Самбэм зырагъэушъомбгъущт

Адыгэ Республикэмрэ Урысые физкультурэ-спорт общественнэ организациеу «Урысыем самбэмкIэ ифедерациерэ» зэдэлэжьэныгъэ зэрэзэдыряIэщтымкIэ зэзэгъыныгъэм зэдыкIэтхагъэх. Документым аIапэ кIэзыдзыжьыгъэхэр АР-м и ЛIышъхьэу КъумпIыл Муратрэ Урысыем самбэмкIэ ифедерацие ипрезидентэу Сергей Елисеевымрэ ары.

Лъэныкъохэр зэзэгъыгъэх самбэм Адыгэ Республикэм зыщегъэушъомбгъугъэнымкIэ, физическэ культурэмрэ спортымрэ мэхьанэу яIэм зыкъегъэIэтыгъэным, цIыфхэм япсауныгъэ гъэпытэгъэным атегъэпсыхьэгъэ общественнэ проектхэм ягъэцэкIэнкIэ зэдэлэжьэныгъэу зэдыряIэр нахь агъэпытэнэу.

КъумпIыл Муратрэ Сергей Елисеевымрэ зэдэгущыIэгъухэр зэдашIыхи, Iоф зыдашIэщт лъэныкъохэм атегущыIагъэх. Ащ къыхеубытэх самбэм, цIыфхэр жъугъэу зыхэлэжьэрэ спортым хэхъоныгъэ ягъэшIыгъэныр, спорт инфраструктурэм зегъэушъомбгъугъэныр, зэнэкъокъухэр, самбэмкIэ спорт Iофтхьабзэхэр зэхэщэгъэнхэр, тренерхэмрэ судьяхэмрэ яIэпэIэсэныгъэ зыкъегъэIэтыгъэныр. Федеральнэ партийнэ проектэу «За Самбо» зыфиIорэм зэрэхэлажьэрэр Адыгеим лъигъэкIотэщт, проектхэу «Самбо в школу», «Самбо в ВУЗы», «Самбо в ГТО», «Адаптивное самбо» зыфиIохэрэм япхырыщын ыуж ихьащт. СамбэмкIэ гупчэ еджапIэ Адыгеим къыщызэIухыгъэнымкIэ, самбэм и Унэшхо шIыгъэнымкIэ амалэу щыIэхэм ахэплъэщтых.

«Непэ тынаIэ нахь зытедгъэтырэр самбэм зегъэушъомбгъугъэныр, ащкIэ шъолъырхэм яхабзэхэр зыпкъ игъэуцожьыгъэнхэр ары. Адыгеим самбэмкIэ хэбзэшIухэр иIэх. Пэрыт спортсменыбэ Адыгеим къепхыгъэу щыт. ДунаимкIэ самбист анахь цIэрыIор Адыгеим щыщ Хьасанэкъо Мурат ары. СамбэмкIэ пэрытныгъэ зыIыгъхэм ясатыр хэуцонымкIэ Адыгэ Республикэм ищыкIэгъэ цIыфхэри, амалхэри иIэх. Республикэм и ЛIышъхьэ мы лъэныкъом къызэрэдыригъаштэрэм мэхьанэшхо иI. Самбэм хэгъэгум зыщегъэушъомбгъугъэным тызэгъусэу тыдэлэжьэщт», — къыIуагъ Сергей Елисеевым.

Адыгеим и ЛIышъхьэ Урысыем самбэмкIэ ифедерацие тхьауегъэпсэу риIуагъ мы спорт лъэпкъым республикэм зыщегъэушъомбгъугъэнымкIэ ренэу IэпыIэгъу къызэрэритырэм фэшI. Чемпионхэм ягъэсапIэу республикэр зэрэщытыгъэм истатус зыпкъ игъэуцожьыгъэным, дзюдомрэ самбэмрэкIэ Мыекъопэ еджапIэм гъэхъагъэу иIэхэм ахэгъэхъогъэным мэхьанэшхо зэриIэр, мыщ щагъэсагъэхэр урысые, дунэе зэнэкъокъухэм зэрахэлажьэхэрэр ащ къыхигъэщыгъ. Мы спорт лъэпкъым мэхьанэу иIэм зыкъегъэIэтыгъэным иIахьышхо хешIыхьэ гъогогъу 11-рэ дунаим ичемпионэу, гъогогъуи 8 дунаим и Кубок къыдэзыхыгъэ, гъогогъуи 7 Европэм ичемпионыцIэ къызыфагъэшъошэгъэ, самбэмкIэ Урысыем гъогогъу 19-рэ ичемпион хъугъэ, Урысыем спортымкIэ изаслуженнэ мастерэу, медалэу «Адыгеим и Щытхъузехь», орденэу «Хэгъэгум ыпашъхьэ гъэхъагъэу щыриIэхэм афэшI» зыфиIорэм имедалэу я II-рэ шъуашэ зиIэр къызыфагъэшъошагъэу, Адыгеим ыцIэкIэ УФ-м и Къэралыгъо Думэ идепутатэу Хьасанэкъо Мурат.

«Самбэм изегъэушъомбгъун республикэм иIахь зэрэхишIыхьэрэм тэркIэ мэхьанэшхо иI. Спортым епхыгъэ хэбзэшIухэр, тренер лъэшхэр тиIэх, тихэгъэгуи, дунаими ясамбистхэм непэ щысэтехыпIэ афэхъурэ чемпионхэр мымакIэу дгъэсагъэх. Мы аужырэ илъэсхэм Урысыем ипащэхэмрэ федеральнэ министерствэмрэ республикэм IэпыIэгъу къызэрэфэхъугъэхэм ишIуагъэкIэ джырэ спорт инфраструктурэм лъэшэу Адыгеим зыщиушъомбгъугъ. Дунэе шапхъэхэм адиштэрэ зэнэкъокъухэр тадэжь щызэхащэх. Урысыем самбэмкIэ ифедерацие тиIэпыIэгъоу Петербург щыкIорэ Дунэе экономическэ форумым зэзэгъыныгъэу щадэтшIыгъэхэм къадыхэлъытагъэу гухэлъэу тиIэхэр зэрэпхырытщыщтхэм, самбэм нахь зызэредгъэушъомбгъущтым тицыхьэ телъ. ЦIыфхэр жъугъэу зыхэлэжьэрэ спортым ныбжьыкIэхэри нахьыбэу къыхэтщэщтых. Апшъэрэ спорт текIоныгъэхэр тиреспубликэ щашIынхэм ар фэIорышIэщт», — къыIуагъ Адыгеим и ЛIышъхьэ.

Самбэр республикэм нахь зыщыпылъхэ спорт лъэпкъхэм зэу ащыщ, спортсмен ныбжьыкIэ мин 1,6-м ехъу мы спорт лъэпкъым пыщагъ. 1961-рэ илъэсым къыщегъэжьагъэу самбэм Адыгеим хэхъоныгъэ щишIэу ригъэжьагъ. Джащ къыщыублагъэу самбист цIэрыIуабэ республикэм щагъэсагъ. А уахътэм къыкIоцI Адыгеим исамбистхэр дунаим ичемпионатхэм гъогогъу 20-рэ щатекIуагъэх, гъогогъу 18-рэ дунаим и Кубок къыдахыгъ, гъогогъу 15-рэ Европэм ичемпионатхэм текIоныгъэ къащыдахыгъ.