Лъэныкъо шъхьаIэхэр агъэнэфагъэх

Республикэм и Общественнэ палатэ я 7-рэ зэIугъэкIэгъумкIэ апэрэ зэхэсыгъоу тыгъуасэ иIагъэм

Адыгеим и ЛIышъхьэу КъумпIыл Мурат хэлэжьагъ. Общественнэ палатэм Iоф зыдишIэщт лъэныкъо шъхьаIэхэр мыщ щагъэнэфагъэх.

Iофтхьабзэм хэлэжьагъэх АР-м и ЛIышъхьэрэ министрэхэм я Кабинетрэ я Администрацие ипащэу Къонэ Заур, УФ-м и Общественнэ палатэ хэтэу, Урысыем IофшIэнымкIэ и ЛIыхъужъэу МэщбэшIэ Исхьакъ, профсоюзхэм, общественнэ организациехэм, советхэм, движениехэм япащэхэмрэ ялIыкIохэмрэ. АР-м и Общественнэ палатэ итхьаматэу Устэ Руслъан зэхэсыгъор зэрищагъ.

Зэхэсыгъом хэлажьэхэрэм зафигъазэзэ, Адыгеим и ЛIышъхьэ къыхигъэщыгъ мыщ ыпэкIэ щыIэгъэ зэIукIэгъум хэтыгъэхэм дэгъоу Iоф зэрашIагъэр, цIыфхэр ыкIи ахэм яобъединениехэр хэбзэ къулыкъухэм адэлэжьэнхэмкIэ Общественнэ палатэм мэхьанэшхо зэриIэр.

«Хэбзэ къулыкъухэмрэ общественнэ IофышIэхэмрэ дэгъоу зэрэзэдэлажьэхэрэм ишIуагъэкIэ экономикэми, социальнэ лъэныкъоми зэхъокIыныгъэшIухэр афэхъух, чIыпIэхэм язэтегъэпсыхьанкIэ ыкIи нэмыкIыбэхэмкIэ анахь къекIущт хэкIыпIэхэр къагъотын алъэкIы», — къыIуагъ КъумпIыл Мурат.

ЛIышъхьэм зэрэхигъэунэфыкIыгъэмкIэ, ахэр зэдырагъаштэу зэрэзэдэлажьэхэрэм ифэмэ-бжьымэ дэгъу республикэм щыпхыращырэ зэхъокIыныгъэхэм, Адыгеим исоциальнэ, иэкономикэ хэхъоныгъэ, Урысыем и Президентэу Владимир Путиным къыгъэуцурэ пшъэрылъхэм язэшIохын ыкIи нэмыкIхэм ахэтэлъагъо. Мы мазэм къэралыгъом и Президент УФ-м ишъолъырхэр, Адыгейри ахэм зэрахэтэу, зыхэлэжьэрэ унэе программэхэм ягъэцэкIэн епхыгъэ IофыгъохэмкIэ зэIукIэр зэрищэгъагъ. Унэе программэхэм шIуагъэ къызэратырэр Президентым къыхигъэщыгъ — илъэси 4-м шъолъырхэм азыныкъо нахьыбэр ахэм япхырыщынкIэ гурыт урысые шапхъэхэм ашъхьэдэкIыгъэх. Хэгъэгум ишъолъырхэу лъэныкъо заулэхэмкIэ гъэхъэгъэшIухэр зышIыгъэхэм Адыгэ Республикэр зэращыщыр зэIукIэм къыщаIогъагъ.

Лъэпкъ зэфэшъхьафхэм яфедэ зыхэлъ Iофхэм япхырыщынкIэ обществэм изэкъотныгъэ гъэпытэгъэным мэхьанэшхо зэриIэр республикэм ипащэ къыIуагъ. КъумпIыл Мурат хэбзэ къулыкъухэмрэ АР-м и Общественнэ палатэрэ анахьэу анаIэ зытырагъэтын фэе лъэныкъохэр къыхигъэщыгъэх. Ахэм ахэхьэх хэушъхьафыкIыгъэ дзэ операцием хэлажьэхэрэм, ахэм яунагъохэм, ветеранхэм IэпыIэгъу ягъэгъотыгъэныр; цIыфым ифитыныгъэхэмрэ ишъхьафитныгъэрэ къэухъумэгъэнхэр; общественнэ лъыплъэнымкIэ амалхэм зягъэушъомбгъугъэныр, культурэмрэ гъэсэныгъэмрэ алъэныкъокIэ хэхъоныгъэ шIыгъэныр; гъогухэр щынэгъончъэнхэр, нэмыкIхэри.

ЗэIукIэм икIэухым Устэ Руслъан мыщ ыпэкIэ щыIэгъэ зэIукIэгъум хэтыгъэхэм яIофшIэн осэшIу къызэрэфишIыгъэм фэшI Адыгеим и ЛIышъхьэ зэрэфэразэр риIуагъ. Джащ фэдэу республикэм иобществэ ифедэ зыхэлъ Iофхэр шIуагъэ къытэу тапэкIи зэхищэнхэм, Iофтхьэбзэ пстэуми ахэлэжьэным зэрафэхьазырыр ащ къыхигъэщыгъ.

Я 7-рэ зэIугъэкIэгъумкIэ Адыгэ Республикэм и Общественнэ палатэ нэбгырэ 30 хагъэхьагъ. Ахэр республикэм иобъединениехэм, иорганизациехэм, ипатриотическэ, ипрофсоюзнэ, иныбжьыкIэ движениехэм япащэх ыкIи ялIыкIох, дин организациехэм, республикэм илъэпкъ-культурэ автономиехэм япащэх.

АР-м и Общественнэ палатэ коллегиальнэ къулыкъоу щыт. Республикэм исоциальнэ-экономикэ хэхъоныгъэ, цIыфхэм, общественнэ объединениехэм яфитыныгъэхэр къэухъумэгъэнхэм япхыгъэ Iофыгъохэм язэшIохынкIэ ащ хэбзэ къулыкъу-хэм зэпхыныгъэ пытэ адыриI.