Социальнэ IэпыIэгъум анаIэ нахь тырагъэтыщт

Адыгеим и ЛIышъхьэу ­КъумпIыл Мурат респуб­ликэм Iоф­шIэнымрэ со­циальнэ хэхъоны­гъэмрэкIэ ими­нистрэу Мырзэ Джанбэчрэ министрэм иапэрэ ­гуадзэу агъэнэфэгъэ Екате­рина Леоновамрэ зэIукIэгъу адыриIагъ.

Мыщ фэгъэхьыгъэ указым джырэблагъэ рес­публикэм ипащэ кIэтхэжьыгъ. ЗэIукIэгъум илъэ­хъан Мырзэ Джанбэч Министерствэм зэшIуихын фэе гухэлъэу иIэхэм, министрэ годзакIэр джы зыхэлэ­жьэщтхэм япхыгъэу къыIотагъ.

КъумпIыл Мурат Екатерина Леоновам фэлъэIуагъ IэнэтIакIэм гъэхъагъэхэр щишIынхэу ыкIи Адыгеим IофшIэнымрэ социальнэ хэхъоныгъэм­рэкIэ иминистрэ иапэ­рэ гуадзэ зыфэгъэзэгъэщт лъэныкъохэм республи­кэмкIэ мэхьанэшхо зэряIэр къыхигъэщыгъ. Адыге­им и ЛIышъхьэ къызэриIуагъэмкIэ, Къэралыгъо фондэу «Хэгъэгум иухъумакIохэр» зыфиIорэм ишъо­лъыр къутамэ зэдэлэжьэныгъэу дыряIэщтым иIофыгъохэм анахьэу анаIэ атырагъэтын фае. Нафэу зэрэщытымкIэ, мы къутамэр зыпылъыр хэушъхьафыкIыгъэ дзэ операцием хэлажьэхэрэм ыкIи ахэм яунагъохэм арысхэм Iэпы­Iэгъу ятыгъэныр ары. Социальнэ IэпыIэгъум къыдилъытэрэ Iофтхьабзэхэр зэкIэ республикэм гъэцэкIагъэ зэрэщыхъухэрэм ренэу лъыплъэнхэ фае.

«Анахьэу тынаIэ зытетын фаер сабыибэ зэрыс унагъохэр, хэушъхьафыкIыгъэ дзэ операцием иветеранхэр, ахэм яунагъохэм арыс­хэр, ныхэмрэ кIэлэцIыкIухэмрэ ары. Республикэ хабзэм икъулыкъухэм а лъэныкъомкIэ пшъэ­дэ­кIыжь ин ахьы, арышъ, игъом ыкIи тэрэзэу а лъэныкъомкIэ пшъэ­рылъхэр гъэцэкIэгъэнхэм мэхьа­нэшхо иIэу сэлъытэ. Урысыем и Президентэу Владимир Путиным мызэу, мытIоу къыхигъэщыгъ шъо­лъырхэм апашъхьэ ит социальнэ пшъэрылъхэр тэрэзэу ыкIи игъом зэшIохыгъэнхэ зэрэфаер. Федеральнэ зэIукIэм фэкIорэ Джэпса­лъэу къышIыгъэми, жъоныгъокIэ унэшъуакIэу къыдигъэкIыгъэхэми ащ фэгъэхьыгъэу къащеIо. А лъэныкъохэм лъэшэу шъунаIэ атежъу­гъэтын зэрэфаер джыри зэ къыхэ­сэгъэщы», — къыIуагъ КъумпIыл Мурат.

Министрэм иапэрэ годзакIэ цы­хьэ къызэрэфишIыгъэм пае рес­публикэм и ЛIышъхьэ зэрэфэразэр къыIуагъ ыкIи ыпашъхьэ ит пшъэ­рылъхэр гъэхъагъэ хэлъэу зэшIо­хыгъэ хъунхэмкIэ иопыти, ишIэ­ныгъэхэри къызыфигъэфедэнхэм зэ­рэфэхьазырыр къыхигъэщыгъ.

Екатерина Леоновам экономи­кэмрэ правэмрэкIэ Институтыр, джащ фэдэу гъэIорышIэнымкIэ Къэралыгъо университетыр къыу­хыгъэх, компание инхэм Iоф ащи­шIагъ, ахэм анэмыкIэу проект офисхэми пэщэныгъэ адызэри­хьагъ. Аужырэу Iоф зыщишIагъэр Iахьзэ­хэлъ обществэу «ГК Медси» зыфи­Iорэм ипроектнэ гъэIорышIапI, ащ ипащэу щытыгъ.