«Фыщт» изыфэгъэхьазырын

Адыгэ Республикэм и Правительствэ зычIэт унэм сэнаущыгъэ зыхэлъ ныбжьыкIэхэм яслетэу «Фыщт» зыфиIорэм изыфэгъэхьазырынрэ изэхэщэнрэ афэгъэхьыгъэ зэхэсыгъо зэхэщэкIо комитетым щыриIагъ.

Адыгэ Республикэм и Правительствэ зычIэт унэм сэнаущыгъэ зыхэлъ ныбжьыкIэхэм яслетэу «Фыщт» зыфиIорэм изыфэгъэхьазырынрэ изэхэщэнрэ афэгъэхьыгъэ зэхэсыгъо зэхэщэкIо комитетым щыриIагъ. ШышъхьэIум и 16-м къыщыублагъэу и 18-м нэс республикэм икъушъхьэлъэ чIыпIэ ар щыкIощт. АР-м и ЛIышъхьэу КъумпIыл Мурат пшъэрылъ къызэрэфишIыгъэм тетэу Iофтхьабзэр зэрищагъ Адыгэ Республикэм иминистрэхэм я Кабинет и Тхьаматэ игуадзэу – АР-м финансхэмкIэ иминистрэу Виктор Орловым.

Мы Iофтхьабзэм хэлэжьагъэх АР-м и ЛIышъхьэрэ министрэхэм я Кабинетрэ я Администрацие ипащэу Владимир Свеженец, республикэм иминистрэхэм я Кабинет хэтхэр, муниципальнэ образованиехэм япащэхэр, Кавказ къэралыгъо чIыопс биосфернэ заповедникэу Х.Г. Шапошниковым ыцIэкIэ щытым ипащэхэр, зекIоным епхыгъэ организациехэм ялIыкIохэр, АКъУ-м ыкIи МКъТУ-м яректорхэр, Роспотребнадзорым, АР-м хэгъэгу кIоцI IофхэмкIэ и Министерствэ, Урысыем и МЧС и ГъэIорышIапIэу Адыгэ Республикэм щыIэм яIофышIэхэр.

Зэхэсыгъом хэлажьэхэрэм шIуфэс къарихызэ Виктор Орловым къызэрэхигъэщыгъэмкIэ, ныбжьыкIэхэр хэлажьэхэзэ мыщ фэдэ Iофтхьабзэу зекIоным епхыгъэр анахь лъэгэпIэ иным диштэу зэхэщэгъэн, щынэгъончъэным ишэпхъэ пстэуми адиштэу ар регъэкIокIыгъэн фае.

«НыбжьыкIэхэр яопыткIэ зэхъожьынхэм, зэдэлэжьэнхэм, ныбжьыкIэ политикэр пхырыщыгъэнымкIэ нахь шIогъэ ин къэзыхьырэ Iофтхьабзэу зыщыгъуазэхэр зэлъягъэшIэгъэнхэм тислет фэлажьэ. Мы Iофтхьабзэм илъэс къэс кIэлэцIыкIухэр ежэх, мэфищ зекIоным зиIахь хэзышIыхьэ зышIоигъохэм япчъагъэ хэхъо, арышъ, сэнаущыгъэ зыхэлъ кIэлэцIыкIухэр зэкIэ ащ хэлэжьэн алъэкIыным мэхьанэшхо иI. Зызэрэфагъэхьазырыщтым илъэныкъо пстэуми татегущыIэщт, программэм ипроект тыхэплъэжьыщт, пшъэрылъ заулэхэмкIэ унашъохэр тштэщтых», — къыIуагъ АР-м иминистрэхэм я Кабинет и Тхьаматэ игуадзэу – АР-м финансхэмкIэ иминистрэу Виктор Орловым.

Ащ нэужым зызэрагъэхьазырыщт лъэныкъом къытегущыIагъ АР-м ныбжьыкIэхэм яIофхэмкIэ и Комитет итхьаматэу Максим Галушкиныр. Проектыр пхырыщыгъэным пае республикэм ис ныбжьыкIэхэм упчIэхэр аратыгъэх. Нафэ къызэрэхъугъэмкIэ, щыIэкIэ-псэукIэ тэрэзыр гъэпытэгъэнымкIэ, спортым, лъэпкъ культурэм, творчествэм, патриотизмэм хэхъоныгъэ ягъэшIыгъэнымкIэ Iофтхьэбзэ гъэнэфагъэхэр зехьэгъэнхэм япхыгъэ зекIоныр игъоу щыт. КъызэрэхагъэщыгъэмкIэ, слетым къыдыхэлъытагъэу, зекIоным ыпэкIэ зы мафэ щыIэу Адыгэ къэралыгъо университетым гъэсэныгъэм и Мафэ щызэхащэнэу рахъухьагъ.

Слетым хэлэжьэщтхэр сэнаущыгъэ зыхэлъ ныбжьыкIэхэр ары: зэнэкъокъухэм, олимпиадэхэм, студент ыкIи патриот объединениехэм, ныбжьыкIэ организациехэм анахь дэгъоу закъыщызгъэлъэгъуагъэхэр, спортымкIэ, еджэнымкIэ, наукэмкIэ, творчествэмкIэ ыкIи нэмыкI лъэныкъохэмкIэ гъэхъэгъэшхохэр зышIыгъэхэр ары. Муниципалитет пэпчъ хэлэжьэщтхэм япчъагъэ зыфэдизыр алъагъэIэсыгъ, анкетэ гъэнэфагъэхэмкIэ ахэр къахахыщтых.

Туроператорэу «Ошъутен-Тур» зыфиIорэм игид 15 рагъэблэгъэщт инструктор пшъэрылъхэр агъэцэкIэнхэу. Чэтэн лагерьхэм ягъэуцункIэ инструкторхэм яшIуагъэ къагъэкIощт, зекIохэм яшъхьэегъэзыпIэу «Фыщт» нэсынхэ зыхъукIэ ыкIи къызагъэзэжькIэ ахэр ягъусэщтых, зекIоным къыдилъытэрэ программэхэм ягъэцэкIэнкIи къадеIэщтых.

Зэхэсыгъом илъэхъан электроэнергиер лагерым къызэрэнагъэсыщтым, слетым хэлажьэхэрэм стырыпсхэр, игъом ыкIи икъоу псэу зэшъощтхэр зэраIэкIагъэхьащтхэм, медицинэм ылъэныкъокIэ яфэIо-фашIэхэр зэрэзэшIуахыщтхэм зэхэсыгъом щатегущыIагъэх. Кавказ заповедникым илIыкIохэмрэ хэбзэухъумэкIо къулыкъухэм яIофышIэхэмрэ анаIэ атырагъэтыщт слетым хэлажьэхэрэм ящынэгъончъагъэ.

Зэхэсыгъом икIэуххэр зэфихьысыжьхэзэ Виктор Орловым пшъэрылъ гъэнэфагъэхэр къыгъэуцугъэх спортымкIэ, творчествэмкIэ, гъэсэныгъэмкIэ ыкIи тыкъэзыуцухьэрэ дунаим икъэухъумэнкIэ Iофтхьэбзэ зэфэшъхьафхэр слетым илъэхъан тэрэзэу зэшIохыгъэнхэмкIэ.

Шъугу къэтэгъэкIыжьы: апэдэдэ сэнаущ зыхэлъ ныбжьыкIэхэм яслетэу «Фыщт» зызэхащэгъагъэр 2017-рэ илъэсыр ары. Адыгеим икъушъхьэлъэ чIыпIэхэм ар ащыкIогъагъ ыкIи Адыгэ Республикэм и ЛIышъхьэу КъумпIыл Мурат кIэщакIо зэрэфэхъугъэм тетэу илъэс къэс ар зэхащэ. Республикэм ичIыпIэ зэфэшъхьафхэм къарыкIыгъэ ныбжьыкIэхэу сэнаущыгъэ зыхэлъхэр проектым бэу къыхеубытэх, Адыгеим ичIыпIэ анахь дахэхэм ащыщэу къушъхьэу Фыщт ылъапсэ ар щыкIощт. Программэм зекIон, культурнэ, спорт ыкIи тыкъэзыуцухьэрэ дунаим икъэухъумэн япхыгъэ Iофтхьэбзабэ къыхеубытэ, ахэм ащыщых заохэр зыщыкIогъэгъэ чIыпIэхэр, мылылъэхэр ыкIи хьыкъумхэр зэгъэлъэгъугъэнхэр. Хабзэ зэрэхъугъэу, слетым хэлажьэхэрэр зэкIэ Адыгеим ихэбзэ къулыкъухэм япащэхэм ягъусэхэу пхъэ машIом дэжь къыщызэрэугъоищтых.