Iофхэм язытет зыщагъэгъозагъ

Адыгеим и ЛIышъхьэу КъумпIыл Муратрэ псыкъэкIуапIэхэм я Федеральнэ агентствэ и Пащэу Дмитрий Кирилловымрэ Красногвардейскэ районым кIогъагъэх уплъэкIун гухэлъ яIэу.

ЦIыфхэмрэ чIыпIэхэмрэ псыр къызиукIэ зэрарэу къафихьырэр дэгъэзыжьыгъэнымкIэ псыIыгъыпIэхэм язытет зыщагъэгъозагъ ыкIи ащ епхыгъэ Iофтхьэбзэ гъэнэфагъэхэм атегущыIагъэх.

Урысые Федерацием и Правительствэ и Тхьаматэ игуадзэу Дмитрий Патрушевым ипшъэрылъхэр гъэцэкIагъэ хъунхэм къыдыхэлъытагъэу а Iофтхьабзэр кIуагъэ. Илъэсэу икIыгъэм жъоныгъуакIэм Темыр-Кавказ ыкIи Къыблэ федеральнэ шъолъырхэм язытет фэгъэхьыгъэ зэIукIэу кIуагъэм ахэм ягугъу къыщашIыгъагъ.

Апэ къызыщыуцугъэхэр къуаджэу Хьатикъуаерэ Лэбапэрэ зэзыпхыхэрэ лъэмыджыр ары. Псыхъоу Пшызэ иджабгъу нэпкъ ылъэныкъокIэ лъэмыджым икIэгъэкъонхэм адэжь чъыгыжъхэр, ыхэкIэ нахь улъыкIуатэмэ, пшэхъо зэтырихьагъэхэр бэу щыплъэгъущтых. Псыр къызиукIэ, цIыф псэупIэхэм къакIэоным ищынагъо нахь ин мэхъу а чIыпIэхэм икъоу псыр зэрарымыкIорэм пае.

Урысыем псыкъэкIуапIэхэмкIэ ипащэу Дмитрий Кирилловым агентствэм ичIыпIэ къулыкъу пшъэрылъ фишIыгъ Пшызэ ичIыпIэхэу хэкIхэр зыщызэтырихьагъэхэм яIофыгъо зэшIуихынэу.

Адыгеим и ЛIышъхьэу КъумпIыл Мурат шъолъыр ГъэIорышIапIэмрэ Красногвардейскэ районым иадминистрациерэ пшъэрылъ афишIыгъ а лъэныкъомкIэ, Лэбэпэ районым ыкIи Пшызэ ипсыкъэкIуапIэхэмкIэ Iофтхьабзэу зэшIуахыщтхэр, зэрэзэдэлэжьэщтхэр агъэнэфэнэу. ЛъэсрыкIохэр ыкIи автомобиль псынкIэхэр тхьамыкIагъо лъэмыджым къытехъухьаным щымыщынэхэу щызекIонхэм иамали мыщ щытегущыIагъэх.

Ащ нэужым зэIукIэм хэлажьэхэрэм Пшызэ исэмэгубгъу нэпкъ дэжь щыIэ дамбэр къаплъыхьагъ. Дмитрий Кирилловым Iофтхьабзэхэр къыгъэнэфагъэх шапхъэу щыIэхэр укъуагъэ мыхъунхэмкIэ ыкIи псыхъоу Пшызэ щынэгъо лъэгапIэм нэсэу зыкъыIэтын зэрилъэкIыщтыр къыдалъытэзэ псырыкIопIэ тедзэ ашIын зэрэфаем анаIэ тыраригъэдзагъ.

ИкIэухым республикэм и ЛIышъхьэрэ Федеральнэ агентствэм и Пащэрэ Краснодар псыIыгъыпIэм инэпкъэу псэупIэу Красногвардейскэм дэжь щыIэм изытет зыщагъэгъозагъ.