Лъэпкъ проектым тегъэпсыхьагъэу

Адыгеим и ЛIышъхьэу КъумпIыл Мурат искусствэхэмкIэ кIэлэцIыкIу еджапIэу псэупIэу Тульскэм дэтым щыIагъ. Лъэпкъ проектэу «Культурэм» диштэу игъэкIотыгъэ гъэцэкIэжьынхэр ащ рашIылIагъэх.

2021-рэ илъэсым квадрат метрэ мини 2-м ехъурэ тIоу зэтет унэр учреждением пае къыхагъэкIыгъагъ. Лъэпкъ проектым тегъэпсыхьагъэу инженер псэуалъэхэр, шъхьаныгъупчъэхэр, пчъэ блыпкъхэр зэблахъугъэх, унэ кIоцIымрэ кIыбымрэ агъэкIэрэкIагъэх. Ащ нэмыкIэу Iэмэ-псымакIэхэр, мебелыр, музыкальнэ Iэмэ-псымэхэр къащэфыгъэх, еджэпIэ гупэр нэф къэзытырэ пкъыгъо дахэмкIэ агъэкIэрэкIагъ. 2023-рэ илъэсым ыкIэхэм адэжь искусствэхэмкIэ кIэлэцIыкIу еджапIэм иIофшIэн унакIэм щыригъэжьагъ.

Республикэм и ЛIышъхьэ кIэлэегъаджэхэм ыкIи еджакIохэм гущыIэгъу афэхъугъ, IофшIэнхэу агъэцэкIагъэхэм язытет зыфэдэр, кIэлэцIыкIухэм еджэнхэмкIэ къашъхьапэщтыр зэкIэ яIэмэ зэригъэшIагъ.

«Iофышхо гъэцэкIагъэ хъугъэ, егъэджэн Iофтхьабзэхэр дэгъоу зэшIохыгъэ хъунхэмкIэ ящыкIэгъэ амалхэр зэкIэ зэрарагъэгъотыгъэм мэхьанэшхо иI. КIэлэцIыкIухэу сэнаущыгъэ зыхэлъхэр къыхэгъэщыгъэнхэмкIэ, лъэныкъо пстэумкIи зэдиштэу щыт цIыфэу ахэр хъунхэмкIэ кIэлэегъаджэхэм Iофышхо зэшIуахы», — къыIуагъ КъумпIыл Мурат.

ИскусствэхэмкIэ кIэлэцIыкIу еджапIэм ипащэу ГъукIэлI Батыр къызэриIуагъэмкIэ, мы еджапIэм чIэсхэр музыкальнэ Iэмэ-псымэхэм къарагъэIошъунхэм, сурэт ашIыным, орэд къаIоным афагъасэх, къэшъонхэм япхыгъэ сыхьатхэри арагъэхьых, компьютер графикэр агъэфедэзэ дизайным ылъапсэхэм, театральнэ искусствэм ыкIи нэмыкIхэм нэIуасэ афашIых. КIэлэеджакIохэр творческэ зэнэкъокъухэм, Iофтхьэбзэ зэфэшъхьафхэм чанэу ахэлажьэх. Мы еджапIэм кIэлэегъэджэ 29-рэ щэлажьэ, ахэм ащыщхэм къэралыгъо тынхэр къафагъэшъошагъэх, апшъэрэ категорие яI. Аужырэ илъэси 10-м нэбгырэ 400-м ехъу еджапIэм къычIитIупщыгъ. Ахэм ащыщыбэхэм яеджэн лъагъэкIотагъ.

КъумпIыл Мурат зэIукIэгъоу ыкIи зэдэгущыIэгъоу адыриIагъэхэм афэхъугъэ кIэуххэм ялъытыгъэу районым ипащэхэм пшъэрылъ заулэ афишIыгъ еджапIэм изэтегъэпсыхьан зэрифэшъуашэу ыкIэм нэгъэсыгъэнымкIэ.