Хэдзынхэр тэрэзэу рекIокIынхэм пае

Адыгэ Республикэм терроризмэм пэшIуекIорэ и Комиссие изэхэсыгъоу щыIагъэм щатегущыIагъэх Урысыем и Президент ихэдзынхэм республикэр зэрэфэхьазырым, хэушъхьафыкIыгъэ дзэ операцием илъэхъан транспортыр терроризмэм щыухъумэгъэным, ащ дакIоу террористическэ идеологием гъогур фызэпыбзыкIыгъэнымкIэ Iофтхьабзэхэм ыкIи ащ нэмыкI Iофыгъохэм.

КъызэрэхагъэщыгъэмкIэ, гъэтхапэм и 7-м ехъулIэу хэдзакIохэм ямэкъэтын зыщыIэщт мафэмрэ ар зэрэкIощт шIыкIэмрэ цIыфхэр ащыгъэгъозэгъэнхэмкIэ проектэу «Информ-УИК» зыфиIорэр гъэцэкIагъэ хъущт. ХэдзэкIо комиссиехэм ахэтхэм республикэм ит унэхэр зэкI пIоми хъунэу къакIухьагъэх. Мэкъэтыныр зыщыкIощт чIыпIэ 265-р ауплъэкIугъ, видеолъыплъэным яамалхэмкIэ ахэр зэрэзэтегъэпсыхьагъэхэм игъэунэфын ыкIэм фэкIо. Бюллетеньхэм якъэухъумэнкIэ хэушъхьафыкIыгъэ маркэхэмрэ бюллетеньхэмрэ хэдзынхэмкIэ чIыпIэ комиссиехэм аIэкIагъэхьагъэх.

КъызэраIуагъэмкIэ, щынэгъончъэным ылъэныкъокIэ терроризмэ, экстремизмэ нэшанэ зиIэ гумэкIыгъохэр къыхэгъэщыгъэнхэмкIэ ыкIи ахэм апэуцужьыгъэнымкIэ Iофтхьабзэхэр лъагъэкIотэщтых. Къалэу Мыекъуапэ «Щынэгъончъэ къалэр» зыфиIорэм тегъэпсыхьагъэу камерэхэм япчъагъэ нахьыбэ шIыгъэн зэрэфаери къыхагъэщыгъ.

Ащ нэмыкIэу къаIуагъ хэдзынхэм ялъэхъан гъэсэныгъэ зыщарагъэгъотырэ чIыпIэхэу мы Iофтхьабзэм епхыгъэу щытыщтхэр куп-купэу зэрэзэтыраутыгъэхэр ыкIи паспортхэр зэрагъэхьазырыгъэхэр. Ахэм якъэухъумэни агъэлъэшыгъ.

Адыгеим и ЛIышъхьэ къыхигъэщыгъ муниципалитетхэм япащэхэм хэбзэухъумэкIо къулыкъухэм ыкIи хэдзынхэмкIэ Гупчэ комиссием хэтхэм, джащ фэдэу лъыплъакIохэм гъусэныгъэ пытэ адыряIэным мэхьанэшхо зэриIэр.