Язэдэлэжьэныгъэ хагъэхъощт

Адыгеим и ЛIышъхьэу КъумпIыл Мурат Росреестрэм Адыгэ РеспубликэмкIэ и ГъэIорышIапIэ ипащэу Марина Никифоровам зэIукIэгъу дыриIагъ. ЧIыгум игъэфедэнрэ амыгъэкощырэ мылъкумрэ япхыгъэ Iофыгъохэм ахэр атегущыIагъэх.

Росреестрэм АР-мкIэ и ГъэIорышIапIэ ипащэ 2023-рэ илъэсым якъулыкъу Iофэу ышIагъэр къыIотагъ. Къэралыгъо кадастрэ учетымкIэ ыкIи фитыныгъэхэр къэралыгъо регистрацие шIыгъэнхэмкIэ пIалъэу агъэнэфагъэхэм къащагъакIэ зэрэхъугъэр ащ хигъэунэфыкIыгъ. НепэкIэ регистрацие Iофтхьабзэхэм арагъэхьырэр зы мафэм къыщегъэжьагъэу мэфи 3-м нэс. Джащ фэдэу фитыныгъэхэм якъэралыгъо регистрацие къызэтегъэуцогъэным ыкIи къэралыгъо кадастрэ учетым яхьылIэгъэ унашъоу аштэхэрэри нахь макIэ хъугъэх.

Росреестрэм цифрэ технологиехэр нахь шIуагъэ къытэу ыгъэфедэхэ зэрэхъугъэр Адыгеим и ЛIышъхьэ къыхигъэщыгъ. ГущыIэм пае, республикэм щыпсэухэрэм 2023-рэ илъэсым амыгъэкощырэ мылъкум иреестрэ къыхэтхыкIыгъэ тхылъ мин 530-рэ фэдиз къаIахыгъ. Ахэм япроцент 95-р электрон шIыкIэкIэ къаIукIагъ.

Амыгъэкощырэ мылъкум ипсэуалъэхэу ыпэкIэ учет ашIыгъагъэхэр зиехэм якъыхэгъэщын, кадастрэ IофшIэнхэр республикэм зэрэщагъэцакIэхэрэм япхыгъэ Iофыгъохэми ахэр алъыIэсыгъэх. ЧIыгу Iахьхэм, псэолъэшIыным фытегъэпсыхьагъэхэри ахэм зэрахэтхэу, ягъэфедэн мэхьанэшхо зэриIэр АР-м и ЛIышъхьэ къыхигъэщыгъ.

Проектым диштэу хабзэм икъэралыгъо къулыкъу зэфэшъхьафхэм якъэбар системэхэм аIэкIэлъхэр зэхаугъуаех, цифрэ технологиехэр агъэфедэхэзэ, фэIо-фэшIакIэхэу агъэцэкIэн алъэкIыщтхэр къыхахых. Ащ амал къытыщт чIыгумрэ амыгъэкощырэ мылъкумрэ яхьылIэгъэ къэбархэр зы чIыпIэм къыщызIэкIагъэхьанхэу, чIыпIэхэри нахь зэтырагъэпсыхьанхэу.

ЧIыпIэхэм зэдиштэу хэхъоныгъэ ягъэшIыгъэнымкIэ, къэралыгъо программэхэмрэ лъэпкъ проектхэмрэ шIуагъэ къатэу пхырыщыгъэнхэмкIэ Владимир Путиным къыгъэуцугъэ пшъэрылъхэр гъэцэкIэгъэнхэм тегъэпсыхьагъэу республикэм ихэбзэ къулыкъухэмрэ Росреестрэмрэ язэдэлэжьэныгъэ гъэпытэгъэным мэхьанэшхо зэриIэр Адыгеим и ЛIышъхьэ къыхигъэщыгъ.