Икъоу IэпыIэгъу ятыгъэныр

Адыгеим и ЛIышъхьэу КъумпIыл Мурат къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ тыгъуасэ щыIагъ.

Урысыем и Президентэу Владимир Путиным иунашъо тетэу илъэскIэ узэкIэIэбэжьмэ ар зэхащэгъагъ, хэушъхьафыкIыгъэ дзэ операцием хэлажьэхэрэмрэ ахэм яунагъохэм арысхэмрэ IэпыIэгъу ятыгъэным фытегъэпсыхьагъэу щыт.

Фондыр зызэхащагъэр илъэс зэрэхъугъэм фэгъэхьыгъэ зэIукIэу щыIагъэм Iофэу ашIагъэм икIэуххэр щызэфахьысыжьыгъэх. Iэшэ зэпэуцужьынхэм яветеранхэм, хэушъхьафыкIыгъэ дзэ операцием хэлажьэхэрэм, хэкIодэгъэ зэолIхэм яунагъохэм арысхэр ягъусэхэу ахэм къыхагъэщыгъэр къэралыгъо фондэу «Хэгъэгум иухъумакIохэм» икъутамэ иIофшIэн тапэкIи нахь дэгъоу зэригъэцэкIэщтымкIэ пшъэрылъхэр гъэнэфэгъэнхэ зэрэфаер ары.

ЗэдэгущыIэгъум хэлэжьагъэх АР-м и Къэралыгъо Совет — Хасэм и Тхьаматэ игуадзэу Цэй Эдуард, АР-м IофшIэнымрэ социальнэ хэхъоныгъэмрэкIэ иминистрэу Мырзэ Джанбэч, фондым ишъолъыр къутамэ ипащэу ПIатIэкъо Аслъан, общественнэ организациехэм ялIыкIохэр, хэушъхьафыкIыгъэ дзэ операцием хэлажьэхэрэм, ахэм яунагъохэм арысхэм ащыщхэр.

КъумпIыл Мурат къыхигъэщыгъ республикэм икъутамэ чанэу Iоф зэришIэ-рэр ыкIи къэралыгъо фондым къыгъэуцугъэ пшъэрылъхэу хэгъэгум и Президент иунашъо зигугъу къыщишIыгъэхэр гъэцэкIагъэ хъунхэм пае яIофшIэн джыри нахь агъэлъэшын зэрэфаер.

Республикэм и ЛIышъхьэ анаIэ зытыраригъэдзагъэхэм ащыщ хэушъхьафыкIыгъэ дзэ операцием хэлажьэхэрэм IэпыIэгъу ятыгъэным мэхьанэшхо зэриIэр ыкIи ащ екIолIэкIэ тэрэз фыряIэн зэрэфаер. ЗэдэгущыIэгъум илъэхъан фондым иIофшIэн тапэкIи зэрэзэхэщэгъэщтыр, анахь Iофыгъо шъхьаIэхэу анаIэ зытырагъэтын фаеу щытхэр къыхагъэщыгъэх.

«Фондым зигугъу къышIырэ пчъагъэхэм, Iофэу агъэцэкIагъэм цIыфыбэмэ ящыIэныгъэ къырыкIуагъэмрэ къырыкIощтымрэ япхыгъэх. ЦIыфхэм яфэныкъоныгъэхэм анаIэ лъэшэу атырагъэтын, цIыфыгъэ шэпхъэ дахэхэм арыгъозэнхэ фае. Урысыем и Президентэу Владимир Путиным пшъэрылъ къызэрафишIыгъэм тетэу «Хэгъэгум иухъумакIохэр» зыфиIорэр зэхащэгъагъ. ХэушъхьафыкIыгъэ дзэ операцием хэлажьэрэ ыкIи ащ иветеран пэпчъ социальнэ лъэныкъомкIэ ищыкIагъэхэр, ахэм яунагъохэм, джащ фэдэу хэкIодагъэхэм ягупсэхэм IэпыIэгъу ятыгъэным, икъоу анаIэ атырагъэтыным мэхьанэшхо яI. Ар тэ типшъэрылъ, тичIыпIэгъухэм, тиухъумакIохэм псэемыблэжьныгъэу зэрахьэрэм къыкIэкIуагъ ащ фэдэ фыщытыкIэр», — къыхигъэщыгъ КъумпIыл Мурат.

Ветеранхэм ыкIи ахэм къапэблэгъэ цIыфхэм ягумэкIхэм, яIофыгъохэм ренэу зэрищыкIагъэм тетэу Адыгеим щыIэ къутамэм ынаIэ атырегъэты, ыпашъхьэ ит пшъэрылъхэр, социальнэ, медицинэ, юридическэ Iофыгъохэу къэуцухэрэр зэшIуехых, зыщищыкIагъэу хъурэм психологическэ IэпыIэгъуи реты.

Адыгэ Республикэм и ЛIышъхьэ пшъэрылъ зэрафишIыгъэм тетэу Мыекъуапэ игупчэ унэ хъоо-пщау къащыфыхагъэкIыгъ, ар игъэкIотыгъэу агъэцэкIэжьыгъ ыкIи къутамэм иIофшIэн тэрэзэу ыгъэцэкIэнымкIэ ищыкIэгъэ амалхэр зэкIэ рагъэгъотыгъэх. Техникэ амалхэу реабилитациемкIэ къызфагъэфедэщтхэр зэрагъотылIэщтхэ пункт къызэIуахыгъ, сэкъатныгъэ зиIэ хъугъэ зэолIхэм зэралъыплъэщтхэм фэгъэсэгъэнхэмкIэ Iофтхьабзэхэр зэшIуахых, ны-тыхэм якIэлэцIыкIухэр ягъусэхэ зыхъукIэ, уахътэр зыщагъэкIощт кIэлэцIыкIу джэгупIэхэр, тхылъеджапIэхэр ащ хэтых. Муниципалитетхэм ащыпсэурэ унагъо пэпчъ социальнэ координатор къыфэгъэзагъэу щыт. Республикэм иведомствэ ыкIи иорганизациябэхэр, МФЦ-р, IофшIэн ягъэгъотыгъэнымкIэ Гупчэр, социальнэ фондыр, медико-социальнэ экспертизэмкIэ бюрор ыкIи нэмыкIхэр а Iофтхьабзэхэм къахэлажьэх. Хэгъэгум иухъумакIохэм IэпыIэгъу ятыгъэнымкIэ IофшIэнэу агъэцакIэрэм лъэплъэ, ахэм якIэуххэр зэфехьысыжьых къутамэу зигугъу къэтшIыгъэм.

Къэралыгъо фондым ишъолъыр къутамэ ипащэу ПIатIэкъо Аслъан къызэриIуагъэмкIэ, ахэм Iоф ашIэ зыхъугъэм къыщыублагъэу нэбгырэ 2000 ехъумэ закъыфагъэзагъ, Iофыгъо 4300-м ехъумэ ахэплъагъэх, ахэм япроцент 85-р зэшIуахыгъах. IэпыIэгъоу аратырэр лъэныкъо зэфэшъхьафхэм япхыгъэу щыт — «Зэо зэпэуцужьынхэм яветеран» зыфиIорэ статусым икъэгъэшъыпкъэжьын къыщыублагъэу гъэпсэфыпIэ-IэзэпIэ чIыпIэхэм агъэкIонхэм епхыгъэ тхылъхэм ягъэхьазырын нэсыжьэу.

Мы фондым хэушъхьафыкIыгъэ дзэ операцием иветеранхэр общественнэ проектхэм чанэу ахегъэлажьэх.