Зэфэхьысыжьхэмрэ пшъэрылъхэмрэ

ОшIэ-дэмышIэ тхьамыкIагъохэр къэмыгъэхъугъэнхэмкIэ, ахэм къыздахьыхэрэр дэгъэзыжьыгъэнхэмкIэ, машIом зыкъымыштэнымкIэ Адыгэ Республикэм и Комиссие хэтхэр ошIэ-дэмышIэ тхьамыкIагъохэр къэмыгъэхъугъэнхэмкIэ ыкIи ахэм къыздахьыхэрэр дэгъэзыжьыгъэнхэмкIэ къэралыгъо системэ зыкIым (РСЧС) Адыгэ РеспубликэмкIэ ичIыпIэ подсистемэ 2023-рэ илъэсым Iофэу ышIагъэмрэ 2024-рэ илъэсымкIэ пшъэрылъэу яIэхэмрэ тыгъуасэ атегущыIагъэх. Адыгеим и ЛIышъхьэу КъумпIыл Мурат зэхэсыгъор зэрищагъ.

Урысыем и ошIэ-дэмышIэ IофхэмкIэ и Министертсвэ Адыгэ РеспубликэмкIэ и ГъэIорышIэпIэ шъхьаIэ ипащэу Станислав Илющенкэр, АР-м зыухъумэжьынымкIэ ыкIи ошIэ-дэмышIэ IофхэмкIэ и Комитет итхьаматэу Вячеслав Лотаковыр Iофтхьабзэм къыщыгущыIагъэх.

ГъэрекIо Кощхьэблэ, Мыекъопэ районхэм ошIэ-дэмышIэ гумэкIыгъуи 5 къа­щыхъугъэу агъэунэфыгъ. ПлIымэ муниципальнэ мэхьанэ яIагъ.

РСЧС-м Адыгэ РеспубликэмкIэ ичIыпIэ подсистемэ имуниципальнэ къулы­къухэм ошIэ-дэмышIэ гумэкIыгъохэм ядэгъэзыжьынкIэ зэдырагъаштэу Iоф зэрашIагъэр зэхэсыгъом щыхагъэунэфыкIыгъ. ГущыIэм пае, РСЧС-м ичIыпIэ подсистемэ иIофышIэхэм тхьамыкIагъо къызщыхъугъэ чIыпIэхэм псыр аращыжьыгъ, гъогухэр, псыдэчъыпIэхэр агъэкъэбзэжьыгъэх, псынэхэр дезинфекцие ашIыгъэх, бэшэрэбхэм арытэу цIыфхэм псыр къафащагъ. ОшIэ-дэмышIэ гумэкIыгъохэм ядэгъэзыжьын нэбгырэ 380-рэ, техники 112-рэ хэлэжьагъэх. Адыгэ Республикэм иминистрэхэм я Кабинет иIэпэчIэгъэнэ фонд сомэ миллион 47-м ехъоу къыхагъэкIыгъэр зэтыгъо IэпыIэгъоу цIыфхэм аратыгъ.

ОшIэ-дэмышIэ тхьамыкIагъохэр къэмыгъэхъугъэнхэмкIэ респуб­ликэ планым къыдыхэлъытагъэу 2023-рэ илъэсым зыми фэмыгъэ­зэгъэ дамбэхэр агъэцэкIэжьы­гъэх, псыхъохэм якъуладжэхэр агъэ­къэб­загъэх, псыр къызыкIэон ылъэкIыщт шъолъырхэр агъэнэфагъэх.

ОшIэ-дэмышIэ гумэкIыгъохэр къэхъунхэ зэрилъэкIыщтымкIэ цIыфхэм псынкIэу макъэ языгъэIурэ системэм ыкIи Системэу 112-м тэрэзэу Iоф ашIэнымкIэ, аппарат-программэ комплексэу «Къэлэ щынэгъончъэр» зыфиIорэм иподсистемэ зегъэушъомбгъугъэнымкIэ ищыкIэгъэ амалхэр зэрахьэх.

Республикэ къэралыгъо программэу «Хэбзэукъоныгъэхэр амышIынхэр, ошIэ- дэмышIэ тхьамыкIагъохэр къэмыгъэхъугъэнхэр» зыфиIорэм диштэу цIыфхэм макъэ зэрарагъэIурэ шъолъыр автоматизированнэ системэр агъэкIэжьы. Ащ пае сомэ миллиони 150-м ехъу къыхагъэкIыгъ, мыгъэ ащ игъэкIэжьын аухын ямурад.

Муниципальнэ, шъолъыр мэхьанэ зиIэ ошIэ-дэмышIэ тхьамыкIагъохэр къызы­хъухэкIэ къызфагъэфедэн алъэкIынэу сомэ миллион 40 фэдиз IэпэчIэгъанэу щыI.

РСЧС-м ичIыпIэ подсистемэ 2024-рэ илъэсымкIэ пшъэрылъэу иIэхэм зэхэсыгъом игугъу къыщашIыгъ.

Адыгеим и ЛIышъхьэ министерствэ­хэм, къулыкъухэм, муниципалитетхэм япащэхэм сабыибэ зиIэ унагъохэм яунэхэм машIом закъыщимыштэнымкIэ автоном сигнализациехэр ащыгъэуцу­гъэнхэу, зыми фэмыгъэзэгъэ гидротехническэ псэуалъэхэр IухыжьыгъэнхэмкIэ IофшIэныр нахь агъэлъэшынэу, ошIэ-дэмышIэ гумэкIыгъохэр къэхъун зэрилъэ­кIыщтхэр къыдалъытэзэ, IэпэчIэгъэнэ мылъку аугъоинэу, социальнэ мэхьанэ зиIэ псэуалъэхэм планым къы­дыхэ­лъытэгъэ тренировкэхэр ащызэхащэнхэу пшъэрылъ афишIыгъ.

2023-рэ илъэсым цIыфхэм щынэгъончъагъэ нахь зыщыряIэгъэ муниципалитетыр зэхэсыгъом къыщыхахыгъ, къалэу Мыекъуап ащкIэ текIоныгъэр къыдэзыхыгъэр. Зэхэсыгъом икIэуххэр зэфи­хьысыжьхэзэ, республикэм ипащэ зэ­хэсыгъом хэлэжьагъэхэм «тхьашъуегъэ­псэу» ариIуагъ ошIэ-дэмышIэ гумэкIыгъохэм къыздахьыгъэхэм ядэгъэзы­жьынкIэ шIуагъэ къытэу гъэрекIо Iоф зэрашIагъэм фэшI.

«Пстэуми: псауныгъэм икъэ­ухъумэн фэгъэзэгъагъэхэми, Роспотребнадзорым иIофышIэхэми, метеорологхэми, МЧС-м щылажьэхэрэми, гъогу, аварийнэ къулыкъухэм, чIыпIэ зыгъэIорышIэжьынымкIэ къулыкъухэм яIофышIэхэми къафэгъэзэгъэ чIыпIэхэм псынкIэу ыкIи зэдырагъаштэу япшъэрылъхэр щагъэцэкIагъэх. ТапэкIи джарэущтэу шъузекIу, шъуизэдэлэжьэныгъэ нахь жъугъэпыт. Пшъэрылъ шъхьа­Iэу зэкIэми зэдытиIэр цIыфхэм щынэгъончъэгъэ икъу ядгъэгъотыныр ары», — къыIуагъ КъумпIыл Мурат.