Саугъэтыр къызэIуахыгъ

Адыгеим и ЛIышъхьэу Къум­пIыл Муратрэ Къэ­бэртэе-Бэлъ­къарым и ЛIышъхьэу КIокIо Казбекрэ мы мафэм апэрэ кIэлэегъаджэм фэгъэхьыгъэ саугъэтэу къа­лэу Черкесскэ ща­гъэуцугъэм икъызэIухын хэ­лэ­жьагъэх.

ЦIыфхэр жъугъэу къызэкIолIэгъэ Iофтхьабзэм къыщызэрэугъоигъэх гъэсэныгъэм ылъэныкъокIэ Iоф зышIэхэрэр, кIэлэ­егъаджэхэр, егъэджэн IофымкIэ ветеранхэр.

Къэрэщэе-Черкесым ихэбзэ къулыкъухэмкIэ Iофтхьабзэм хэ­лэжьагъэх республикэм и ЛIышъхьэу Темрезов Рэщыд, КъЧР-м и Народнэ зэ­IукIэ ипащэхэр, федеральнэ, шъолъыр къулыкъухэм ялIыкIохэр.
Нэбгырэ пэпчъ ищыIэныгъэ­кIэ, цIыфым иакъыл зэтеуцонымкIэ еджапIэм мэхьанэшхо зэриIэр Темрезов Рэщыд къыхигъэщыгъ.

«ЕджапIэр, апэрэ кIэлэегъа­джэр, классым ипащ ары сабый­хэр щыIэныгъэ гъогум тезы­щэ­хэрэр. IофшIэн къин зыгъэцэ­кIэрэ кIэлэегъаджэхэм тхьа­шъуе­гъэпсэу ясэIо. Къэрэщэе-­Черкесым, тихэгъэгушхуи яеджа­пIэхэм ачIэс кIэлэеджа­кIохэм гъэхъагъэхэр ашIынэу сафэ­лъаIо. Мы аужырэ уахътэм мылъкукIи, техникэкIи нахьышIоу еджапIэхэр зэтегъэпсыхьэгъэнхэмкIэ, ахэм ягъэцэкIэжьынкIэ, гъэсэныгъэм епхыгъэ псэолъа­кIэхэм яшIынкIэ бэ зэшIуахыгъэр. Тэ пшъэрылъэу тиIэр кIэ­лэцIыкIухэм шIэныгъэ куу яIэ­нымкIэ, яамалхэм зыкъызэ­IуахынымкIэ ищыкIэгъэ амалхэр зетхьанхэр ары», — къыIуагъ КъЧР-м и ЛIышъхьэ.

КъыткIэхъухьэрэ ныбжьыкIэ­хэм яегъэджэнрэ япIунрэ мэхьанэшхо зэряIэм къытегущыIэзэ, КъумпIыл Мурат къэзэрэугъоигъэхэм агу къыгъэкIыжьыгъ ижъыкIэ кавказ лъэпкъхэм яса­быйхэр лъытэныгъэшхо зыфашIырэ нэмыкI цIыфхэм апIу­нэу зэраратыщтыгъэр.

«Непи ны-тыхэм кIэлэегъа­джэхэм осэшхо афашIы, мэхьа­нэшхо зиIэ апэрэ шIэныгъэхэр кIэлэцIыкIухэм язытыщт, ахэм язэчыйхэм зыкъызэIуязыгъэ­хыщт, шIум, зэфагъэм фэзыгъэ­сэщтхэ, кIэлэеджакIохэр цIыф дэгъу хъунхэм фэлэжьэщт кIэлэегъаджэхэм яцыхьэ ателъ», — къыIуагъ КъумпIыл Мурат.
КIэлэегъаджэм лъытэныгъэшхо фэшIыгъэныр гъэсэныгъэм хэхъоныгъэ ин езгъэшIырэ лъэ­ныкъоу КъБР-м и ЛIышъхьэ ылъытагъ.