НыбжьыкIэхэм адеIэщтых

Республикэм и Правительствэ зычIэт унэм Адыгеим и ЛIышъхьэу КъумпIыл Муратрэ АР-м ныбжьыкIэ Iоф­хэмкIэ и Комитет ­итхьаматэу Максим Галушкинымрэ зэIу­кIэгъу щызэдыряIагъ. Iофыгъо шъхьаIэу зытегущыIагъэхэр ныбжьыкIэхэм я Дунэе фестивалэу гъэтхапэм и 1-м къыщегъэжьагъэу и 7-м нэс «Сириусым» щыкIощтым хэлэжьэнхэм изы­фэгъэхьазырын ары.

ЗэIукIэм хэлэжьагъэх АР-м и ЛIышъхьэрэ министрэхэм я Кабинетрэ я Администрацие ипащэу Владимир Свеженец ыкIи финансхэмкIэ министрэу Виктор Ор­ловыр. ЗэIукIэгъур къызэIуихызэ КъумпIыл Мурат къызэрэхигъэщыгъэмкIэ, Президентэу Владимир Путиныр кIэщакIо зыфэхъугъэ фестивалым изэхэщэн мэхьанэшхо иI. Адыгеим и ЛIышъхьэ къызэриIуагъэмкIэ, дунэе зэдэгущыIэгъухэр рекIокIынхэмкIэ, ныбжьыкIэхэр кIэщакIо зыфэхъурэ проектыкIэхэр къыхэгъэщыгъэнхэмкIэ ыкIи ахэм IэпыIэгъу ятыгъэнымкIэ мыщ фэдэ Iофтхьэбзэ инхэм амалышIу къатыщт.

НыбжьыкIэ IофхэмкIэ

АР-м и Комитет итхьаматэ къызэриIуагъэмкIэ, фестивалым республикэм ыцIэкIэ нэбгыри 135-рэ хэлэжьэщт ыкIи волонтер 15 ягъусэщт. Ахэр зэкIэ ныбжьыкIэ организациехэм, студент объединениехэм, патриот ыкIи гу­фэ­кIо движениехэм ялIыкIох, Адыгеим гъэсэныгъэмрэ шIэныгъэмрэ япхыгъэ про­ектэу щыпхыращыхэрэм анахь чанэу ахэлажьэхэрэм ащыщых.

Максим Галушкиным къызэриIуагъэмкIэ, республикэм ихэбзэ къулыкъухэм шъо­лъырым илIыкIохэр нахь къы­зэрахэщыщтхэ лъэныкъом епхыгъэ IофшIэныр агъэцакIэ, презентациехэмкIэ программэхэр агъэхьа­зы­рых, Урысыем исубъектхэм якъэгъэлъэгъуапIэ Адыгеим иэкспозицие чIыпIэ гъэнэфагъэ щиубытыным дэлажьэх. Респуб­ликэм ихудожественнэ купитIу — творческэ объеди­нениеу «Ошъадэмрэ» Адыгэ къэралыгъо университетым лъэпкъ къашъомкIэ иансамблэу «Нартымрэ» ащ хэлэжьэщтых.

Мыщ дэжьым хэгъэунэфыкIыгъэн фае ныбжьыкIэхэм я Дунэе фестиваль Урысыем ыкIи дунаим ихэгъэгуи 180-м ехъумэ ялIыкIо нэбгырэ мин 20 зэрэхэ­лэжьэщтыр. Ахэм ахэтых бизнесым, гъэсэныгъэм, наукэм, дунэе зэдэлэжьэныгъэм, культурэм, шIушIэным, спортым, щыIэныгъэм илъэныкъо зэфэшъхьафхэм ялIыкIо ныбжьыкIэхэр. Фестивалым икъызэ­Iухын гъэтхапэм и 2-м рагъэ­жьэщт. Лъэпкъэу къызхэкIыгъэ­хэм, политикэм епхыгъэ еплъы­кIэу яIэхэм ямылъытыгъэу, чIы­пIэ зэфэшъхьафыбэмэ къарыкIыгъэ ныбжьыкIэхэр зэдэгущыIэнхэ, ягупшысэхэр зэлъа­гъэIэсынхэ амал зыщяIэщт чIы­пIэу фестивалыр хъун фае.

Адыгеим и ЛIышъхьэ мы зэ­IукIэм къыщыхигъэщыгъ Адыгеир ыкIи Урысыер Дунэе фестивалым зэрифэшъуашэу хэлэ­жьэнхэм мэхьанэшхо зэриIэр. Республикэм ныбжьыкIэхэм алъэныкъокIэ IофшIэнэу щагъэцакIэрэм фэхъурэ кIэухышIухэми ягугъу къышIыгъ. КъумпIыл Мурат къызэриIуагъэмкIэ, ащкIэ ишIуагъэ къэкIуагъ комитетэу зэхащагъэм. Ащ ныбжьыкIэхэр зэкъуигъэуцонхэ ылъэкIыгъ.

«Республикэм иныбжьыкIэ политикэ фэхъурэ зэхъокIыныгъэхэр тинэрылъэгъух, ахэм нахь чаныгъэ ахэлъ зэрэхъу­гъэр зэхэтэшIэ. Зэредгъэжьагъэм фэдэу ныбжьыкIэхэм яIофхэмкIэ Комитетым хабзэм инэ­мыкI къулыкъухэр игъусэхэу зэшIуихырэ IофшIэныр тапэкIи лъыдгъэкIотэн фае. Тэ ныбжьыкIэхэм мэхьанэшхо зиIэ социальнэ IофтхьабзэхэмкIэ ыкIи проектхэмкIэ адедгъэштэщт, мылъкоу а Iофым пэIудгъахьэрэми ама­лэу тиIэм елъытыгъэу хэдгъэ­хъощт, ныбжьыкIэхэм яIофшIэн­кIэ къашъхьапэщт инфраструктурэми зегъэушъомбгъугъэным фытегъэпсыхьэгъэ IофшIэныр лъыдгъэкIотэщт», — къыIуагъ КъумпIыл Мурат.