Проектхэм япхырыщын зэрэкIорэм зыщигъэгъозагъ

АР-м и ЛIышъхьэу КъумпIыл Мурат тыгъуасэ республикэм икъэлэ шъхьаIэ икъокIыпIэ лъэныкъо ихэхъоныгъэ тегъэпсыхьэгъэ проектхэм япхырыщын зэрэкIорэм зыщигъэгъозагъ.

ЛIышъхьэм игъусагъэх АР-м иминистрэхэм я Кабинет итхьаматэу КIэрэщэ Анзаур, Мыекъуапэ имэрэу Геннадий Митрофановыр, АР-м псэолъэшIынымкIэ и Министерствэ ипащэхэр, архитекту­рэмрэ къэлэгъэпсынымрэкIэ республикэ, къэлэ комитетхэм яIэшъхьэтетхэр, псэолъэшI организациехэм ялIыкIохэр. Мыщ дэжьым къыхэгъэщыгъэн фае а чIыпIэм ихэхъоныгъэкIэ унэшъо гъэнэфагъэ ыпэкIэ зэрашIыгъагъэр. Микрорайонэу КъокIыпIэм ыкIыбкIэ цIыфхэр зыщыпсэущтхэ чIыпIакIэм фэтэрыбэу зэхэт унэ 13 щашIынэу рахъухьагъ. Ахэм сатыу­шIыпIэхэр, транспортыр зыщагъэуцущт чIыпIэ гъэнэфагъэхэр яIэщтых, урамхэм атетын фэе пкъыгъохэр ыкIи нэмыкIхэр къыдалъытэщтых.

Проектым иподрядчикыр компаниеу «ОБД» зыфиIорэр ары. Инфраструктурэм епхыгъэ Iофтхьабзэхэм афэгъэзагъэр АР-м икъэралыгъо бюджет учреждениеу «Стройзаказчикыр» ары.

Республикэм и ЛIышъхьэ хигъэунэфыкIыгъ проектыр дэгъоу гъэцэкIэгъэн, микрорайоныкIэм щыпсэунхэмкIэ нахь Iэрыфэгъу зэрэхъущтым епхыгъэ Iофыгъохэр къыдэлъытэгъэнхэ зэрэфаер. Ащ нэмыкIэу къэIогъэн фае унэхэм япроцент 25-м нахь мымакIэу кIэлэцIыкIу ибэхэм ыкIи зэхэоным ищынагъо зиIэ псэупIэхэм къачIащыжьыхэрэм зэраратыщтыр.

«Анахь мэхьанэ зиIэр унэхэм ачIэхьа­жьы­щтхэр разэ хъунхэр ары. ЗекIоным ылъэныкъокIэ рес­публикэм истратегическэ гухэлъхэр къыдэтлъытэхэзэ, ама­лэу тиIэхэм джыри нахь зя­гъэу­шъомбгъугъэнымкIэ а чIыпIэм ишIуагъэ къызэрэкIощтым сицыхьэ телъ. ЧIыопсым идэхагъэ, джырэ инфраструктурэр ыкIи зекIоным епхыгъэ псэуа­лъэхэр зэрэблагъэхэм мэхьанэшхо яI», — къыIуагъ КъумпIыл Мурат.

ПсэолъэшI компанием ипащэ къызэрэхигъэщыгъэмкIэ, фэтэр мини 2,1-м ехъу атынэу мэгугъэх. Мы илъэсым Iоныгъом литерэу N 5-м ишIын аухыщт. УнэкIоцI дэпкъхэр хьазыр хъущтых. Ахэм счетчикхэр, пщэрыхьапIэхэр, сантехникэр, пчъэхэр ахэтыщтых, балконхэмрэ лоджиехэмрэ зэрищыкIагъэм тетэу зэтырагъэпсыхьащтых.

Фэтэрыбэу зэхэт унэхэм яшIын дакIоу ахэм къапэIулъ чIыпIэхэри зэтырагъэ­псыхьащтых. Псэуалъэхэм чIыпIэу аубытырэр гектар 14 фэдиз мэхъу, цIыфхэр зычIэсыщт унэхэр – квадрат метрэ мин 73,8-рэ фэдиз. Социальнэ инфраструктурэм ихэхъоныгъэ телъытагъэу мы микрорайоным пшъэрылъыбэ зэшIозы­хыщт Гупчэм пае унакIэ щашIынэу рахъухьагъ.

ЦIыфхэмкIэ нахь Iэрыфэгъу хъуным телъытагъэу джырэ уахътэм диштэрэ еджэпIакIэу ашIынэу рагъэжьагъэм кIэлэеджэкIо 1100-рэ чIэфэщт. КIэлэцIыкIу IыгъыпIэмрэ IэзапIэмрэ Iоф ашIэу рагъэжьагъ. Ащ нэмыкIэу чIыпIэхэм зэхэубытагъэу хэхъоныгъэ ягъэ­шIыным къызэрэдилъытэрэм тетэу общественнэ мэхьанэ зиIэ чIыпIакIэхэри зэтырагъэпсыхьащтых. ГущыIэм пае, паркэу «Патриот» зыцIэщтыр ащ щагъэ­псынэу рахъухьагъ.