КъоджэдэсхэмкIэ мэхьанэшхо яI

Адыгеим и ЛIышъхьэу КъумпIыл Мурат видеоселектор шIыкIэм тетэу зыхэлэжьэгъэ Iофтхьабзэр зыфэгъэхьыгъагъэр Теуцожь, Красногвардейскэ, Шэуджэн, Джэджэ ыкIи Мыекъопэ районхэм яцIыф псэупIэхэм игъэкIотыгъэ гъэцэкIэжьынхэр зарашIылIэхэ нэуж почтэ къутэмэ 12-м якъызэIухын ары.

Iофтхьабзэм иублэгъум Iахьзэхэлъ обществэу «Почта России» зыфиIорэм игенеральнэ пащэу Михаил Волковым Iофтхьабзэм хэлажьэхэрэм шIуфэс къарихыгъ. Ащ почтэхэм яIофышIэхэм закъыфигъазэзэ, амалыкIэхэр яIэ зэрэхъугъэр, яIофшIэнкIэ къэуцурэ Iофыгъохэр нахь Iэрыфэгъоу зэшIохыгъэ хъунхэм тегъэпсыхьэгъэ IофшIэныр джы икъоу гъэцэкIагъэ зэрэхъущтыр къыIуагъ, ащ дакIоу Урысыем и Президентэу Владимир Путиным пшъэрылъ къызэрафишIыгъэм тетэу, партиеу «Единэ Россием» иIэпыIэгъу хэлъэу къулыкъум иинфраструктурэ зэрэпсаоу нахь зэтырагъэпсыхьажьыгъ.

«УФ-м и Президент, УФ-м и Правительствэ ыкIи республикэм и ЛIышъхьэ яшIуагъэкIэ Адыгеим икъоджэдэс нэбгырэ мин 33-м ехъумэ фэIо-фашIэхэр нахьышIоу къафагъэцэкIэнхэм, агъэкIэжьыгъэ почтэ офисхэм IофшIэныр зэрищыкIагъэм тетэу ащызэхащэным иамал щыIэ хъугъэ. Урысыем и Президент и Джэпсалъэ къызэрэщыхигъэщыгъэмкIэ, гъэкIэжьыгъэным ипрограммэ лъэкIуатэ», — къыIуагъ Михаил Волковым.

Почтэхэм хэхъоныгъэ ашIыным Адыгеим и ЛIышъхьэ ынаIэ зэрэтыригъэтырэм пае зэрэфэразэр Урысыем и Почтэ ипащэ шъхьафэу къыхигъэщыгъ.

КъумпIыл Мурат къызэгущыIэм анахьэу анаIэ зытыраригъэдзагъэр хэгъэгум ипащэхэм ыкIи къулыкъум почтэмкIэ фэIо-фашIэхэр нахь дэгъоу зэшIохыгъэ хъунхэм екIолIакIэу фыряIэр ары. Ащ къызэриIуагъэмкIэ, социальнэ инфраструктурэмкIэ анахь мэхьанэшхо зиIэ лъэныкъоу къоджэдэсхэмкIэ почтэр щыт.

«ЦIыфхэм почтэм ифэIо-фашIэхэр нахь дэгъоу къаIэкIэхьанхэмкIэ амалыкIэу щыIэ хъугъэхэм яшIуагъэ къызэрэкIощтым сицыхьэ телъ, ежь цIыфхэр зыщыпсэухэрэ чIыпIэм къэралыгъо фэIо-фашIэхэри къащызыIэкIагъэхьанхэм иамали ащ къытыщт. АгъэкIэжьыгъэ почтэ къутамэхэр къызэрэзэIуахыгъэхэм пае зэкIэми сышъуфэгушIо. Ахэм Iоф зэращышъушIэрэм шъугу нахь къерэIэт!», — къыIуагъ Адыгеим и ЛIышъхьэ.

Республикэм ипочтэ хъытыу хэхъоныгъэ ышIынымкIэ, джащ фэдэу къалэу Мыекъуапэ и Гупчэ почтэ къутамэ гъэкIэжьыгъэнымкIэ тапэкIи язэдэлэжьэныгъэ нахь зэрагъэпытэщтым шъхьафэу тегущыIагъэх КъумпIыл Муратрэ Михаил Волковымрэ.

Iофтхьабзэм хэлэжьагъ ыкIи къыщыгущыIагъ Федеральнэ почтэ зэпхыныгъэм Адыгэ РеспубликэмкIэ и ГъэIорышIапIэ ипащэу Наталья Алифиренкэр. Ащ къызэрэхигъэщыгъэмкIэ, 2022-рэ илъэсым къыщегъэжьагъэу Адыгеим почтэ офис 30 щагъэцэкIэжьыгъ, кIэу тIу агъэпсыгъ. Джы цIыфэу ахэм къякIуалIэхэрэм почтэ фэIо-фашIэхэм анэмыкIэу бэ ащызэшIуахын алъэкIыщтыр: япсауныгъэ изытет ауплъэкIун, документхэм атырашIыкIын, ящыкIэгъэ канцтовархэр къызIэкIагъэхьанхэ ыкIи нэмыкIхэр щашIэнхэ амал щыI.

Iофтхьабзэм илъэхъан агъэкIэжьыгъэ почтэ къутамэхэм ятхьаматэхэм къаIотагъ офисхэм Iоф ащызышIэщтхэм амалыкIэу яIэ хъущтхэм афэгъэхьыгъэу. Шъугу къэтэгъэкIыжьы: Урысыем и Президентэу Владимир Путиным ипшъэрылъхэм ягъэцэкIэн къыдыхэлъытагъэу къоджэ псэупIэхэм почтэ зэпхыныгъэмкIэ якъутамэхэр агъэкIэжьыгъэх ыкIи шэпхъэ гъэнэфагъэу щыIэхэм атетэу яIофшIэн зэхащэным иамал арагъэгъотыгъ. Офисхэм къапэIулъ чIыпIэхэр зэтырагъэпсыхьагъэх, унэхэм видеокамерэхэр, кондиционерхэр, гумэкIыгъо горэ къэхъумэ макъэ къэзыгъэIущт пкъыгъохэр ахагъэуцуагъэх, ящыкIэгъэщт мебелыр къащэфыгъ, IофшIэпIэ чIыпIэхэри нахь Iэрыфэгъу зэрэхъущтхэри къыдалъытагъ. ЗэкIэ почтэ къутамэхэм пандусхэр яIэ хъугъэх, уачIэхьан хъумэ узтеIункIэщт кнопкэхэр ахагъэуцуагъэх, сэкъатныгъэ зиIэхэм атегъэпсыхьагъэу пчъэхэри ашIыгъэх.