ЦIыфхэм яIофыгъохэм язэхэфын
05.06.2024 20:35
Фото: пресс-служба главы Адыгеи Урысыем и Президент пшъэрылъ къызэрэфишIыгъэм тетэу УФ-м и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновым цIыфхэр ышъхьэкIэ ригъэблэгъагъэх. КъФШъ-м ишъолъырхэм, Адыгеири ахэм зэрахэтэу ащыпсэухэрэм ащыщхэм ащ зыкъыфагъэзагъ.
ПэIудзыгъэ шIыкIэм тетэу кIогъэ Iофтхьабзэм хэлэжьагъэх Адыгеим и ЛIышъхьэу КъумпIыл Мурат, федеральнэ инспектор шъхьаIэу Сергей Дрокиныр, АР-м культурэмкIэ иминистрэу Аулъэ Юрэ, Тэхъутэмыкъое районым ипащэу Шъао Аскэр, АР-м и ЛIышъхьэ и УплъэкIокIо гъэIорышIапIэ ипащэу Бузэрэ Игорь.
Адыгеим щыщ Бек Зуриет, къуаджэу Нэтыхъуае культурэм и Унэу дэтым ипащэ, народнэ творчествэм и Гупчэ якъуаджэ щыгъэпсыгъэным иIофыгъокIэ УФ-м и Президент и Полномочнэ лIыкIо зыфигъэзагъ. Къуаджэм нэбгырэ 350-м ехъу дэс. Культурэм и Унэу ащ дэтыр 1959-рэ илъэсым агъэпсыгъ, зэхэтэкъоным иIоф нэсыгъ. ЦIыфхэр жъугъэу зыхэлэжьэрэ культурэ Iофтхьабзэхэр къапэблэгъэ еджапIэм щызэхащэх.
Адыгеим и ЛIышъхьэ Iофыр къызэрэзэхифыгъэмкIэ, Тэхъутэмыкъое районым иадминистрацие игъусэу мы Iофыгъом тегущыIагъэх. Культурэм ипсэолъакIэ ипроект документациеу къагъэхьазырыгъэр къэралыгъо экспертизэ ашIыгъах. Культурэм и Унэ квадрат метрэ 668-м ехъу зэлъиубытыщт. 2024-рэ илъэсым итыгъэгъазэ нэс проектыр пхыращын ямурад. Ащ къэшъуапIэ, бэнапIэ, кружокхэм, тренерхэм апае кабинетхэр, зыгъэпсэфыпIэ хэтыщтых.
Владимир Устиновым республикэм ипащэ пшъэрылъ къыфишIыгъ народнэ творчествэм и Гупчэ игъом гъэпсыгъэнымкIэ ищыкIэгъэ амалхэр зэрихьанхэу. Ар зэрагъэцэкIагъэмкIэ 2025-рэ илъэсым щылэ мазэм и 15-м нэс макъэ арагъэIужьын фае.
