Адыгеим и Мафэ щыкIуагъ

Ащ икъызэIухын хэлэжьагъэх АР-м и ЛIышъхьэу КъумпIыл Муратрэ Iахьзэхэлъ обществэу «РЭЦ»-м ипащэу Вероника Никишинамрэ.

Iофтхьабзэм хэлэжьэнхэу къэкIуагъэх Адыгеим ыцIэкIэ Федерацием и Совет исенаторхэу Хъопсэрыкъо Муратрэ Александр Наролинымрэ, АР-м иминистрэхэм я Кабинет и Тхьаматэ игуадзэу ЛIыхэсэ Махь­муд, АР-м экономикэ хэ­хъоныгъэмкIэ ыкIи сатыумкIэ иминистрэу Шэуджэн Заур, АР-м иминистрэхэм я Кабинет, бизнес-сообществэм, предприя­тие экспортерхэм ялIыкIохэр.

Къэзэрэугъоигъэхэм шIуфэс къарихыгъ гупчэм ипащэу Вероника Никишинам. Ащ къыхигъэщыгъэх Урысыем иэкономикэ игъэпытэн экспортым чIыпIэу щиубытырэмрэ шъолъырхэм яIахьэу хашIыхьэрэмрэ. Адыгеим и ЛIышъхьэ зэдэлэжьэны­гъэмкIэ ыкIи республикэм и Мафэ изэхэщэнкIэ РЭЦ-м амал къызэраритыгъэм пае зэрэфэразэр къыIуагъ.

Адыгеим экономикэмкIэ, ин­вестициехэмкIэ ыкIи экспортым­кIэ амалэу иIэхэм афэгъэ­хьыгъэ видеоматериал хьакIэхэм апае къагъэлъэгъуагъ. Джащ фэдэу чIыпIэхэм товархэр къащызы­шIыхэрэм IэкIыб къэралхэм япродукцие аIэкIагъэхьанымкIэ амалэу яIэхэм ащагъэгъозагъэх. Адыгеим ипэрыт предприятиехэм къыдагъэкIыхэрэм ядэгъугъэ ауплъэкIун алъэкIыгъ. Гущы­Iэм пае, псыIэшIу къэзышIырэ фабрикэу «Майкопскэм» за­шъохэрэ ыкIи минеральнэ псыр, щэ заводэу «Джаджэм», Красногвардейскэ щэ заводым ыкIи компаниеу «Мирный-Адыгея» зыфиIорэм къыдагъэкIырэ къуае­хэмрэ щэхэкIхэмрэ, компаниеу «Краснодарагроальянс» зыфиIорэм натрыфым хэшIыкIыгъэ ипродукцие ыкIи нэмыкI­хэр ауплъэкIунхэ амал аратыгъагъ. Адыгеим ипредприни­мательхэм шъоур, IэшIу-IушIу­хэр, пцэжъыехэр, щыгъур ыкIи нэмыкIхэр къагъэлъэгъуагъэх. Республикэм илъэпкъ культурэ хьакIэхэр нэIуасэ фэзышIыгъэ­хэм ащыщ купэу «Мыст» зыфи­Iорэр.

«Урысыем ишъолъыр пэпчъ продукцие гъэшIэгъон къыща­гъэхьазыры, IэкIыб къэралхэм ащыIуагъэкIынымкIи амал дэгъухэр яIэх. Тэ тынаIэ зы­тедгъэтырэр IэпыIэгъум иамал инхэм такъыпкъырыкIызэ, къыдагъэкIыхэрэр нахьыбэ, нахь зэмылIэужыгъо ашIынхэр ары. Логистикэмрэ страхованиемрэ алъэныкъокIэ Iофтхьабзэхэм язэшIохын тегъэпсыхьэгъэ Iофхэм язэшIохынкIи тадеIэщт», — къыхигъэщыгъ РЭЦ-м ипащэу Вероника Никишинам.

Мы гупчэм щыкIогъэ зэIукIэм щахэплъагъэх Адыгеим иэкспорт зегъэушъомбгъугъэнымкIэ ыкIи IэпыIэгъу етыгъэнымкIэ амалэу щыIэхэм. АР-м и ЛIышъхьэ къызэрэхигъэщыгъэмкIэ, республикэм ипредприятиехэм джырэ уахътэм къыгъэуцурэ пшъэрылъхэм атетэу яIофшIэн зэхащэным анаIэ тырагъэты. НепэкIэ экспортым ылъэны­къо­кIэ гъусэныгъэ зыдытиIэ хэ­гъэгу шъхьаIэхэм ащыщых Аб­хъазыр, Белоруссиер, Казахстан, Азербайджан, Узбекистан, Армениер ыкIи Грузиер, джащ фэдэу Тыркуер, Вьетнам. Мыщ дэжьым къэIогъэн фае блэгъэныгъэ зыдытиIэ хэгъэгу цыхьэшIэгъухэм ащыщхэри а лъэныкъомкIэ зэрэтищыкIагъэхэр.

Экспортым IэпыIэгъу етыгъэ­нымкIэ республикэм и Гупчэ тегъэпсыхьагъэу Iофтхьабзэу чIы­пIэм щызэшIуахыхэрэм ­Адыгеим и ЛIышъхьэ къатегущыIагъ. Ахэм къадыхэлъыта­гъэх дунэе къэгъэлъэгъопIэ-ермэлыкъ Iофтхьабзэхэм ахэлэжьэнхэр, IэкIыб хэгъэгухэу гъусэныгъэ зыдытиIэщтхэм якъэ­гъотынкIэ яшIуагъэ къы­тэкIыныр, яIэпэIэсэныгъэ нахь хагъэхъонымкIэ зишIуагъэ къэ­кIощт семинархэр зэхэщэгъэнхэр. Лъэпкъ проектэу «Дунэе кооперациемрэ экспортымрэ» зыфиIорэм иамалхэми яшIуагъэ къэкIо Адыгеим пынджлэжьыныр зыпкъ щигъэуцожьыгъэнымкIэ. Предприятие пэрыт заулэхэм фэгъэкIотэныгъэ зыхэлъ, пIэлъэ кIэкIым телъытэгъэ чIыфэхэр къаратых сырьер къаIэкIэхьаным пае.

«Iофтхьабзэу зэшIотхыхэрэм кIэух гъэнэфагъэ къаты — илъэ­сэу икIыгъэм къызэригъэлъэ­гъуа­гъэмкIэ, экспортым Iэпы­Iэгъу етыгъэнымкIэ шъолъыр гупчэхэм азыфагу щыкIогъэ рейтингым Адыгеим я 32-рэ чIыпIэр щиубытыгъ. Мыщ дэ­жьым къыхэгъэщыгъэн фае рес­пуб­ликэм иамалхэр ащ бэкIэ зэрэшъхьадэкIыхэрэр», — къыхигъэщыгъ АР-м и ЛIы­шъхьэ.

РеспубликэмкIэ стратегическэ мэхьанэ зиIэ лъэныкъохэм япхыгъэу анахь шъхьаIэхэр тIу зэрэхъухэрэр: промышленностымрэ зекIонымрэ. АщкIэ зи­шIуагъэ къэкIощтхэр промышленнэ паркэу «Инэмрэ» гъэ­псэфыпIэу «Лэгъонакъэрэ». УФ-м и Президентэу Владимир Путиным зекIоным хэгъэгум зыщегъэушъомбгъугъэнымкIэ, ащ епхыгъэ Iофтхьабзэхэр тэ­рэзэу гъэцэкIэгъэнхэмкIэ пшъэ­рылъэу къыгъэуцугъэхэм ар икъоу адештэ.

«Урысыем иэкспорт ихэхъоныгъэ Адыгеим иIахь хишIыхьан зэрилъэкIыщтым укIэупчIэжьынэу щытэп. Адыгеим икомпаниехэм, тибизнес цIыкIу къыдагъэкIырэ товархэмрэ фэIо-фашIэхэмрэ язытет лъэшэу дэгъу, цIыфхэми ахэр ящыкIагъэх. IэкIыб къэрал­хэм нахь игъэкIотыгъэу типродукцие алъыдгъэIэсыным пае бизнесым иамалхэм ыкIи Iэпы­Iэгъоу ащ ратырэм зягъэу­шъомбгъугъэн фае. Тызэгъусэмэ, республикэм экспортымкIэ иамалхэм джыри ахэдгъэ­хъон зэрэтлъэкIыщтым сицыхьэ телъ», — къыхигъэщыгъ Къум­пIыл Мурат.