ТекIоныгъэм фэгъэхьыгъэ Iофтхьабзэхэр

Адыгэ Республикэм и Правительствэ иунэ республикэм изэхэщэкIо комитетэу «ТекIоныгъэм» изэхэсыгъоу щыкIуагъэм Адыгеим и ЛIышъхьэу КъумпIыл Мурат тхьамэтагъор щызэрихьагъ.

Комитетым иIофшIэн хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, АР-м иминистрэхэм я Кабинет и Тхьаматэу КIэрэщэ Анзаур, хабзэм ифедеральнэ ыкIи иреспубликэ къулыкъухэм ахэтхэр, АР-м и Дзэ комиссариат, АР-м иветеранхэм я Совет, нахьыжъхэм я Советэу АР-м и ЛIышъхьэ дэжь щыIэм япащэхэр, муниципалитетхэм яIэшъхьэтетхэр, Юнармием илIыкIохэр.

Республикэм и ЛIышъхьэ къызэрэхигъэщыгъэмкIэ, зэрэхэгъэгоу фэдэу Адыгеим шIэхэу щыхагъэунэфыкIыщт ТекIоныгъэшхом ия 79-рэ илъэс. Хэгъэгум мамыр, шъхьафит щыIакIэм къызэрэфигъэзэжьыгъэм итамыгъэу мы мэфэкIыр зэрэщытым имызакъоу, Хэгъэгум иухъумакIохэм ялIыхъужъныгъи къегъэлъагъо. Нафэу зэрэщытымкIэ, ахэм ащыщыбэхэм къэкIощт лIэужхэм апае апсэ атыгъ.

«Заом хэлэжьэнхэм пае Адыгеим ицIыф мин 80 фэдиз фронтым ыгъэкIуагъ. Ящэнэрэ пэпчъ къыгъэзэжьыгъэп, ау ипшъэрылъ икъоу ыгъэцэкIагъ. ТекIоныгъэр къыдэзыхыгъэхэм тарэгушхо, ахэм ящытхъоу хэмыкIокIэжьыщтыр ыкIи яшIэжь ренэу дгъэлъэпIэщтых, сыда пIомэ тилъэпкъ ибаиныгъэу, тызэрэгушхорэ лъэныкъоу ар ренэу щытыгъ ыкIи щытыщт. Арышъ, а мафэм ехъулIэу зэшIотхыщт Iофтхьабзэхэр пстэуми апэу зыфэгъэхьыгъэхэр ветеранхэр гъэлъэпIэгъэнхэр, тилIыхъужъэу фэхыгъэхэм яшIэжь къэухъумэгъэныр ары», — къыIуагъ КъумпIыл Мурат.

Ветеран организациехэр ыкIи ныбжьыкIэ объединениехэу патриотическэ пIуныгъэм къыхиубытэхэрэр игъэкIотыгъэу Iофтхьабзэхэм къахэгъэлэжьэгъэнхэм мэхьанэшхо зэриIэр КъумпIыл Мурат къыхигъэщыгъ. Ащ зэрилъытэрэмкIэ, ТекIоныгъэшхом итарихъ шIэжь къэухъумэгъэным имызакъоу, мэхьанэшхо зиIэ, дгъэлъэпIэрэ шIуагъэхэм цIыфхэм нахь акIуачIэ фызэрагъэуIуным епхыгъэ Iофтхьабзэхэр зэшIохыгъэ хъунхэмкIи ащ ишIуагъэ къэкIо.

Республикэм и ЛIышъхьэ мэфэкI Iофтхьабзэхэм ветеранхэр зэрахэлэжьэщтхэм, ахэр зыщыкIощтхэ чIыпIэхэм анэгъэсыгъэнхэм, ящыкIагъэу зыщыхъурэм медицинэ IэпыIэгъу ятыгъэным ыкIи нэмыкIхэм къащыуцугъ. Анахьэу къыхигъэщыгъэхэм ащыщ хэушъхьафыкIыгъэ дзэ операцием хэлажьэхэрэм, зэIазэхэрэм ыкIи дзэ сымэджэщхэм реабилитациер ащызыкIухэрэм мэфэкI Iофтхьабзэхэр афызэхэщэгъэнхэр.

«Нэмыц-фашист техакIохэм тызэратекIуагъэм фэгъэхьыгъэ Iофтхьабзэхэр дэгъу дэдэу зэхэщагъэ хъунхэм, Хэгъэгу зэошхом ихъугъэ-шIагъэхэр ащымыгъупшэнхэм ыкIи ныбжьыкIэхэр ащ фэдэ Iофтхьабзэхэм чанэу къахэгъэлэжьэгъэнхэм апае тфэлъэкIыщтыр зэкIэ тшIэн фае», — къыIуагъ КъумпIыл Мурат.

МэфэкI Iофтхьабзэхэм языфэгъэхьазырын тегущыIэхэ зэхъум къэгущыIагъэхэм ащыщых АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, АР-м культурэмкIэ иминистрэу Аулъэ Юрэ, АР-м физическэ культурэмкIэ ыкIи спортымкIэ и Комитет итхьаматэу Дэгужъые Мурат.

Джащ фэдэу къэбар жъугъэмкIэ зэлъыIэсыкIэ амалхэм IофшIэнышхо ащагъэцэкIэнэу рахъухьагъ. Хэгъэгу зэошхом хэлэжьагъэхэм, тылым Iоф щызышIагъэхэм, блокадэхэм къахиубытагъэхэм, концлагерьхэм ачIэсыгъэхэм ыкIи нэмыкIхэм афэгъэхьыгъэ тхыгъэхэр ренэу къыхаутыщтых.

Республикэм икъэлэ шъхьаIэ щызэхащэщтхэм афэгъэхьыгъэу нахь игъэкIотыгъэу къыIотагъ Мыекъуапэ имэрэу Геннадий Митрофановым.

Щынэгъончъэным иIофыгъохэмкIэ къэгущыIагъ АР-м хэгъэгу кIоцI IофхэмкIэ и Министерствэ иполицие общественнэ щынэгъончъэным икъэухъумэнкIэ ипащэ игуадзэу Андрей Федосеевыр. Ащ къызэрэхигъэщыгъэмкIэ, муниципальнэ образование пстэуми мэфэкI Iофтхьабзэхэр ащыкIохэ зыхъукIэ, ведомствэм иамалхэри нахь игъэкIотыгъэу ыгъэфедэнхэ фае.

Республикэм ипащэ къыхигъэщыгъ ведомствэ пстэуми, ащ хэхьэ партиеу «Единэ Россием» и Адыгэ шъолъыр къутами, зэдэлэжьэныгъэ пытэ азыфагу илъын зэрэфаер. ХэушъхьафыкIыгъэу Мыекъуапэ ыкIи нэмыкI муниципалитетхэм япащэхэм пшъэрылъ афишIыгъ мэфэкIым итамыгъэхэр электрон таблохэмрэ баннерхэмрэ атырашIыхьанхэу. ХэушъхьафыкIыгъэу КъумпIыл Мурат ынаIэ зытыридзагъэхэм ащыщых «ТекIоныгъэм» ифонд изэхэщэн, ветеранхэмрэ тылым щылэжьагъэхэмрэ мылъку IэпыIэгъу ятыгъэным, цIыфхэр жъугъэу зыхэлэжьэщтхэ мэфэкI Iофтхьабзэхэр дэгъоу зэхэщэгъэнхэм, муниципалитетхэм адэт мемориалхэр зыпкъ игъэуцожьыгъэнхэм ыкIи нэмыкIхэм япхыгъэ Iофыгъохэр.