Энергетическэ псэуалъэхэр шапхъэхэм адиштэнхэр

Адыгеим и ЛIышъхьэу КъумпIыл Мурат Моск­ва зэкIом, Iахьзэхэлъ ­обществэу «Россети» ­игенеральнэ пащэу Андрей Рюминым зэIукIэгъу дыриIагъ.РеспубликэмкIэ мэхьанэшхо зиIэ проектхэр электроэнергетикэм зэрэщагъэцакIэхэрэм ахэр тегущыIагъэх. ЗэIукIэгъум хэлэжьагъ ФедерациемкIэ Советым экономикэ политикэмкIэ и Комитет итхьаматэ игуадзэу Хъопсэрыкъо Мурат.

Iахьзэхэлъ обществэу «Россе­ти» Адыгэ Республикэм иэлектросетьхэм ягъэкIэжьын мыгъэ сомэ миллиарди 8-м ехъу пэIуи­гъэхьащт. Анахь мэхьанэ зиIэ пшъэрылъхэм ащыщ Тэхъутэмыкъое районым ипроизводства­кIэхэм, Мыекъопэ районым зе­кIонымкIэ ипсэуалъэхэм электроэнергиер аIэкIэгъэхьэгъэныр.

«Iахьзэхэлъ обществэу «Россети» тыригъусэу Адыгеим иэнер­гетическэ отраслэ джырэ шапхъэхэм адиштэным Iоф дэтэ­шIэ. Ар мэхьанэшхо зиIэ пшъэ­рылъ, зэрэзэшIуахырэм бэкIэ елъытыгъэщт республикэм тапэ­кIэ хэхъоныгъэу ышIыщтыр, ти­проект шъхьаIэхэр гъэцэкIагъэ зэрэхъущтхэр — промышленнэ шъолъырэу «Инэмыр», зекIонымкIэ кластерэу «Лэгъонакъэ» зэрагъэпсыщтхэр. Владимир Путиным и Джэпсалъэ къыщыхи­гъэщыгъ мыщ фэдэ IофшIэным мэхьанэшхо зэриIэр, хэгъэгум итехнологическэ суверенитет игъэпытэнкIэ амалэу зэрахьэ­хэ­рэм зэрахэгъэхъогъэн фаер. Чыжьэу кIорэ тигухэлъхэм ар афытегъэпсыхьагъ. Электроэнер­гиер зэримыкъурэр дэгъэзыжьыгъэ зыхъукIэ а гухэлъхэм язэшIохын нахь псынкIэу къытфыдэкIыщт. Энергетическэ псэо­лъакIэхэр лъэпкъ проектхэм ягъэцэкIэн фэIорышIэщтых, ахэм яшIуагъэкIэ инвестициехэр на­хьыбэу къытхалъхьащтых, псэо­лъэшIынми, социальнэ псэуа­лъэхэм ягъэпсыни нахь зядгъэу­шъомбгъун тлъэкIыщт», — къыIуагъ КъумпIыл Мурат.

Iахьзэхэлъ обществэу «Россе­ти» игенеральнэ пащэ компа­нием иинвестиционнэ проектхэр зэрагъэцакIэхэрэм къытегущыIагъ.

«ЗекIоным зегъэушъомбгъугъэным Адыгеим лъэшэу анаIэ щытырагъэты. Мыщ щагъэпсырэ зыгъэпсэфыпIэхэр Урысыем и КъыблэкIэ анахь дэгъухэм аха­лъытэнхэ алъэкIыщт. Джары типроектхэм азыныкъо нахьыбэр а лъэныкъом епхыгъэу зыкIыщы­тыр. ГъэрекIо Iахьзэхэлъ общест­вэу «Россети» Мыекъопэ районымкIэ рекреационнэ кластерэу «Дэхъо гъэхъунэм» электроэнер­гиер IэкIахьэу ыгъэпсыгъ. Джыдэдэм кВ 110-рэ зилъэшыгъэ подстанциеу «Плато» зыфиIорэм ишIын ыуж тит», — къыIуагъ Андрей Рюминым.

Энергетическэ псэуалъэм кIуачIэу иIэщтыр МВА 50. Энергетикхэм ащ къыхащынышъ, кВ 220-рэ зилъэшыгъэ подстанциеу «Черемушкэм» нэсыщт элект­рорыкIуапIэр агъэпсыщт. МВА 125-рэ кIуачIэу зиIэщт автотрансформатор ащ щагъэуцущт.

Джащ фэдэу Адыгеир Краснодар краим иэнергетическэ псэуалъэхэм языпхырэ энергие­рыкIопIэ тедзэхэр агъэпсынхэу мурад яI. ПсынкIэу хэхъоныгъэ зышIырэ Тэхъутэмыкъое районым щыIэ подстанциехэр агъэ­кIэжьыщтых. Бизнес цIыкIумрэ гурытымрэ ахэщагъэхэм фэгъэ­кIотэныгъэ хэлъэу производст­веннэ площадкэхэр къызфагъэфедэнхэм пае индустриальнэ паркэу «Инэмыр» мыщ щагъэпсы.