ЦIыфхэм ящыIакIэ зыкъеIэты

Къэралыгъо программэу «Къуаджэхэм хэхъоныгъэ ягъэшIыгъэныр» зыфиIорэм къыдыхэлъытагъэу ашIыгъэ псэолъэ заулэ КъумпIыл Муратрэ Оксана Лутрэ зэрагъэлъэгъугъ.

Ащ фэдэ социальнэ псэуалъэхэм зыкIэ ащыщ «Чебурашка» зыфиIорэ кIэлэцIыкIу IыгъыпIэу N 1-р. Ар псэупIэу Джаджэм щашIыгъ. ТапэкIэ 1907-рэ илъэсым агъэпсыгъэгъэ псэуалъэм кIэлэцIыкIу IыгъыпIэр чIэтыгъ. Къэралыгъо программэм диштэу илъэсэу икIыгъэм кIэлэцIыкIу 240-рэ зычIэфэщт IыгъыпIэр ашIыгъ. Ащ сомэ миллион 243,2-рэ пэIухьагъ, ащ щыщэу сомэ миллион 218,7-р федеральнэ бюджетым къыхэкIыгъ. УФ-м мэкъу-мэщымкIэ и Министерствэ ыцIэкIэ Оксана Лут шIухьафтынэу чебурашкэр къаритыгъ, ар кIэлэцIыкIу IыгъыпIэм итамыгъэу щыт. Мыщ илъэс зэфэшъхьафхэм ашIыгъэ джэголъабэ чIэлъ.

ЗагъэпсэфынымкIэ, гъэсэныгъэм епхыгъэ Iофтхьэбзэ зэфэшъхьафхэр щызэшIохыгъэнхэмкIэ унакIэм ящыкIагъэхэр зэкIэ чIэтых. Орэд къызщаIощт, физкультурэ зыщашIыщт залхэр, логопед кабинетхэр ыкIи нэмыкIхэр ащ хэтых.

ПсэупIэу Джаджэм зыщэIэхэм Н. Р. Нэгъоим ыцIэкIэ щыт Гупчэу культурэм епхыгъэ Iофтхьабзэхэр зыщызэшIуахыхэрэм КъумпIыл Муратрэ Оксана Лутрэ щыIагъэх. Унэр игъэкIотыгъэу агъэцэкIэжьыгъ, инженер коммуникациехэр зэблахъугъэх. Нэбгырэ 245-рэ зычIэфэрэ актовэ залыр агъэкIэжьыгъ, къызщышъохэрэ, шъуашэхэр зыщаIыгъхэрэ ыкIи кружок зэфэшъхьафхэр зыщызэхащэрэ унэхэр дахэу зэтырагъэпсыхьагъэх. АР-м и ЛIышъхьэ пшъэрылъ зэрафишIыгъэм тетэу Гупчэм къыпэIулъ чIыпIэри зэтырагъэпсыхьагъ, чъыгхэр, къэгъагъэхэр щагъэтIысхьагъэх. Мы Гупчэм хэхьэх зы театрэ, ансамблэхэр ыкIи клуб зэфэшъхьафхэр.

Илъэсэу икIыгъэм къуаджэхэм язэтегъэпсыхьан къыдэзылъытэрэ программэм диштэу Кощхьэблэ районымкIэ псэупIэу Майскэм культурэм и Унэ къыщызэIуахыгъ. КъумпIыл Муратрэ Оксана Лутрэ ащ зыщэIэхэм цIыфхэм гущыIэгъу афэхъугъэх. Къоджэдэсхэм яфэныкъоныгъэхэм анаIэ зэратырагъэтырэм ыкIи культурэм и УнакIэ зэрафарагъэшIыгъэм апае къызэрафэразэхэр псэупIэм щыщхэм къаIуагъ. 1984-рэ илъэсым культурэм и Унэ агъэпсыгъагъ, аужырэ лъэхъаным зэхэтэкъоным ар нэсыгъагъ. Джы унакIэу квадрат метрэ 1200-рэ фэдиз зыубытырэм нэбгырэ 200 зычIэфэщт актовэ зал, тхылъеджапIэ хэтых. Техникэм ылъэныкъокIи амал зэфэшъхьафхэр иIэх. Кощхьэблэ районым ипащэу Хьамырзэ Заур къызэриIуагъэмкIэ, культурэм и УнакIэ цIыфхэр бэу къычIэхьэх, ныбжь зэфэшъхьаф зиIэхэр ащ къэкIох.

ПсэупIэм дэсхэмкIэ Iэрыфэгъу хъуным пае культурэм и Унэ къыгуашIыхьагъ врач амбулаторие.

АР-м псауныгъэм икъэухъумэнкIэ иминистрэу Мэрэтыкъо Рустем къызэриIуагъэмкIэ, ащ поликлиникэ фэIо-фашIэхэр щагъэцакIэх. ПсэупIэу Майскэм имызакъоу, къыпэгъунэгъу псэупIэхэми адэсхэм медицинэ IэпыIэгъу мыщ щараты.

«Къуаджэхэм хэхъоныгъэ ягъэшIыгъэныр» зыфиIорэ программэм анахь чанэу хэлажьэхэрэм Адыгеир зыкIэ ащыщ. Илъэси 4-м къыкIоцI федеральнэ бюджетым сомэ миллиарди 4,5-рэ къыхагъэкIи ащ пэIуагъэхьагъ. Псэолъи 168-рэ агъэпсыгъ, нэмыкI шъолъырхэм ялъытыгъэмэ, ар бэдэд. Инфраструктурнэ проектхэр зэшIуахыгъэх, социальнэ мэхьанэ зиIэ псэолъабэ агъэцэкIэжьыгъ, анахьэу етIани культурэм ылъэныкъокIэ. ЗыдэщыIэгъэхэ чIыпIэхэм адэт псэуалъэхэу къаплъыхьагъэхэр зэкIэ дэгъоу ыкIи уахътэм диштэу зэтырагъэпсыхьагъэх. Мы программэм бизнесри хэлажьэ — проектхэм апэIухьагъэм ипроценти 10 фэдиз къыхигъэкIыгъ. Республикэм имуниципальнэ образованиехэм ялIыкIохэм тафэраз чIыпIэхэм язэтегъэпсыхьанкIэ Iофтхьэбзэ гъэнэфагъэхэр зэрэзэшIуахыхэрэм ыкIи республикэм ихэхъоныгъэ яIахь зэрэхашIыхьэрэм апае», — къыхигъэщыгъ Оксана Лут.

Ащ къызэрэхигъэщыгъэмкIэ, илъэсэу къихьащтым программэм игъэцэкIэн лъагъэкIотэщт, Адыгеим сомэ миллион 800 фэдиз къыфыхагъэкIынэу ары зэрэгугъэхэрэр.