хэкум ипащэхэм зэрязэгъыгъэм тетэу Адыгеим мурад иIагъ Геническэ районым псэолъэ заулэ 2023-рэ илъэсым щишIынэу ыкIи щызэтыригъэпсыхьажьынэу.

Ахэм ахахьэщтыгъ фэIо-фэшIэ лъэпкъхэр зыгъэцэкIэрэ гупчэ, псауныгъэр зыщагъэпытэрэ физкультурэ комплекситIу гъэпсыгъэныр, къалэу Геническэ игурыт еджапIэхэу N 1-мрэ 2-мрэ спорт джэгупIитIу ащышIыгъэныр. IофшIэнхэр зэкIэ аухыгъах пIоми хъущт. Джыдэдэм гурыт еджапIэу N 2-м ифизкультурэ комплекс ишIын ыкIэм фэкIо, мы илъэсым шэкIогъум ыкIэхэм адэжь ар атынэу щыт.

Адыгеим ипсэолъэшIхэмрэ чIыпIэ специалистхэмрэ зэдагъэпсыгъэ МФЦ-м федеральнэ пащэм осэшхо къыфишIыгъ. Херсон хэкумкIэ непэ ар мэхьэнэ ин зиIэ гупчэшхоу щыт, нэбгырэ 900-м нэс мафэ къэс ащ къекIуалIэ. Къэралыгъо фэIо-фэшIэ 22-м ехъу гупчэм щагъэцакIэ. Мы илъэсым ишышъхьэIу къыщегъэжьагъэу МФЦ-м Iоф ешIэ.

2023-рэ илъэсым телъытэгъэгъэ планым шъхьадэкIэу краеведческэ музеир Геническэ щагъэцэкIэжьыгъ; гурыт еджапIэхэу N 1-мрэ 2-мрэ ящагухэм язэтегъэпсыхьан ыкIэм фэкIо. Мы илъэситIу благъэхэм кIэлэцIыкIу IыгъыпIэхэмрэ фельдшер-мамыку IэзапIэхэмрэ агъэцэкIыжьынхэу ямурад.

«НэмыкI лъэныкъохэмкIи тишIуагъэ къэтэгъакIо. Адыгеим ишIушIэ IэпыIэгъоу тонн 200 фэдиз хъурэр Донецкэ ыкIи Луганскэ народнэ республикэхэм, Запорожскэ ыкIи Херсон хэкухэм арысхэм аIукIагъ. Ахэм ящыкIэгъэ пкъыгъохэмрэ оборудованиемрэ къащэфыгъэх. Iофыгъо пстэуми сшъхьэкIэ гъунэ алъысэфы. Хэгъэгум ипащэ пшъэрылъ къыгъэуцугъ Урысыем исхэм щыIэкIэ амалэу яIэхэм афэдэхэр шъолъырыкIэхэм ащыпсэухэрэми ягъэгъотыгъэнэу, социальнэ гарантиехэр афызэхэщэгъэнхэу, фэIо-фашIэхэр икъоу афэгъэцэкIэгъэнхэу», — къыIуагъ Адыгеим и ЛIышъхьэу КъумпIыл Мурат.