Тызызэгъусэр илъэсипшI

Къырымрэ Севастопольрэ Урысыем къызыхэхьажьыгъэхэм фэгъэхьыгъэ мэфэкI Iофтхьабзэхэр тыгъуасэ Мекъуапэ щыкIуагъэх.

Илъэси 10-кIэ узэкIэIэбэжьмэ, Къырым щыпсэухэрэм янахьыбэм тикъэралыгъо къыхэхьажьхэ зэрашIоигъом ишыхьатэу амакъэ атыгъагъ.

Ащ епхыгъэу щытыгъ Лениным ыцIэкIэ щыт гупчэм щыкIогъэ мэфэкI концертыр. Къырым щыпсэухэрэм зэрадырагъэштагъэм ишыхьатэу Адыгеим ис нэбгырэ мин заулэ Iофтхьабзэм хэлэжьагъ. Адыгеим и ЛIышъхьэу КъумпIыл Мурат, АР-м и Къэралыгъо Совет — Хасэм и Тхьаматэу Владимир Нарожнэр, хабзэм ифедеральнэ ыкIи иреспубликэ къулыкъухэм ялIыкIохэр джащ фэдэу ащ хэлэжьагъэх. Къэзэрэугъоигъэхэм апашъхьэ къыщыгущыIэзэ Адыгеим и ЛIышъхьэ къызэрэхигъэщыгъэмкIэ, Урысыем и Президентэу Владимир Путиным ишIуагъэкIэ Къырымрэ Севастопольрэ ащыпсэухэрэм зытыраубытагъэм дырагъэштагъ, джащ тетэу тарихъ зэфагъэр зыпкъ игъэуцожьыгъэ хъугъэ.

«Тэ икIэрыкIэу тызэхэхьажьыгъ, зэгорэм тятэхэмрэ тятэжъхэмрэ зэрашIыгъагъэм фэдэу зэдытие ти Хэгъэгушхо тыфэлэжьэным ыкIи инеущрэ мафэ зыфэдэщтыр итхъухьаным пае. ЩыIэныгъэм илъэныкъо зэфэшъхьафхэр зыпкъ игъэуцожьыгъэнхэмкIэ IофшIэнышхо зыщызэшIотхыгъэ илъэсхэр къызэтынэкIыгъэх. Урысыем и Президент, Хэгъэгум и Правительствэ афэлъэкIыщтыр зэкIэ ашIагъ Къырымрэ Севастопольрэ амал зэриIэкIэ нахь псынкIэу, яцыхьэ зытелъыжьэу хэхъоныгъэм игъогу техьанхэм пае», — къыIуагъ КъумпIыл Мурат.

Джащ фэдэу ащ анаIэ зэратыраригъэдзагъэмкIэ, хэгъэгум инэмыкI шъолъырхэм афэдэу Адыгеими хыгъэхъунэныкъом экономикэм, зекIоным, культурэм ыкIи спортым алъэныкъокIэ зэдэлэжьэныгъэ дыриI.

Донбасс, Запорожскэ ыкIи Херсон хэкухэм IэпыIэгъоу аратырэм къытегущыIэзэ, республикэм и ЛIышъхьэ къызэрэхигъэщыгъэмкIэ, Урысыем джыри зэ къыгъэшъыпкъэжьыгъ ифедэхэр къыухъумэнхэм зэрэфэхьазырыр. КъумпIыл Мурат къызэриIуагъэмкIэ, хэгъэгум щыпсэурэ цIыф лъэпкъ зэфэшъхьафхэм языкIыныгъэ ишIуагъэкIэ гумэкIыгъоу, къиныгъоу къыкъокIыхэрэм ицыхьэ зытелъыжьэу тикъэралыгъо апэуцужьын елъэкIы.

Республикэм и ЛIышъхьэ анахьэу къыхигъэщыгъэхэм ащыщ непэ Iашэр аIыгъэу Урысыем инеущырэ мафэ икъэухъумэн фэбанэхэрэм хэгъэгум ишъолъырхэм зэрадырагъаштэрэр, ахэм яунагъохэм афэгумэкIых, амалышIухэр арагъэгъотынхэм дэлажьэх.

«Тэ зэкIэми тызыфаер Урысыер къэралыгъо лъэшэу, зыкIэу ыкIи пытэу щытыныр ары. Президентэу Владимир Путиным гъогоу пхырищырэм зэрэдырагъаштэрэр тицIыфхэм янахьыбэм амакъэ зэрэфатыгъэмкIэ джыри зэ къагъэшъыпкъэжьыгъ. ЕтIани Къырымрэ Севастопольрэ Урысыем къызыхэхьажьыгъэхэр илъэси 10 зыщыхъурэм ихэгъэунэфыкIын ар зэрэтефагъэм мэхьэнэ гъэнэфагъэ иIэу щыт», — къыIуагъ КъумпIыл Мурат.

Урысыем текIоныгъэр къызэрэдихыщтым, къош лъэпкъхэр пытэу зэрэзэкъоуцощтхэм, тарихъ шIэжьэу зэдыряер къаухъумэным зэрэфэхьазырхэм, культурэм ихэхъоныгъэ дэлэжьэнхэм ыкIи къэралыгъошхом ихэхъоныгъэ нахь зызэрэрагъэушъомбгъущтым ицыхьэ зэрэтелъыр Адыгеим и ЛIышъхьэ къыхигъэщыгъ.

Зэхахьэм икIэухым мэфэкI концерт щыIагъ, муниципальнэ ыкIи республикэ творческэ куп анахь дэгъухэм орэд къаIуагъ, къэшъуагъэх.