ХэбзэIахьхэм атегущыIагъэх

Урысые Федерацием хэбзэIахьхэмкIэ ихэбзэгъэуцугъэ нахьышIу шIыгъэным иIофыгъохэмкIэ парламент едэIунхэр Къэралыгъо Думэм щыкIуагъэх. Адыгеим и ЛIышъхьэу КъумпIыл Мурат ащ къыщыгущыIагъ.

УФ-м и Къэралыгъо Думэ и Тхьаматэу Вячеслав Володиным тхьамэтагъор дызэрихьэзэ Iофтхьабзэр кIуагъэ, ащ хэлэжьагъ УФ-м финансхэмкIэ иминистрэу Антон Силуановыр.

Хэгъэгум хэбзэIахьхэмкIэ ихэбзэгъэуцугъэ нахьышIоу гъэпсыгъэным фытегъэпсыхьэгъэ предложение заулэ ыпэкIэ УФ-м и Правительствэ къыгъэхьазырыгъагъ. Джы парламент едэIунхэм ялъэхъан ахэм атегущыIагъэх шъолъырхэм ялIыкIохэр, эксперт зэфэшъхьафхэр къыхэлажьэхэзэ. АР-м и ЛIышъхьэу КъумпIыл Мурат мы зэхэсыгъом хэлэжьагъ.

Вячеслав Володиным зэхэсыгъом хэлажьэхэрэм закъыфигъазэзэ къыхигъэщыгъ хэгъэгум бизнесым иIофшIэн зэрэщызэхэщагъэм ыкIи тикъэралыгъо хэбзэIахьхэр зэрэщатыхэрэм УФ-м иэкономикэ ихэхъоныгъэкIи, цIыфхэм яфедэхэмкIи мэхьэнэ гъэнэфагъэ зэриIэр. Къэралыгъо Думэм и Тхьаматэ къызэриIуагъэмкIэ, зигугъу ашIырэр зэфагъэ зыхэлъ хэбзэIахьыр гъэфедэгъэныр ары.

Къэралыгъо Думэм и Тхьаматэ шъхьафэу къащыуцугъ шъолъыр ыкIи муниципальнэ бюджетхэм ягъэпсын зэрэкIорэм иIофыгъо.

Адыгеим и ЛIышъхьэу КъумпIыл Мурат мы зэхэсыгъом гущыIэ къыщыратыгъ. Ащ къызэрэхигъэщыгъэмкIэ, непэ мэхьанэшхо зиIэ пшъэрылъхэр къытпыщылъых, ахэм зыкIэ ащыщых тхьамыкIэ щыIакIэм къыкIегъэчыгъэныр, бюджетым ихахъохэр нахьыбэ шIыгъэнхэр, сабыйхэр зэрыс унагъохэм, бизнес цIыкIумрэ гурытымрэ IэпыIэгъу ятыгъэныр, инвестициехэр нахьыбэу къызфэгъэфедэгъэнхэр. Ахэр зэшIохыгъэ хъунхэм пае зэфагъэ зыхэлъ хэбзэIахь системэм щыIэным мэхьанэшхо щыриI.

«Хэгъэгум ихэбзэIахь системэ зэхъокIыныгъэ фэшIыгъэнэу игъо хъугъэ, ежь-ежьырэу шъолъырхэр зыфырикъужьынхэм кIэгъэгушIугъэнхэ фае. Лъэпкъ пшъэрылъхэу къэуцухэрэр зэшIохыгъэнхэм пае зэфэдэ амалхэр шъолъырхэм ягъэгъотыгъэн, социальнэ-экономикэ хэхъоныгъэмкIэ унэе программэхэр, хъардж пшъэрылъхэр ыкIи дотациер нахь зэщиз шIыгъэнхэ ыкIи нэмыкI амалхэр зибюджет цIыкIоу щыт шъолъырхэм ягъэгъотыгъэнхэ фае. Республикэм экономикэмкIэ хэхъоныгъэ ешIы нахь мышIэми, хъарджхэмрэ хахъохэмрэ зыкъызэраIэтырэм зэтекIукIыныгъэ иI», — къыхигъэщыгъ КъумпIыл Мурат.

Адыгеим и ЛIышъхьэ парламентариехэм къафиIотагъ экономикэм ихэхъоныгъэ нахь псынкIэу хэхъоныгъэ ышIыным пае шъолъырым хабзэр щызыIыгъхэм зэрахьэрэ Iофтхьабзэхэм афэгъэхьыгъэу. Ащ пае стратегическэ мэхьанэшхо зиIэ проектитIумэ ягъэцэкIэн Адыгеим щэкIо — зекIонымрэ промышленностымрэ ахэр япхыгъэх.

ГущыIэм пае, промышленнэ парк инэу «Инэм» зыфиIорэр республикэм щашIы. А проектым IофшIэпIэ чIыпIакIэу мини 10-м ехъу къытыщт. Ащ дакIоу предпринимательствэм зиушъомбгъущт, бюджетхэм яхахъохэри хэпшIыкIэу нахьыбэ хъущтых. Мы лъэныкъомкIэ гъусэныгъэ-зэдэлэжьэныгъэу зыдыряIэщтхэм япхыгъэ IофшIэныр рагъэжьагъ.