Адыгеим илIыкIо куп хэлажьэ

Я ХХVII-рэ Дунэе экономическэ форумэу Санкт-Петербург къыщызэIуахыгъэм Урысые Федерацием и Президентэу Владимир Путиныр, Республикэм илIыкIо купэу Адыгеим и ЛIышъхьэу КъумпIыл Мурат зипащэр хэлажьэх. Iофтхьэбзабэ ащ щызэрахьанэу, зэдэгущыIэгъухэр зэдашIынхэу, зэзэгъыныгъэхэм акIэтхэнхэу, пленарнэ зэхэсыгъохэм ахэлэжьэнхэу рахъухьэ.

«Зэфагъэ зыхэлъ, зыщызэгурыIохэрэ дунай гъэпсыгъэныр» зыфиIорэ девизым чIэтэу экономическэ форумыр кIощт. Петербург щыкIорэ Дунэе экономическэ форумым хэлажьэхэрэм шIуфэс къарихи, къэралыгъом ипащэ зэрэхигъэунэфыкIыгъэмкIэ, нэмыкI хэгъэгухэм гъусэныгъэ адыриIэным, тиджырэ лъэхъан иэкономическэ, исоциальнэ, инаучнэ-технологическэ пшъэрылъхэм язэшIохынкIэ ахэм Iоф адишIэным Урысыер афэхьазыр.

«Дунаим тет къэралыгъохэм азыныкъо нахьыбэмэ зыдырагъаштэрэр зэфагъэ зыхэлъ, демократие шапхъэхэм адиштэрэ дунэе зэфыщытыкIэхэу къэралыгъохэм зэфэдэ фитыныгъэхэр яIэнхэр, хэгъэгухэмрэ лъэпкъхэмрэ якультурэ лъытэныгъэ афэшIыгъэныр къыдэзылъытэхэрэр щыIэнхэр ары. Къэралыгъуи 9-мэ яобъединениеу БРИКС-м иIофшIэнкIэ къызфигъэфедэхэрэр ащ фэдэ шапхъэхэр ары. Мыгъэ Урысыем а объединением тхьамэтагъор щызэрехьэ. ПсынкIэу хэхъоныгъэ зышIырэ объединением хэлажьэхэрэм дунэе экономикэм мылъкоу зэригъакIорэм ызыщанэ къатефэ. 2006-рэ илъэсым Петербург щыкIогъэ я Х-рэ Дунэе экономическэ форумыр ащ ублапIэ зэрэфэхъугъэм мэхьанэшхо иIэу щыт», — къыIуагъ Урысые Федерацием и Президент.

Владимир Путиным къызэрэхигъэщыгъэмкIэ, форумыр проект гъэшIэгъонхэм ублапIэ афэхъущт, хэгъэгухэмрэ лъэпкъхэмрэ язэдэлэжьэныгъэ гъэпытэгъэным фэIорышIэщт.

Адыгеим илIыкIо куп бизнесым епхыгъэ Iофтхьэбзэ зэфэшъхьафхэм ахэлэжьэнэу, компаниеу «Ромекс», Iахьзэхэлъ обществэу «Газпромбанкым», Iахьзэхэлъ обществэу «Урысыем и Почтэ», Урысыем самбэмкIэ ифедерацие зэзэгъыныгъэ заулэмэ адыкIэтхэнэу рехъухьэ. Адыгеим и ЛIышъхьэ зэрэхигъэунэфыкIыгъэмкIэ, республикэмкIэ мы форумым мэхьанэшхо иI. ЭкономикэмкIэ ыкIи геополитикэмкIэ гумэкIыгъохэр зыщыщыIэхэ джырэ лъэхъаным республикэм хэхъоныгъэ егъэшIыгъэнымкIэ опытышIоу щыIэхэмкIэ яхъожьынэу амал иIэщт.

«Тэ тызыфаер инвестициемкIэ амалэу тиIэхэр ядгъэшIэнхэм, зэдэгущыIэгъухэр адэтшIынхэм, инвесторхэр къэдгъотынхэм, опыт пэрытхэм нэIуасэ зафэтшIынхэм пае Петербург щыкIорэ Дунэе экономическэ форумыр амал зэриIэкIэ нахь икъоу къызфэдгъэфедэныр ары. ТапэкIэ тиреспубликэ хэхъоныгъэ егъэшIыгъэнымкIэ а пстэуми яшIуагъэ къэкIощт. 2023-рэ илъэсымкIэ инвестициехэр сомэ миллиард 61,6-м нэсыгъэх. ГъэрекIо сомэ миллиард 85,4-рэ зытефэгъэ проект 43-рэ Адыгеим щагъэцэкIагъ. Мыгъэрэ форумыми республикэм федэ къызэрэфихьыщтым сицыхьэ телъ. ЗэдэгущыIэгъухэр адэтшIыщтых, инвестициехэр бэу республикэм къыхязыгъэлъхьащт зэзэгъыныгъэхэм такIэтхэщт. Республикэм исхэм ящыIэкIэ-псэукIэ ащ елъытыгъэу зыкъиIэтыщт, цIыфхэм федэу къаIэкIахьэрэр нахьыбэ хъущт, социальнэ пшъэрылъхэм язэшIохынкIэ хэбзэIахьхэу бюджетхэм къарыхьэхэрэм къахэхъощт», — къыIуагъ КъумпIыл Мурат.